ရှင်လုကာ 16
16
အခန်း (၁၆)
ရိုးသားယတိ စီမံတိပုံဥပမာ
1နှိုပ်ဟှတ်တောလ် ကိုယ်တော်ယေရှုနား အတပည့်လှီ့အောလ် အထာပုံဥပမာပုဒ်ဟှတ် အမိန်ဘွာလ်တီခေါမ်စေး “ဟမာလ် ဆထီးပွလ်ဟှတ်နား အပိုင်ခေါမ်လှီ့ကိမ်ကိမ်စီမံဟိုင် ခေါင်ပွလ်ဟှတ်အခန့်။ အင်မ်ဘော်နားခါ နှိုပ်ဟှတ်တောလ် အင်မ်စီမံတိနား ဒေါင်းဂိုလှီ့ အလွဲသုံးစား အစိုင်းခေါမ် အစုတ်င်ဟိုဝေါလ် 2ဆထီးနား အင်မ်စီမံတိပါနယ်ထေ့နား ‘နာင်အကြောင်းလှီ့ ကေယှောက်လောဒ့်ခေါမ် ဟအီလှီ့ယောင်။ နာင် ကေးအလုပ်လှီ့ စီမံဟိုင်ရာထူးဝေါလ် တောတီးယော်ခန်းနောလ် နာင် စီမံခေါမ် စာရင်းဇယားလှီ့ ကေးရိုး တင်ပြအား’ တိရို အဟောင်။
3အင်မ်ဟိုဝေါလ် စီမံတိနားခါ ‘ဟိဘော် ကေစိုင်းလောဒ့်အိုက်။ ကေးဆထီးနား ကေး အလုပ်ထုတ်ပါလ်။ ကေးနား အလုပ်ကြမ်းလုပ်ဟိုင်ခါ ကေထားမယ်ယဘော်၊ တောင်ငယ်ဟိုင်ခါ ကေယှောက်ကယ်။ 4နီအလုပ်ပါလ်ကိ အထုတ်ကေခံလောဒ့်ဟိုဝေါလ် ခေါင်လှီ့နား အာမ်အိမ်းမာလ် ကေးလက်အာမ်ခံဟိုင် ဟိဘော် ကေစိုင်းလောဒ့်အိုက်နောက်ခေါမ် ကေစုတ်င်ပါလ်’ တိရို အလုန်ဒုလ့်ကာလ် အစဉ်းစား။
5အင်မ်ခန်းနောလ် အင်မ်ခေါင်နား အဆထီးဘိုးစငေါလ် လေပေးဟိုင်မယ်တိခေါင်လှီ့ ပွလ်ဟှတ်ပါလ်နောလ် ပွလ်ဟှတ် ပါနယ်ထေ့နား စိပ်စိပ် ပွလ်ဟှတ်တောလ် ‘နာင်နား ကေး ဆထီးရိုး လေအီဟို့ နာပက်လောဒ့်အိုက်’ တိရို အဟိ့။
6အင်မ်ခေါင်နား ‘#16:6 သံလွင်ဆီအစည်တစ်ရာ=သံလွင်ဆီ၃၀၀၀လီတာ။သံလွင်ဆီ စည်ဖို့ဟှတ် ကေပက်ဟိုင်မယ်’ တိရို အဟောင်ဘွာလ်။ စီမံတိနားခါ ‘စာရင်း စော်လှပ်အရင်ငေါလ် လူးဝေထေ့နား ဟို့ရ်ကိပ် တိရို ရော့ကား’ တိရို အဟောင်။
7အင်မ်ပါလ်နောလ် စီမံတိနား အထာပွလ်ဟှတ်တောလ် ‘နာင်နားစေး လေအီဟို့ နာပက်ဟိုင်မယ်’ တိရို အဟိ့ဟိုဝေါလ်
အင်မ်နား ‘#16:7 ဂျုံစပါးအိတ်ဖို့ဟှတ်=၁၀၀၀လား ၁၂၀၀တောင်း ဆီးယနား လီတာ၃၇,၀၀၀ကထု၄၅,၀၀၀။ဂျုံ အိတ် ဖို့ဟှတ်’ တိရို အဟောင်။
စီမံတိနားခါ ‘စာရင်းစော်လှပ်ပါလ် ဆာ့ကိပ် တိရို ရော့ကား’ တိရို အဟောင်။
