Matáyoso 5
5
Gugál gá Yésu agá nɔgɔnd
(Mál 3.13; Lúk 6.12-13,20)
1Yésu máal wánaan giŋi bá band, uwenélukúmín agá nɔgɔnd ugumuana. Bafɔ́nɔfɔ́n bág abábɛ́sɛdɛnɛn wɔ́. 2Uwɔ́ gugɔ́l gugál uwɔb gá gúfúnyifunyi bɔ́ wɔyɔ ká:
Bese wá band bánɔ́baná agá gɛdɔŋ gá námuana
(Lúk 6.20-26)
3«Bese giod na ebe bálɛ́nsaná ká bádɛ́bá ta buanda agá eŋís yá Gɔdányá, Bufuŋ bá muana guɔ́bɔnɛn bɔ́.
4Bese giod na ebe bábáŋaná, Gɔdányá gobómbidonyi ɛdɛm sɔɔ́b.
5Bese giod na ebe bányá na ɛdɛm yédududu, bánúdáŋáb gus gá ndán.
6Bese giod na ebe bánɔ́mana nsana na nɛɛ́da na manda manyá busi Gɔdányá gaal ká bódúgoon.
7Bese giod na band bányá na mahan, Gɔdányá gáan bɔ́ sɔ́n mahan.
8Bese giod na ebe bányá na ɛdɛm begubegu, bánuán Gɔdányá.
9Bese giod na ebe báganá bumbén gadágadá wɔbɔ, bágabɛ́laan bɔ́ ká baan bá Gɔdányá.
10Bese giod na ebe ɔbɔ́ band bóndodi genúsésenyi bɔ́ góbusió bá busi, Bufuŋ bá muaná guɔ́bɔnɛn bɔ́.
11Bese giod nanɔ gigúl bánúsɛ́ganá, bénúnusenyi bónd, bánúsɔ́mban biád bá móony gidigid gámɛ góbusió. 12Ánɔbá bese agá bɛdɔdɛn, gágual ká, bɛnama baán nyɛ duúmé ugumuana; anaány béméesésényí mubús má Gɔdányá múmáakɛ́n gaán.
Na nigɔb na gise
(Mál 9.50; 4.21; Lúk 14.34-35; 8.16; 11.33)
13«Bánuá nunyɛ nigɔb ná gus. Nigɔb mén nidiánd gusima nanyá nínyá ná guand gubá nigɔb e? Nídɛguánd gudúgúne ta gá buanda. Bóguódo nɛ́ agá ɔɔnd, band bínde nɛ́.
14«Nunyɛ gise gá gus. Bɔ́diguɔ́sɛgɔɔn tísɔn gigúl unyá afuágán agá nɔgɔnd. 15Anaány sɔ́n bádiábáná báguág lámba yoóg ká bábɔgɛn wɔ́, bágɔ́dɔ́ŋa wɔ́ ká údegenyi gians gidigid. 16Nɛnama nímoom, nsɛ́ gise gaán ségéde agá eŋís yá band nɛnama nɛ́nyá ká bámánan bɛnɔg baán bá bielínyélínyé, bégúmenyi sié wanɔ unyá ugumuana.
Na Yésu na bisele
17«Nudɛbɛ́dága ká, nguúl gá gúsiélí bisele bá Moyíso, gúmén ubú mubús má Gɔdányá méenúfúnyífúnyí: ndíguúl gá gúsiélí bɛ́, nguúl gɔg gá gúsifuógí bɛ́. 18Agá meliŋítas ngúnuɔ́yɔɔn ká: ta buanda búdiínuélíki agá bisele, ta mɔɔn wa ɔnyɔ́ŋ, guám anyɛ́ na gus na muana númánaná, ány gɔg manda gidigid gonúbífuógi. 19Kányɛ gúnyá, ewe únuélénye gisele gá siɔdɛd agá bisele, wondo ufúnyifunyi band ká bébígédenyi wɔ́, ugabá siɔdɛdɛdɛd agá Bufuŋ bá muana; ewe ugonúfuogi bɛ́, wond ufúnyifunyi bɛ́, ugabá gianta agá Bufuŋ bá muana. 20Ngúnuɔ́yɔɔn ká: Númaál nudɛládáan bisele gudɔ́mb bóŋ bisele na Bafalisiɛ́ŋ, nudínúbiá eluku agá Bufuŋ bá muana.
Na muɔ́nɔ́n na nɛlad
(Mál 11.25; Lúk 12.57-59)
21«Numɔ́ɔbɔɔ́n anyɛ́ bɔ́mɔ́ɔyɔɔ́n band bá nsua ká: ɔdiɔ́n mɔnd, ewe únuɔ́nɔnɔ́ mɔnd, ugadɔ́mb agá nɛgál. 22Yaŋuá nŋunuɔyɔɔn ká: ewe usɔɔ́guɔ́bɛ́n endimen wagá ilób, gadɔ́mb agá ɔlɔŋ wá besúmb bɛsan bá Beyúdɛn; ewe uságusɛgɛd endimen waga ká: “Nnyam eye” ugadɔ́mbɔ agá nɛ́kál ɛnɛgɔn; ewe wɔyɔnɔ gá endimen ká: “ɔduɔ́-duɔ” ugúyɛgɛmanan ká béti wɔ́ agá gɛgɔ́lɔ́gɔ́dɔ gá yoóg idiéfuénéné. 23Gɛsɛgɛl amánɔ́b gá guéŋin bɛbiág agá kɔɔ́m béŋené Gɔdányá bɛbiág, ámábɛ́dágɛd ká nunyɛ gidié na endimen wɔ́w gá bɔbɛ umáaguála wɔ́, 24nɛ́ɛn bɛ́ ány agá kɔɔ́m agany, ábɛ́dábɔ́n naga, ád gusiéŋín Gɔdányá bɛbiág. 25Ámábianan gɛsan na ɔmbɛ́lɛmbɛ́l wɔ́w, ambɛ́d giás gáguál ká nuɔ́bɔɔn naga numányɛ agá nŋili naga; gɔdɔ́mb ká ɔmbɛ́lɛmbɛ́l wɔ́w ógudóŋínyí aga osúmb bɛsan, uwɔ́ wégudúmbí aga isia ká yéguétí agá gians gá mbíné. 26Agá meliŋítas nŋúnuɔ́yɔɔ́n ká, adɛ́nuám kɔ́ kand ká amásuá ofini uwaány kɔ́ŋɛ́l.
Gɛdáŋa na bɔbɛ
(Mat 18.8-9; Mál 9.43,47-48)
27«Numɔ́ɔbɔɔ́n bɔ́yɔɔn band bá nsua ká adiál gɛdáŋa. 28Yaŋuá nŋúnuɔyɔɔn ká: Ewe uségubísésidenyi agany sɔ́gɔ agág gá ɔdɛm, úmámán gual gɛdáŋa agág gá ɔdɛm na agánd uwaány.
29«Niís nɔ́w ná ɔmbɔ́g ɔnɛ́m mágudɔ́man gáguala bɛfal, bál nɛ́, ómb nɛ́ ayáyá nɔw: gágual ká búnyɛ bese nɔ́w ká buláŋ bɔ́w búmoom nyím, gɔdɔ́mb ká nuɔ́l nɔ́w gidigid biéti agá gɛgɔ́lɔ́gɔ́dɔ gá yoóg yá kand nɛmanɛ́ná. 30Ɔmbɔ́g wɔ́w ɔnɛ́m mágɔdɔ́maan gáguala bɛfal, sɔ́mbɔ́ wɔ́ ómb wɔ́ ayáyá nɔw: gágual ká búnyɛ́ bese ká áyɛ́n buláŋ bɔ́w búmóm, gɔdɔ́mb ká nuɔ́l gidigid áb agá gɛgɔ́lɔ́gɔ́dɔ gá yoóg yá kand nɛmanɛ́ná.
