Ansa 26
26
1Tsu na u gaꞋan o yoꞋo mini ma atali
a makyan ma usuɗukpi ba
ko mini ma̱ Ka̱shile
a makyan ma vukyaꞋa ba
ta feu nannai u u gaꞋan e neke kalau tsugbayin ba.
2Una̱wuya wi a̱ ku ka̱na̱ wu ko unushi ba,
wi ta tsu mbeɗukule n na n ci imkpa gaɗi,
a̱ cipa̱ a iɗika ba.
3A yaꞋan ta̱ mashashau adama o kodoku,
mojubo kpamu adama majaki,
ama kalangu adama a alau.
4Ka̱ta̱ vu ushuku kalau a ukuna u tsulau ci ni ba,
talo vo ko okpo ci ni.
5Ushuku kalau, derere n tsulau ci ni,
talo we ku ene ka̱ci ka̱ ni vuza vu cicoꞋo ɗa.
6Yaba dem vu na u suki kalau n akaka
wi ta̱ tsu vuza vu na u gbatyai njuvu n ene a̱ ni,
ko vuza vu na u la̱nsa̱ka̱i kaci ka̱ ni atakaci.
7Ansa a̱ una̱ u kalau i n ulinga ba,
tsu ene a̱ ma̱kutsuma̱ a na a̱ ka̱ta̱la̱i.
8Uteku tsu na a kushiya katali a̱ ka̱vimgba̱tsu ba,
ta kaꞋa ki nannai kuneke kalau tsugbayin.
9Ansa a una̱ u kalau,
i ta̱ tsu kawana e kukiye ku kosoꞋi.
10Tsu na katain ka taku ayaꞋa
adama a na u uka uma usa̱n kavama,
ta nannai vuza vu na u ɗikai kalau ulinga,
ko vuza vu na u ɗikai aza a na i a uye wu nwalu.
11Uteku tsu na mesheꞋe ma tsu bono me peɗe ashama a̱ ni,
ta kalau ko tsu bonosuko tsulau ci ni nannai.
12U laꞋa ta̱ kalau n gbani-gbani
adama a na wi ta̱ n a̱pa̱Ꞌa̱,
n vuza vu na wi e ku ene ka̱ci ka̱ ni
wi ta̱ n cicoꞋo.
13Korogo ka tsu dana ta̱,
<<Kawu wi ta̱ ɗe a uye,
kawu va asuvusuɗukpi a̱ ka̱ka̱ra̱sa̱ a uye.>>
14Korogo ka̱ tsu ka̱na̱ ta̱ kagandalasa a kajiba,
tsu na ka̱kpa̱ga̱ ka̱ tsu bana n ko bonoi.
15Korogo ka tsu uka ta̱ kukiye a kapara ka ilikulyaꞋa,
ama wi a kufuɗa wa banka a̱ una̱ u ni ba.
16Korogo ka ci ɗika ta̱ ka̱ci ka̱ ni,
a̱yi vuza vu cicoꞋo ɗa,
ali u laꞋa uma e cindere
a na a̱ ku ushuku kadanshi mayin.
17A̱yi na u remei mesheꞋe a̱ kutsuvu,
wi ta̱ tsu vuma wi a nwalu ɗa u ukai una̱
a̱ vishili vu na ili i burai ni ba.
18Tsu na kajarishi ka̱ tsu ka̱na̱ ugulani
n akina n ayaꞋa n ukpa̱,
19ta vuza vu na u tsu ya̱nsa̱ vuza vu na
i a ida̱shi ɗeɗevu ka̱ta̱ u dana, <<Majari maꞋa.>>
20Nɗanga mi baci lo ba,
akina a̱ tsu kima̱ ta̱,
ta feu nannai kuyun ki baci lo ba,
kananai feu ka kuyaꞋan lo ba.
21Tsu na cikina tsu ci yongo n a̱ga̱ruwa̱shi e kenle,
nɗanga kpamu a akina,
ta vuza vu ku zama vishili u tsu yongo nanai.
22Kadanshi ka vuza vu kuyun
ki ta̱ ci ilikulyaꞋa yi uyoꞋo,
ka̱ tsu laza ta̱ a̱ ka̱tsuma̱ ka vuma.
23Una̱ wu uyoꞋo n ka̱ɗu ka gbani-gbani,
wi ta̱ tsu mevene ma na a kumai n azurufa koci.
24Vuza vu kapalaka̱shi u tsu sokongu ta̱
cisheꞋe ci ni n una̱ wu uyoꞋo u ni,
ama ka̱ɗu ka̱ ni ki ta̱ tukpa m ma̱ya̱nsa̱ka̱.
25A kadanshi ka̱ ni ka singai kaꞋa baci,
ka̱ta̱ vu ushuku n a̱yi ba,
adama a na ka̱ɗu ka̱ ni ki ta̱ tukpa,
n kusheshe ki ili yu unata.
26u gaꞋan ba u sokongu ta̱ tsurala ci ni m ma̱ya̱nsa̱ka̱,
ama i ta̱ a̱ ku uta̱ka̱ ka gbani-gbani ka̱ ni
e keteshe o koɓolo ka uma.
27Yaba dem vu na u ga̱va̱ka̱i vuza vu ni
kpenle ku ka gbani-gbani,
wi ta̱ a kuyikpa̱ punu,
vuma vu na baci u gindalukpai katali,
ki ta̱ a̱ kugida̱la̱ ko bono ka tsugba yi.
28KayaꞋin ka aꞋuwa ka ci iwan ta̱
vuza vu na u la̱nga̱sa̱i ni ka̱ɗu,
ka̱ta̱ vuza vu una̱ wu uyoꞋo tamkpamu u yaꞋan koli.
©️2025 Language Development and Translation Initiative (LDTI)