8အင်မ်ဟိုဝေါလ် အဆထီးဘိုးနားခါ ရိုးသားယတိစီမံတိနားအစိုင်းခေါမ်လှီ့ အရောက်လောဒ့်ဟိုဝေါလ် အင်မ်လိမ္မာပါးနပ်ခေါမ် အချီးမွမ်းလှာလ်။ ဟိဘော်ဟိုင်ရိုးနောက်ဟိုဝေါလ်စေး ဆုမ်သပ့်ခုံးငေါလ်ကိ ခေါင်လှီ့နား ဖုလော်ရှင် ခေါင်လှီ့ထောက်ကာလ် တစွာခေါင်လှီ့ဓေါလ် ဆက်ဆံနောက်ကာလ် လိမ္မာပါးနပ်ထေ့နား အာမ်စိုင်းထေ့ခန်းနောလ်” တိရို အထောလ်။ 9အထာကွန်ဟှတ် ကိုယ်တော်ယေရှုနား အတပည့်လှီ့အောလ် “နာင်မီးတွက် ခီပွီပူနူးလောဒ့်ဟိုင် နာင်မီးဓေါလ်မယ်ဆော်ဟိုင်ဆီးယတိ စည်းစိမ်လှီ့ အသုံးပြုဘွတ်စူး။ နာင်မီး နာမ်ဘာလ့်ဟိုဝေါလ် အင်မ်စည်းစိမ်လှီ့ဟှတ်တောလ် အသုံးဝင်ယနားခါ နာင်မီး ဟြှားလုအောလ်ကိ နိစ္စထာဝရအိမ်းနား အကြိုဆိုဝိုက်။
10အင်မ်ဘော်နားခါ ဒိပ်ခိခ်တိ အမှုကိစ္စလှီ့အောလ် ဆက်ဇော်မယ်တိလှီ့စေး အမှုကိစ္စလန်လှီ့အောလ်ခါ ဆက်ဇော်အာမ်မယ်။ အမှုကိစ္စစောလှီ့အောလ် ဆက်ဇော်မယ်ယတိစေး အမှုကိစ္စလန်လှီ့အောလ်ခါ ဆက်ဇော်မယ်ဟိုင်ဆီးယော်။ 11အင်မ်ခန်းနောလ် နာင်မီးနောက်ခေါမ် နီလောကီစည်းစိမ်လှီ့စီမံနောက်ကုံးငေါလ်ခါ ဆက်ဇော်နာမ်မယ်ယဟိုဝေါလ်စေး ဟြှားလုအောလ်မယ်တိ စစ်မှန်တိစည်းစိမ် နာင်မီးရိုး ဟအူနား စီမံဟိုင်ခွင့်အပြုအိုက်။ 12နာင်မီး အစွာခေါင်ပိုင်ခေါမ် ပစ္စည်းဥစ္စာလှီ့အောလ် နာမ်ဆက်ဇော်မယ်ယဟိုဝေါလ်စေး ဟအူနား နာင်မီး ပိုင်ဟိုင်ပစ္စည်းဥစ္စာလှီ့ နာင်မီးရိုး အာမ်ပက်တိုက်။
13အီဘောင်အစေခံနားခါ သခင်ပွလ်နှိခေါမ် ကွန်ဟှတ်ဘွတ်တောလ် အစေခံခွတ်ယော်။ ဟိဘော်ဟိုင်ရိုးနောက်ဟိုဝေါလ်စေး ပွလ်ဟှတ် ခစ်ထေ့နား ပွလ်ဟှတ် အမှူးဒေါင်မိုက်။ ဆီးယနား ပွလ်ဟှတ်တောလ် ဆက်ဇော် အမယ်နားစေး အထာပွလ်ဟှတ် မထီမဲ့မြင်အစိုင်းရိုက်။ အင်မ်ဘော်ယောင် နာင်မီးခါ ဖုလော်ရှင်လား လောကီစည်းစိမ်လှီ့ ပြိုင်ဟှတ်တောလ် အစေခံမာလ် လောဒ့်ယော်” တိရို အမိန့်။
ကိုယ်တော်ယေရှု ခေခေါအချို့
(ရှင်မဿဲ ၁၁:၁၂-၁၃၊ ၅:၃၁-၃၂)
14အင်မ်ပါလ်နောလ် ဒေါင်းဂိုမောက်တိ ဖာရိရှဲလှီ့နား ကိုယ်တော်ယေရှု ဟောင်ခေါမ်ခေခေါ အာမ်ယှောက်ဟိုဝေါလ် အာမ်လှောင်ပြောင်။ 15အင်မ်ဘော်နားခါ ကိုယ်တော်ယေရှုနား အင်မ်လှီ့အောလ် “နာင်မီးနား ခေါင်လှီ့မော်ဝေါလ် ဖြောင့်မတ်တိရို နာမ်ဓေါင်ထေ့နားခါ ဖုလော်ရှင်နား နာမ်လုန်ပွန်ယခေါမ် အစုတ်င်။ ခေါင်လှီ့နား တန်ဖိုး အာမ်တောဒ့်ခေါမ် လောကီစည်းစိမ်လှီ့စေး ဖုလော်ရှင်တွက်စေး သာ့ဆီးတိလှီ့အောလ်အထောလ်။
16သွီးဓေါလ်သန့်စင်ခေါမ်ပေးတိ ဆလော်ယောဟန်လက်ထက်စိ ခေါင်လှီ့နား မောရှေပညတ်ကျမ်းလား ပရောဖက်လှီ့ကျမ်း အာမ်လိုက်နာဟိလ့်။ အင်မ်ဘော်နားခါ တုအောလ် ဖုလော်ရှင်သာနာတော်အကြောင်း ဆီးတင်ပွန် ဟောခန်းနောလ် ခေါင်လှီ့နားခါ ဖုလော်ရှင်သာသနာဒုလ့်ကာလ်ဝင်ဟိုင် တပြင်းအာမ်ကြိုးစားလူး။ 17အင်မ်ဘော်နားခါ ဖုလော်ရှင်ပညတ်ကျမ်းဒုလ့်ကာလ်ကိ အဒိပ်ခိတိ စော်လုံးလုံးဟှတ် အခိတ်ဟိုင်ထောက်ကာလ် နေဟြှလ်လား ဆုမ်သပ့်ခိတ်ဟိုင်စေး ပိုဝေနားအလွယ်။
18ပုန်းဟို့ပီဟာဓေါလ် ကာထေ့နား အစွာမုတောပွလ်ဟှတ်ဓေါလ် လက်ထပ်တိခေါင်တိုင် အိမ်းထောင်ရေးဖောက်ပြန်ခေါမ် ကျူးလွန်တိအောလ် အာမ်ထောလ်။ ပုတောဓေါလ်ကာတိ မုတောဓေါလ် လက်ထပ်တိခေါင်တိုင်ခါ အိမ်ထောင်ရေးဖောက်ပြန်ခေါမ် ကျူးလွန်ခေါမ်ငေါလ်ထောလ်” တိရို အမိန့်။
လာဇရုလားဆထီး
19အင်မ်ပါလ်နောလ် ကိုယ်တော်နား “ဟမာလ် ဈီးလန်ထေ့နား ဆူဆောက်ပွန်တိလှီ့ ခုအယ်ထေ့နား နှိုပ်တိုင် စည်းစိမ်ဥစ္စာလှီ့ဓေါလ် ပျော်မြူးတိဆထီး ပွလ်ဟှတ်အမယ်။ 20ပုန်းပြတ်ဟိုလှီ့မယ်တိ လာဇရုမိန်နိုးတိ စက်ကယ်တိပွလ်ဟှတ် အင်မ်ဆထီးအိမ်းခြံပေါက်ကာလ် ခေါင်တချို့နား အာမ်တောဒ့်လူဆော်။ 21အင်မ်ခေါင်နား ဆထီး ဘုအေခေါမ်ငေါလ်ကိ အကျန်တိလှီ့ အေဟိုင်အလီ။ အွီးလှီ့နားခါ အင်မ်ခေါင် အဟိုလှီ့ လူးထေ့နားအာမ်လှပ်ကယ်။
22နောက်ဆုံးငေါလ် လာဇရုခေါမ် ဘာလ့်ထေ့နား နောတ်ဒေဝါလှီ့နား အင်မ်ခေါင် ကေးမီးဆွားအာဗြဟံကာဝေါလ် အာမ်ဈိ။ ဆထီးခါ ဘာလ့်ဟိုဝေါလ် ခေါင်လှီ့နား အင်မ်အာမ်ခိ။ 23အင်မ်#16:23 မရဏနိုင်ငံနောက်ခေါမ် ပွန်ယတိလှီ့ အဘာလ့်ဟိုဝေါလ် နောက်ဆုံးတရားစီရင်ခေါမ်နှိုပ်ခိုက်ဟာမ်းဝေ့ အာမ်တောဒ့်နောက်ဓိလ်။မရဏနိုင်ငံရိုး ဆိတ်လှီ့ခံလောဒ့်ထေ့နား အဟြှလ်အဓေါ့်ဟိုဝေါလ် အာဗြဟံကာဝေါလ်ငွာတိ လာဇရု အလှမ်းမာလ်ကထု အမှူး။ 24အင်မ်ဟိုဝေါလ် အင်မ်နား ပါရ်ထေ့နား ‘ပေါလ်အာဗြဟံယား၊ ကေး မာနယ်ပက်မိုဝြား။ လာဇရုကွတ်ရုန်း သွီးရိုး ယွှာထေ့နား ကေး လေရိုး လှာမ်လူးပက်မိုဝြား’ တိရို အဟောင်။
25အင်မ်ဘော်နားခါ အာဗြဟံနား အဟောင်ဘွာလ်ခေါမ်စေး ‘ကေးစိုးဝြား၊ နာင်နောက်ခေါမ် နာဆောက်င်ဟင်ဟိုဝေါလ် ပွန်တိလှီ့နာလောဒ့်ဟိလ့်ပါလ်။ အင်မ်ဘော်နားခါ တုအောလ်လာဇရုနားစေး ပွန်ယတိလှီ့ယောင် အလောဒ့်ဟိလ့်။ တုအောလ် လာဇရုစေး ပွန်တိလှီ့လောဒ့်ထေ့နား နာင်စေး ဆိတ်လှီ့ပူနူးနာခံလောဒ့်။ 26အင်မ်ဟို့တင်ယော် နာင်လား ကေးမီး ကြားဝေါလ် ထုဟုမ်တိ လှော်နူးပွလ်ဟှတ် အမယ်ခန်းနောလ် နာင်မီးစငေါလ်ကိလှီ့ခါ ကေးမီးစငေါလ် လူးဝေါလ်လောဒ့်ယဘော် ကေးမီစငေါလ်ကိလှီ့ခါ နာင်မီးစငေါလ် လူးဝေါလ်လောဒ့်ယော်’ တိရို အဟောင်ဘွာလ်။
27ဆထီးနားခါ ‘ကေခို့အယ် ပေါလ်အာဗြဟံယား၊ အင်မ်ဘော်နောက်ဟိုဝေါလ်စေး လာဇရု ကေးပေါလ်အိမ်း(မ်)မာလ် တိပက်သား။
28ဟိဘော်ဟိုင်ရိုးနောက်ဟိုဝေါလ်စေး ကေးနား သာနောင်ခွာ ပိုးဟိုရ် ကေတောဒ့်ကယ်။ အင်မ်ဟိုဝေါလ်ယောင် အင်မ်လှီ့ ဆိတ်ခံလောဒ့်နောက်ဓိလ်နောလ် ခိုက်လူးဟိုင်ဆီးယော်ဟ’ တိရို အဟောင်။
29အာဗြဟံနားခါ ‘နာင် သာနောင်လှီ့နား မောရှေလား ပရောဖက်လှီ့ ရော့ဟိလ့်ခေါမ် ကျမ်းစော် အာမ်တောဒ့်ကယ်။ အင်မ်လှီ့ အာမ်လိုက်နာလောဒ့်အိုက်’ တိရို အဟောင်ဟိုဝေါလ်
30ဆထီးနား ‘ပေါလ်အာဗြဟံယား၊ အင်မ်ဟို့အောလ် လုံလောက်ယော်။ အင်မ်ဘော်နားခါ ဘာလ့်တိလှီ့ဒုလ့်ကာလ်ကိ ပွလ်ဟှတ်ဟှတ်နား အင်မ်လှီ့စငေါလ် ဈာတ်ထေ့နား ဟောင်ဝေဟိုဝေါလ်စေး အင်မ်လှီ့နား နောင်တသံဝေဂတရား အာမ်လောဒ့်အိုက်’ တိရို အဟောင်ဘွာလ်။
31အင်မ်ဘော်နားခါ အာဗြဟံနား ‘အင်မ်လှီ့နား မောရှေလား ပရောဖက်လှီ့ ရော့ဟိလ့်ခေါမ်ကျမ်းလှီ့ အာမ်လိုက်နာယဟိုဝေါလ်စေး ဘာလ့်နောက်ကာလ်ကိ လူးဘွာလ်တိ ခေါင်ပွလ်ဟှတ်ဟှတ်နား ဈာတ်ထေ့နားဟောင်ဝေဟိုကုံးခါ နောင်တသံဝေဂလောဒ့်ဟိုင်ဆီးယော်ဟ’ တိရို အဟောင်” တိရို အမိန့်။
Цяпер абрана:
ရှင်လုကာ 16: CSJ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.