Mako 7
7
Emikiirokiiro gyʼaBayudaaya
(Mat 15:1-9)
1Awo aBafarisaayo nʼabamwei oku beegesya bʼamateeka ga Kiyudaaya abaaligire e Yerusaalemu, ni bakumbaanira oYesu waali, 2ni babona abamwei oku beegesebwa baamwe nibakuliisya engalo eziteezeibwe, nikwo okukoba, nibatazinaabirye nkʼemikiirokiiro gyʼaBayudaaya nigiragira. 3ABafarisaayo nʼaBayudaaya abandi boona boona, baakwatanga engeso yʼabazeiza baabwe eya butalya batamaare kukola murwa gwa kunaaba mu ngalo. 4Era nibaabbanga baligire omu katale tibaalyanga nibatamaare kweyerya#7:4 Omu biwandiiko ebindi mulimuByebaiyanga omu katale nga tibabirya, okutoolaku nibamaare okubyerya.. Baalina emikiirokiiro egindi gingi gyebaakwatanga, nkʼokwoza ebikopo, ebibya nʼebinaga ebya kikomo. 5Awo aBafarisaayo nʼabeegesya bʼamateeka gʼaBayudaaya ni babuulya oYesu bati, “Lwaki abeegesebwa baamu tibasengeerya mikiirokiiro gyʼabazeiza baiswe, okulya emere engalo zaabwe ziteezeibwe?” 6OYesu nʼabairamu ati, “Bagobya nywe, oIsaaya byeyabalangireku biikire nti,
‘Abantu bani bantaamu ekitiinisya mu bigambobugambo,
baitu emitima gyabwe tigindiku.
7Nʼengeri gyebandamyamu ginyamburamu,
kubba ebigambo ebyʼabantu, nibyo beegesya nkʼamateeka gange.’#Isa 29:13; Eze 33:31”
8Era nʼabakoba ati, “Muleka ekiragiro kya Kanca, ni mukwata emikiirokiiro gyʼabantu. 9Mukulowooza mukola kusai okunaga ekiragiro kya Kanca ni mutaawo emikiirokiiro egyanywe oku bwanywe. 10Ekyakuboneraku: oMusa yalagiire ati, ‘Oiteewo nʼomaawo obatangamu ekitiinisya,’#Kuz 20:12 era ati, ‘Eyaakuzumanga oite waamwe oba onyina, ateekerwe okwitibwa,’#Kuz 21:17; Lev 20:9 11baitu nywe mukoba nambu omuntu nakoba oite waamwe oba onyina ati, ‘Kyenaakukuwaire okukujuna, kifookere Korubbaani,’ (ekimanyisya nti kiwongerwe egiri oKanca), 12obwo mubba mutacaamwikiriza kubbaaku kantu gonze akamwei kaakukoora oite waamwe oba onyina. 13Nimwo ni mudibya mutyo eiteeka rya Kanca leke musengeerye emikiirokiiro gyanywe egyemwegesya. Era mukola nʼebindi bingi ebya ngeri nkʼeyo.”
Ebisiisa omuntu
(Mat 15:10-20)
14Awo oYesu nʼairamu nʼayeta ekibiina kyʼabantu okwiza waali. Nʼabakoba ati, “Mumpuliirye nywena nywena era mweteje kini. 15Ndoowo ekingira omu muntu ekimufoola ‘ateezeibwe,’ okutoolaku ekyo ekimuligamu. [16Niwaabbaawo alina amatwi aga kuwura, awure.”]#7:16 Ebiwandiiko ebimwei ebya irai tibirina lunyiriri luni. 17Obwo nʼaleka awo ekibiina kyʼabantu, nʼaingira omu nyumba. Abeegesebwa baamwe ni bamubuulya amakulu ga lufumo. 18Nʼabakoba ati, “Naanywe timukyetejerye? Timukubona nti omuntu byalya ti nibyo bimufoola ‘ateezeibwe?’ 19Ebyakulya tibingira mu mutima gwamwe, baitu byaba mu nda, mwebirigate ni biwuluka.” (OYesu okubaza atyo, yalangire nti ndoowo byakulya, abantu byebateekwa okuziza). 20Era nʼakoba ati, “Omuntu byakola nʼebyabaza, nibyo bimufoola ‘ateezeibwe,’ 21kubba omu mutima gwa muntu nimwo muliga ebirowoozo ebibbi: obukaba, obwibbi, obwiti, 22obusiiyani, okwegomba okubbi, okukola ebikolwa ebibbi ebya buli ngeri, obubeyegi, obugwenyuki, obwiya, okuwangiirya, okwekudumula, nʼobugwagwa. 23Ebibbi bini byona byona biriga mu mutima, ni bifoola omuntu okubba ‘ateezeibwe.’”
Omukali eyaalina okwikiriza
(Mat 15:21-28)
24OYesu niyaligire awo, nʼarola omu kitundu ekyerereire ekibuga oTiiro#7:24 Ebiwandiiko ebimwei birina: “oTiiro nʼoSidoni.”, nʼabba omu maka agamwei, nʼatayendya bantu bamanye, baitu nʼatasobola kwebbisa. 25Waaliwo omukali eyaalina akaara kaamwe akaaliku omuzumu. Niyawuliire amawuro agakufa oku Yesu, amangu ago nʼayaba waali, nʼakubba amajwi ampi nʼamagulu gaamwe. 26Omukali oyo tiyaali Muyudaaya. Yaali mubyale wa Foinisiya ekya mu nsi ya Siriya. Nʼasaba oYesu apeke omuzumu oku kaara. 27OYesu nʼamwiramu ati, “Leka abaana nibo beekeere okulya baikute, kubba emere yaabwe tikisai okuginagira embwene.” 28Omukali nʼairamu oYesu ati, “Baitu nʼembwene nizibba ansi wa meeza, zirya oku obukunkumukire okuliga oku mere yʼabaana.” 29OYesu nʼamukoba ati, “Olwa bigambo bini byoiremu, weiriireyo eka, omwara waamu omuzumu gumuligireku.” 30Omukali nʼairayo eka nʼasanga omwara nabbasirye oku kitabu, era omuzumu nigumuligireku.
OYesu akutamba okiigara
31Awo oYesu nʼaliga omu kitundu ekya Tiiro, nʼarola oku nyanja ya Galiraaya, nakwakala omu bitundu bya Sidoni nʼoDekapooli.#7:31 Dekapooli Amakulu gaakyo, Ebibuga eikumi. 32Ni wabbaawo abakumuleetera okiigara era eyaali takusobola kubaza kusai, ni bamusaba amukwateku 33Awo oYesu nʼaiya omuntu oni omu kibiina kyʼabantu, nʼamwirya oku ntando, nʼamuta ebyala omu matwi, ni yeecwa ebicwantai oku byala, nʼamukwata oku rulimi. 34Nʼaimula amaiso egiri eiguru, nʼaica ekinkoowe, nʼakoba omuntu oyo ati, “Efata”, ekimanyisya nti, “Iguka!.” 35Awo amatwi gaamwe ni gaiguka, nʼenkolokolo ya rulimi lwamwe nʼesandabuka, nʼatandika okubaza okusai. 36OYesu nʼakunkuniza abantu kini obutakisubiiraku bandi. Baitu gyeyakangirye okubakunkuniza, bote nigyo baakangirye okukyalalanirya kimwei woona woona. 37Abaakiwuliire boona boona ni bawuniikiira muno, nibakukoba bati, “Byakakoore byona byona bisai; ababbaire abaigali ba matwi, abasoboleserye okuwura, ababbairete abakibbubbu, nʼabasobolesya okubaza.”
Цяпер абрана:
Mako 7: RUULI-NYALA
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце