Ovilinga 23
23
1Iya Paulus wa tongolola ovanene wOtjoongi ha tyaa: “Valumentu vakwetu! Ame momutima wandje kotjipala tjaKalunga katee ndino hendi kamu na tja okatodhi.” 2Iya omuyambethi omunene Ananias wa heela ovantu mboka mbava kulamene popedhi naPaulus, ve mu tone kotjinyo. 3Paulus we mu heela ha tyaa: “Tjimato ove otjipembadhi hitja thethungulwa kombanda! Kalunga me ku tono. Ove wa kala pohi mpoka, u nkoye moveta, iya ove omwene oove wa lundha oveta himo heele ovantu va ntone!”#Mat. 23:27-28
4Ovalumentu mboka mbava li popedhi naPaulus, ve mu pula hava tyaa: “Mo penye omuyambethi omunene waKalunga?”
5Paulus we ve yaka ha tyaa: “Vakwetu! Ame hí tji i okutya omuyambethi omunene, mena lyokutya omisonekwa vi tya, hó popi navi omutumini wotjiwan̯a tjen̯i.”#Eks. 22:28
6Iya Paulus hiaa mono okutya vamo va li Ovasadukai novakwawo va li Ovafarisai, wa popya unene peulu mOtjoongi ha tyaa: “Valumentu vakwetu! Ame ndjiMufarisai omunOvafarisai. Me koywa, mena lyokutya mba itavela okutya ovat̯e mava ka imuka.”#Ovil. 26:5; Filp. 3:5
7Iya Paulus hiaa dhi pokupopya nyahi, Ovafarisai nOvasadukai va uta okulitetha ombata, Otjoongi hatji liyapauka modhombinga mbali. 8Ovasadukai va li amava tyaa: “Ovantu kaava ka imuka kout̯e, kaku na omweengeli ne ombepo.” Iya Ovafarisai ovipuka hembi avihe ve vi itavela.#Mat. 22:23; Mark. 12:18; Luk. 20:27 9Iya va tona otjuuyila otjinene, ovalongiveta vamo owomopaati yOvafarisai va tetha unene ombata, hava tyaa: “Nt̯e katu mwene mo ouvi watja momulumentu hengu. Pamo wa popithwa kombepo ne komweengeli?”
10Odhombata hidha londo peulu, ondjai yovita ya li amai tila okutya pamo ovantu mava tono Paulus. Iya ondjai ya heela ovakwavita, va ka ithe mo Paulus mokati kowingi wovantu, ve mu twale kokamba yawo.
11Iya otjit̯iku soka Muhona Jesus we ya puPaulus ha tyaa: “Likolethela! Ngahi wa ntjipulula moJerusalem, ngatjo u ka ntjipulula nomoRoma.”
Ovajuda mava hala okudhipaa Paulus
12Iya hikwa tji Ovajuda va panga ompango, hava ana okutya kaava li wo kaava nu, tainkolo háveya dhipaa Paulus. 13Ovalumentu mbava pangele ompango hendji, va pon̯a omilongo vine. 14Va ya kovanene nokovayambethi ovanene hava tyaa: “Nt̯e twa ana okutya katu na himatu lolo, tainkolo hátuya dhipaa Paulus. 15Iya n̯e nOtjoongi tjOvanene tumen̯i elaka kondjai yovita okutya ngava ete Paulus kun̯e, n̯e mu ngale mamu hala okumona mo uke ounongo umo muye. Iya nt̯e twe lilongekedha oku mu dhipaa, tainkolo héye thika kun̯e.”
16OmuthiaaPaulus hiee tji tee otjokudhipaa Paulus, wa ya kokamba oku ka heela Paulus. 17Iya Paulus wa ithana omunene wovakwavita umo, he mu heele ha tyaa: “Twala etele hendi kondjai yovita, mena lyokutya u na hime ke mu heela.” 18Wa twala etele kondjai yovita, ha tyaa: “Onkwatwa Paulus ya ndjithana, hai nkumbu ndji ete etele hendi kwoove, mena lyokutya u na hima hala oku ku heela.”
19Ondjai yovita ye mu kambula mokuwoko, hai mu twala pokampengi, hai mu pula hai tyaa: “Mo hala okuntjeela tji?”
20Etele lye mu yaka hali tyaa: “Ovanene wOvajuda va tanta okuya oku ku kumba, komuhuka u tume Paulus kOtjoongi tjovanene, mena lyokutya mava hala okumona mo ounongo muye. 21Iya alikana himava popi, hó tji ningi, mena lyokutya pe na ovalumentu mbava pon̯a omilongo vine, mbava vandele Paulus. Iya wo va ana okutya kaava li, wo kaava nu, tainkolo háveye mu dhipaa. Iya napano mava kevelele vala kwoove okutya mo tya vi.”
22Ondjai yovita ya heela etele hai tyaa: “Hó tji hipululile omuntu noumo okutya otjipuka hehi we tji ntjeele.” Iya ye he mu lekele, a ende.
Paulus ma twalwa koKesarea
23Iya ondjai yovita ya ithana ovanene vavali wovakwavita, hai ve heele hai tyaa: “Longekedhen̯i ovakwavita wopohi omathele avali novakwavita wodhonkambe omilongo epanduvali novayumbi womaonga omathele avali, va ende koKesarea. Iya lilongekedhen̯i okukulama powola yomoovi wokout̯iku. 24Iya longekedhen̯i odhonkambe humaku ka kavila Paulus, n̯e mu mu twale kuFeliks, omutumini wotjilongo.” 25Iya ondjai ya soneka omukanda mbumau tyaa hinyahi: 26“Klaudius Lisias ma meneke omutumini wotjilongo, omutumbalekwa omunene Feliks. 27Omulumentu hengu, wa kambulilwe kOvajuda, ambala ve tje mu dhipaa. Ame mba ile ko novakwavita vandje, he mu amene himba tee okutya Omuroma. 28Iya ame mba li ame hala okwiiwa himave mu kondjethele, he mu tumu kOtjoongi tjovanene vawo. 29Mba mona okutya ke na hiaa ninga hitja thele oku mu dhipaetha ne oku mu twiitha mokaliwoso. Iya nan̯i wa li ama kondjethelwa vala ovipuka vimo mbii na tja noveta yawo. 30Iya himba heelwa okutya ku na Ovajuda vamo mbave mu vandele, mbe mu tumu kwoove dhivadhiva. Ame he heele wo mbamave mu kondjetha okutya ngave mu kondjethele kotjipala tjoye.”
31Ovakwavita va itha po Paulus ngahi va heelwa. Otjit̯iku tjatjo soka otjo ve mu twala koAntipatris. 32Iya ngamuhuka ovakwavita wopohi va tjuna kokamba yawo, hava yetha ovakavili wodhonkambe va thindikile Paulus. 33Iya wo hive ya moKesarea, va yandja omukanda komutumini wotjilongo, have mu pa Paulus. 34Omutumini hiaa tanga omukanda nahiaa pula okutya Paulus wa dha kotjit̯indwalongo patji, wa mona okutya Paulus wa dha koKilikia. 35Omutumini we mu heela ha tyaa: “Me hala oku ku teelela, ovakondjethi woye himave ya wo.” Omutumini wa popya okutya Paulus nga yungilwe mombala yohamba Herodes.
Цяпер абрана:
Ovilinga 23: DBNT
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Dhimba New Testament © Bible Society in Namibia, 2010.
Ovilinga 23
23
1Iya Paulus wa tongolola ovanene wOtjoongi ha tyaa: “Valumentu vakwetu! Ame momutima wandje kotjipala tjaKalunga katee ndino hendi kamu na tja okatodhi.” 2Iya omuyambethi omunene Ananias wa heela ovantu mboka mbava kulamene popedhi naPaulus, ve mu tone kotjinyo. 3Paulus we mu heela ha tyaa: “Tjimato ove otjipembadhi hitja thethungulwa kombanda! Kalunga me ku tono. Ove wa kala pohi mpoka, u nkoye moveta, iya ove omwene oove wa lundha oveta himo heele ovantu va ntone!”#Mat. 23:27-28
4Ovalumentu mboka mbava li popedhi naPaulus, ve mu pula hava tyaa: “Mo penye omuyambethi omunene waKalunga?”
5Paulus we ve yaka ha tyaa: “Vakwetu! Ame hí tji i okutya omuyambethi omunene, mena lyokutya omisonekwa vi tya, hó popi navi omutumini wotjiwan̯a tjen̯i.”#Eks. 22:28
6Iya Paulus hiaa mono okutya vamo va li Ovasadukai novakwawo va li Ovafarisai, wa popya unene peulu mOtjoongi ha tyaa: “Valumentu vakwetu! Ame ndjiMufarisai omunOvafarisai. Me koywa, mena lyokutya mba itavela okutya ovat̯e mava ka imuka.”#Ovil. 26:5; Filp. 3:5
7Iya Paulus hiaa dhi pokupopya nyahi, Ovafarisai nOvasadukai va uta okulitetha ombata, Otjoongi hatji liyapauka modhombinga mbali. 8Ovasadukai va li amava tyaa: “Ovantu kaava ka imuka kout̯e, kaku na omweengeli ne ombepo.” Iya Ovafarisai ovipuka hembi avihe ve vi itavela.#Mat. 22:23; Mark. 12:18; Luk. 20:27 9Iya va tona otjuuyila otjinene, ovalongiveta vamo owomopaati yOvafarisai va tetha unene ombata, hava tyaa: “Nt̯e katu mwene mo ouvi watja momulumentu hengu. Pamo wa popithwa kombepo ne komweengeli?”
10Odhombata hidha londo peulu, ondjai yovita ya li amai tila okutya pamo ovantu mava tono Paulus. Iya ondjai ya heela ovakwavita, va ka ithe mo Paulus mokati kowingi wovantu, ve mu twale kokamba yawo.
11Iya otjit̯iku soka Muhona Jesus we ya puPaulus ha tyaa: “Likolethela! Ngahi wa ntjipulula moJerusalem, ngatjo u ka ntjipulula nomoRoma.”
Ovajuda mava hala okudhipaa Paulus
12Iya hikwa tji Ovajuda va panga ompango, hava ana okutya kaava li wo kaava nu, tainkolo háveya dhipaa Paulus. 13Ovalumentu mbava pangele ompango hendji, va pon̯a omilongo vine. 14Va ya kovanene nokovayambethi ovanene hava tyaa: “Nt̯e twa ana okutya katu na himatu lolo, tainkolo hátuya dhipaa Paulus. 15Iya n̯e nOtjoongi tjOvanene tumen̯i elaka kondjai yovita okutya ngava ete Paulus kun̯e, n̯e mu ngale mamu hala okumona mo uke ounongo umo muye. Iya nt̯e twe lilongekedha oku mu dhipaa, tainkolo héye thika kun̯e.”
16OmuthiaaPaulus hiee tji tee otjokudhipaa Paulus, wa ya kokamba oku ka heela Paulus. 17Iya Paulus wa ithana omunene wovakwavita umo, he mu heele ha tyaa: “Twala etele hendi kondjai yovita, mena lyokutya u na hime ke mu heela.” 18Wa twala etele kondjai yovita, ha tyaa: “Onkwatwa Paulus ya ndjithana, hai nkumbu ndji ete etele hendi kwoove, mena lyokutya u na hima hala oku ku heela.”
19Ondjai yovita ye mu kambula mokuwoko, hai mu twala pokampengi, hai mu pula hai tyaa: “Mo hala okuntjeela tji?”
20Etele lye mu yaka hali tyaa: “Ovanene wOvajuda va tanta okuya oku ku kumba, komuhuka u tume Paulus kOtjoongi tjovanene, mena lyokutya mava hala okumona mo ounongo muye. 21Iya alikana himava popi, hó tji ningi, mena lyokutya pe na ovalumentu mbava pon̯a omilongo vine, mbava vandele Paulus. Iya wo va ana okutya kaava li, wo kaava nu, tainkolo háveye mu dhipaa. Iya napano mava kevelele vala kwoove okutya mo tya vi.”
22Ondjai yovita ya heela etele hai tyaa: “Hó tji hipululile omuntu noumo okutya otjipuka hehi we tji ntjeele.” Iya ye he mu lekele, a ende.
Paulus ma twalwa koKesarea
23Iya ondjai yovita ya ithana ovanene vavali wovakwavita, hai ve heele hai tyaa: “Longekedhen̯i ovakwavita wopohi omathele avali novakwavita wodhonkambe omilongo epanduvali novayumbi womaonga omathele avali, va ende koKesarea. Iya lilongekedhen̯i okukulama powola yomoovi wokout̯iku. 24Iya longekedhen̯i odhonkambe humaku ka kavila Paulus, n̯e mu mu twale kuFeliks, omutumini wotjilongo.” 25Iya ondjai ya soneka omukanda mbumau tyaa hinyahi: 26“Klaudius Lisias ma meneke omutumini wotjilongo, omutumbalekwa omunene Feliks. 27Omulumentu hengu, wa kambulilwe kOvajuda, ambala ve tje mu dhipaa. Ame mba ile ko novakwavita vandje, he mu amene himba tee okutya Omuroma. 28Iya ame mba li ame hala okwiiwa himave mu kondjethele, he mu tumu kOtjoongi tjovanene vawo. 29Mba mona okutya ke na hiaa ninga hitja thele oku mu dhipaetha ne oku mu twiitha mokaliwoso. Iya nan̯i wa li ama kondjethelwa vala ovipuka vimo mbii na tja noveta yawo. 30Iya himba heelwa okutya ku na Ovajuda vamo mbave mu vandele, mbe mu tumu kwoove dhivadhiva. Ame he heele wo mbamave mu kondjetha okutya ngave mu kondjethele kotjipala tjoye.”
31Ovakwavita va itha po Paulus ngahi va heelwa. Otjit̯iku tjatjo soka otjo ve mu twala koAntipatris. 32Iya ngamuhuka ovakwavita wopohi va tjuna kokamba yawo, hava yetha ovakavili wodhonkambe va thindikile Paulus. 33Iya wo hive ya moKesarea, va yandja omukanda komutumini wotjilongo, have mu pa Paulus. 34Omutumini hiaa tanga omukanda nahiaa pula okutya Paulus wa dha kotjit̯indwalongo patji, wa mona okutya Paulus wa dha koKilikia. 35Omutumini we mu heela ha tyaa: “Me hala oku ku teelela, ovakondjethi woye himave ya wo.” Omutumini wa popya okutya Paulus nga yungilwe mombala yohamba Herodes.
Цяпер абрана:
:
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Dhimba New Testament © Bible Society in Namibia, 2010.