Guen agany waga
(Mat 19.7-9; Mál 10.4-5,10-12; Lúk 16.18)
31«Kɔɔ́m góndodió, bámáand guɔyɛd ká: Mɔnd mamba gukɔ́ŋɛd agany waga, ugúbianan ká ufá wɔ́ mbɔbɔnɔ yá gukɔ́ŋɛd wɔ́. 32Yaŋuá ngúnuɔ́yɔɔn ká: Mɔnd gidigid uságukɔ́ŋɛd agany waga kand ká umáal gɛdáŋa, umádɔ́m wɔ́ ká wál gɛ́; mɔnd omodió sɔ́n mégiŋ agánd uwaány umáal gɛdáŋa.
Gubɛ́lia
33«Unuand guɔ́b anyɛ́ bɔ́mɔ́ɔyɛ́dɛ́n bagɔn ká: Odióndo na gélem ɔgɔ́w gá bɛbɛ́lɛɛ́n, fuógónyí gɔɔ́gɔ́ bɛbɛ́lɛɛ́n bɔ́w ogóbusió bá Ɔgúnɔ́. 34Yaŋuá ngúnuɔ́yɔɔn ká nudɛ́bɛ́liá busió bum, ta agá ɔfɛ́n wá muana, gágual ká gúnyɛ́ buufe bá Gɔdányá, 35ta agá ɔfɛ́n wá gus gágual ká gúnyɛ́ nɛdágɛ́n bɛgɔnd bág, ta agá ɔfɛ́n wá Yelúsalɛm gágual ká unyɛ tísɔn wá gianta gá ofuŋ 36Ádɛbɛ́liá sɔ́n ká imódóŋínyí ɔduɔ́ wám, gágual ká adɛ́bá wóguondi ta oŋído ómoom ofiídid gúmén fúuum. 37Númágála ɔ́nuɔyɔ́ ká: “nŋɛɛ́ɛ” gúmén “ágó”, moóló mónd gúlenin aga ebéndibénd.
Gibiondio
(Lúk 6.29-30)
38«Numɔ́ɔbɔɔ́n bɔ́yɔ ká: mɔnd máguád niís, ád wɔ́ sɔ́n nág, mɔnd mágubál niíny, bál wɔ́ sɔ́n nág. 39Yaŋuá ngúnuɔ́yɔɔn ká, mɔnd mágual giád gá buanda, odibíondí wɔ́. Mɔnd mágusáb ɔmbɛl agá nuás ná ɔmbɔ́g ɔnɛ́m, diyé wɔ́ sɔ́n nuás núndodió. 40Mɔnd mámba gugɔban aga osúmb bɛsan ká úgɔ́l gɛla gɔ́w gá nagadá, tɛ́nɛ́n wɔ́ sɔ́n gɛla gá muana. 41Mɔnd mágugɔ́d ká ánda mfándia nɔns, alá dɔns duándɛ nɔ́w naga. 42Éŋín ewe uguɔŋɔnɔ́, ewe uguófonó giɔl, ediém wɔ́.
Ɛlɛ́ga gá bambɛ́lɛmbɛ́l
(Lúk 6.27-28,32-36)
43«Numɔ́ɔbɔɔ́n bɔyɔ ká: Lɛ́gá sɔ́g mɔnd a, abɛɛ́lá ɔmbɛ́lɛmbɛ́l wɔ́w. 44Yaŋuá nŋúnuɔ́yɔɔn ká ánɔ́lɛgá bambɛ́lɛmbɛ́l bán nuondo, nubísógólónyi góbusió bá ebe bénúgényígenyé, 45Anaány nugabá baan bá Sié wanɔ unyá ugumuana, gágual ká uguémenyi ɔɔny gá mɔnd gidigid, ta bá bese, ta bá bɔ́bɛ, wond ugusenyi nɔbɔl aga ebe bányá besi na ebe bányá babɛ, 46gágual ká, númálɛ́ga ebe bánɔ́lɛ́ganá, nugadáŋáb giág e? Ta band béduénene taás báguála nɔ́ sɔ́n. 47Númébígéligeli sɔ́n gɔɔ́gɔ belimen baán, giág nualaná gá gúméŋemeŋ, bɛndiádábá dɛguála nɔ́ e? 48Banuá gɔg, ánubá mbanda, anyɛ́ Sié wanɔ unyá ugumuaná nyá agúnínan.
Цяпер абрана:
Matáyoso 5: MMU2
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце