San Lucas 2
2
Jesús nefwajh iche
(Mt 1.18-25)
1Hop fwalas tojh pajhche, Romano lakaniyat Augusto icheta che yenlhi censo tojh ihi nufwu hunhatilh. 2Wit lawhoytsu, tojhp'ante yenlhi censo tojh tachen, Quirinio niyatejp'ante Siria. 3Nufwu lhamilh watlok yopleñhen hop hunhat tojh law'etespej yomthilak ilesaynhen lheyis.
4Hop tojh tamenej José yikch'uya Nazaret tojh ihi Galilea, wit yihuye Belén, tojh ihi hunhat tojh lhey Judea, tojhp'ante niyat David nichotchohi, latesej tojh José hope elh tojh David lapiynek elh. 5Yihuye hunhattsu yomthilak ilesaynhen lheyis, lhoy'a María, tojh hope lach'efwa tojh hich'utshanp'ante. 6Wit tojh ihip'ante Belén, yomhu lawhoy tojh María iwulhosa. 7Wit tojh nichotcho lhos tojh lachenkatsek, ikofwlejche sak'al lhip wit imoyen, itihi tshotoy lhokhi latesej tojh lajh law'et elha.
Dios chenhay lhoy'a tsun'ataswus
8Tojh katut'aye Belén ichep'ante tsun'ataswus tojh ihi alhu itetshanlhi hunajhche laloy. 9Tojh pajh t'iseltej ángel tojh Dios chenek lhin'olit, wit Lhawekw laka'isi yihetenpe lhamilh; wit wefw tojh nuwañhen. 10Tha ángel tojh Dios chenek yuk:
–Yajh nuwañhen, n'chojh ameñhen tolhomet tojh is hopkhilak nufwu tojh lakojhyajh ihi. 11Fwalana tojh ihi David p'ante law'etes nichotcho hop Tofwaynthi, hope Lhafwaynthi tojh Dios Chenek wit Lhawekw. 12Wit latetnek, hopkhila tojh amilh law'enla hop han'ofwajh tojh yikofwlejche sak'al lhip wit ihi tshotoy lhokhi.
13Yufwajhkwet, wefwpe iñhojh ángel lhayis tojh Dios chenhay n'oleñhen tojh ihi pele wit inokwiyej Dios wit yuk:
14"¡Lawefwyajh ihi Dios tojh ihi pele,
wit latamsek ihi hunhat wit Dios lakopfwayajh iyej lakawichi!".
15Wit tojh ángel lhayis tojh Dios chenhay yichhen yopleñhen pele, tsun'ataswus iwutesa tojh lhatahuyeshen tojh yuk:
–Achum, nahuye Belén, nat'eye mak tojh Lhawekw ifwelnamhuhen.
16Wit tsun'ataswus yichhen ilofwenhen tojh yihuye Belén, wit hiw'en María lhoy'a José wit han'ofwajh tojh imofwajh tojh ihi tshotoy lhokhi. 17Tojh hiw'en, ifwenhu mak tojh ángel tojh Dios chenek yihantej lhamilh tojh yomey han'ofwajh, 18Wit nufwu lhamilh t'iselteshen tojh ilota mak tojh tsun'ataswus yomeñhen. 19María t'amajhej nufwu mañhayna wit itihi lahesek, wit itilhamej. 20Tsun'ataswus tapilhchehen wit lakojhyajh ihi wit iwefwyen Dios hop mak tojh hiw'en wit ilota, molhyej tojh ifwenhumchemathi lhamilh.
Han'ofwajh Jesús titofwnhatej Lhawekw Dios
21Tojh yomhu ocho fwalas lhamilh tachema han'ofwajhna yenejlhip'ante totetnek tojh toyiset lhu t'ojh lhip, wit yenlheya Jesús, lheytsu hop ángel tojh Dios chenek pajhche ifwenhu María tojh watlok yenlheya lhos tojh ihikla.
22Tojh yomhu lawhoytsu tojh tafwaytshi cuarenta fwalas tojh Jesús iche, ne iwusey tojh lhukwey iwut'amajhcheta, ne watlok yenlhi Moisés latetnek tojh iwumeshenp'ante latetselh, hop tojh tachema han'ofwajhna yihoney Jerusalén wit itofwnhatej Lhawekw Dios. 23Iwuynesheytsu han'ofwajhna hoptojh tilesaynhip'ante Dios laka ley tojh yuk, "Han'ofwajh tojh lachenkatsek wit hin'u watlok titofwnhatej wit iwut'amajhchetayej Lhawekw." 24Wit yichhen iwutaw'añhata'pe hoptojh yihonlhi Dios laka ley p'ante tojh yuk, "Chojh lusas hukwinatajhles wuyche lusas pup."
25Fwalas p'antetsu iche hin'u tojh lhey Simeón tojh law'etes Jerusalén. Hope hin'u tojh is alhuhu wit lhaykhajhyenej Lhawekw Dios laka ley wit tataya che Lhawekw Dios inech'aynhi hop Israel. Espíritu tojh T'amajhchet iyejp'ante Simeón, 26wit yihantej tojh ha'ihi chek ilehisha hunhat yomthilak hiw'enlo ayej hop Tofwaynthi tojh Lhawekw Dios ichenhiyla. 27Dios laka Espíritu tojh T'amajhchet yikchefwi Simeón yihoney Dios Law'et; hote han'ofwajhna lhukwey yihoney Dios Law'et hopkhilak yihonlhi ley p'ante tolhey Moisés. 28Simeón tachemlo han'ofwajhna wit inokwiyej Lhawekw Dios, wit yuk:
29"Athana, N'wekw Dios, mat omet p'ante lawumn'uyej,
athana iwusey che n'lham, tojh n'hope akawu,
n'leyej hunhat wit n'tamsek ihi.
30Hoptojh n'w'enlo tofwaynyajh
31tojh lathat alhuhu wit nufwumma wichi tojh hiw'enlaynlo.
32Lham hopkhila laka'isi tojh yihetenla'pe nufwu wichi tojh i'pe hunhat
wit hote hopkhila akawichi Israel lhayis lawefwyajh".
33Lhukwey tach'ahuya wit t'iseltej Simeón lhomet tojh yomeshey han'ofwajh. 34Simeón ileyej tojh itiyej lakopfwayajh hop lhamilh, wit ifwenhu María, han'ofwajh laku, wit yuk:
–Lajh yahin, han'ofwajhna hopkhila elh tojh ifwaynthihena iñhojh wichi tojh ihi Israel wit ihikla iñhojh tojh lham ha'ifwaynthihen. Lham hopkhila elh tojh lhayentotetnecha wit nitokw wichi tojh tataynlaynlo, 35hopkhila elh tojh hin'olthila'pe wefwpe wichi latichenhayajhay. Wit nufwu tojha hopkhila mak tojh ilonla am wit wefw tojh oytajhila, hotenlawuye che titshoneshu ahesek mak tojh y'ey.
36Hote iche tsinha tojh ikfwi Dios Law'et lhey p'ante Ana, Penuel lhose, lham tolhlo Aser lakawichi. Hope tsinha tojh hich'et. Tawhayeyp'ante tojh kamajh lhetshafwajh, ihip'ante siete yacheplis tojh iyej lach'efwa; 37wit ihi ochenta y cuatro yacheplis tojh lham hope tesa p'ante. Hop tsinha tojh ha'ihi chek neyakfwi Dios Law'et, nufwu fwalas wit hunatsipej inokwiyej Lhawekw, lhicheyhat wit hote iwut'alhyajha. 38Ana yihuhoye wit yakha laka gracias Lhawekw Dios wit yomejlhi Jesús wit ifwelpe nufwu tojh inifwlhi elh che ifwaynthila Jerusalén.
Jesús lhoy'a lhukwey yopley Nazaret
39Wit tojh lapesey tojh iwuye nufwu mak tojh Lhawekw laka ley yikalelhot, tapinhu law'etes Nazaret tojh ihi Galilea. 40Wit lhos lhaychiñhelit wit ne t'enche, wit lham ne tapuyeshej lahanyajh wit Dios lakopfwayajh iyej.
Jesús tojh han'ofwajh tiw'en ikfwi Dios Law'et
41Jesús lhukwey yihuyepej Jerusalén nufwu yacheplis tojh iwukojhyajha'pe Paskwa. 42Wit tojh Jesús yomhu doce yacheplis, molhyej lakeypej, nufwu lhamilh yihuye Jerusalén. 43Tojh tafwaytshi fwalastsu, wit tojh yopley law'et, Jesús imolhehi Jerusalén, wit lhukwey hayihanhiynlo. 44Wit yeneyche Jesús lhahi wichi tojh yichhen tolhey tojh inaynthajh yomet hunajhej; tojh lapesey, t'ekwe tay'otnahen law'et lheley iñhojh wit y'isej iyayney latofwnhay iñhojh tojh ihoye. 45Tha niw'ena. Tojh lapesey yopley Jerusalén wit t'ekwe lhos.
46Tojh yomhu tales fwalas nech'afwajh hiw'en Jesús tojh iyej Dios Law'et, wit tatayphohi tochefwenyajhwus lachuwej. Wit lham tach'ahuya wit hote tay'otshana lhamilh. 47Wit nufwu tojh ilota Jesús t'iseltej mak tojh yihanej wit nichelhu mak tojh iñhojh tay'otshana. 48Wit lhukwey t'iseltej tojh hiw'en, wit laku yuk:
–N'lhos ¿hats'iyej lawuhaynejn'uyeshen tojha? Afwcha wit n'lham n't'e amkwe, wit mattojh n'lhel'i ihiche.
49Tha Jesús nichelhu tojh yuk:
–¿Hats'iyej amilh lat'ehan'ukwe? ¿Tik kahanyeshen tojh n'lham watlok n'tetshan N'fwcha lachefwenyajhay?
50Tha lhamilh yihanhijpahote mak tojh lham yomey.
51Tojh lapesey Jesús yikche lhukwey wit yopley Nazaret, wit mattojh tach'ahuya lhukwey. Laku itilhamhi nufwu maknajh tafwaytshi. 52Wit Jesús lhaychiñhelit wit lhichiñheltej lahanyajh wit Dios lhoy'a hin'ulh lakopfwayajh iyej hop lham.
Цяпер абрана:
San Lucas 2: WBNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Nuevo Testamento en Wichí del Bermejo © Sociedad Bíblica Argentina