Matthew 14
14
1အဲခီမှာ ဟေရုဒ်မန်းဟ ကိုယ်တော်ယေရှုပြုလုပ်ရစ်ဝို အံ့ဖွယ်မှုဒန်းဒွေဝို ကြားရဝိုခါမှာ 2ဟေရုဒ်မန်းဟ သူ့လက်အော့ငယ်သားဒွေဝို "အယ်မိုလူဟ ရေနှစ်မြင်ဂလာပေးသူ ဆရာယောဟန်ဖြစ်နိုင်ရယ်၊ အဲဂျော့ သူဟ သေရာဟနေ သက်ပလန်ရှင်လာပြီး အယ်မိုမျိုး အံ့ဖွယ်မှုဒွေဝို လုပ်ဆော်ပြနိုင်ဇာဖြစ်ရယ်" ဆိုပီး ပြောလေရယ်။ 3သူအဲမျိုးပြောရဝို ကြောရင်းဟလောဝါ ဟေရုဒ်မန်းဟ သူ့ကိုဖြစ်သူ ဖိလိပ္ပုရဲ့ဇနီးဟေရောဒိကိစ္စဂျော့ ယောဟန်ဝို ဖမ်းဆီးချုပ်နှော်ပီး ထော်ခလရစ်ဇာဖြစ်ရယ်။ 4ဟဲဂျော့ဆိုဝါ ယောဟန်ဟ ဟေရုဒ်မန်းဝို "ဟေရောဒိဟ နန့်ကိုရဲ့ဇနီးမယားဖြစ်ရိတွက် သူ့နလက်ထပ်ဇာဟ ပညတ်တရားတော်န ကိုက်ညီရ" ဆိုပီး မြဲဒမ်း ဝေဖန်ပြောဆိုနေရိတွက်ဖြစ်ရယ်။ 5ဟေရုဒ်မန်းဟ ယောဟန်ဝိုကွက်မျက်ရှင်ဘေမဲ့ လူဒွေရုန်းရင်းဆန်ခတ်ဖြစ်လာမှာဝို ကြော့ရိတွက် အဲမိုခီမှာ သူလုပ်ခဲ့ရ။ ဟဲဖြစ်ရိနူးဆိုဝါ ယောဟန်ဟ ပရောဖက်တစ်ပါးဖြစ်ကြော လူဒွေဟ ယုံကြည်ရားရိတွက်ဖြစ်ရယ်။ 6အယ်ဘေမဲ့ လနဲငယ်ကြာပြီးနော့ ဟေရုဒ်မန်းရဲ့ မွေးနေ့ဝို ရော့ရှေ့လာရိတွက် မွေးနေ့ပွဲဝို ကျင်းပဝိုခါမှာ ဟေရာဒိရဲ့မီးဖြစ်သူဟ ဟေရုဒ်မန်း န ဧည့်သည်တော်ဒွေတွက် ကပြဖျော်ဖြေခဲ့လေရယ်။ 7ဟေရုဒ်မန်းဟ ရားဒိုင်းနှစ်သက်ပီး နန်တောသမျှပေးမယ်ဆိုပီး ဟေရာဒိရဲ့မီးဝို ဒိသစ္စာပြုလေရယ်။ 8အဲခါ ဝယ်ရားဟ ဟဲရာဇာဝို တောဆိုရမယ်နူးဆိုဇာဝို သူ့မိဝိုမေးဝိုခါမှာ သူ့မိဟ "ရေနှစ်မြင်ဂလာပေးသူ ယောဟန်ရဲ့ဦးခေါဝို လန်းဗန်းပေါ်တံပီးပေးပါ" ဆိုပီး တောဆိုဝို့ တိုက်တွန်းလေရယ်။ 9ဟေရုဒ်မန်းဟ သူပြောဝိုဂါးတွက် နော်ဒရဘေမဲ့ ဧည့်သည်တော်ဒွေရဲ့ရှေ့မှာ သူပေးဝိုဒိဝို ဖျစ်ရှင်ဘဲရိတွက် ဝယ်ရားတောဝိုတိုင်း လုပ်ပေးဝို့ မိပေးလိုက်လေရယ်။ 10သူ့လက်အော့ငယ်သားဒွေဝို ထော်ထဲမှာရှေ့ဝို ဟောဟန်ရဲ့ဦးခေါဝိုဖြတ်ဝို့ စေလွှတ်လိုက်ရယ်။ 11အဲနော့ ယောဟန်ရဲ့ဦးခေါဝို လန်းဗန်းပေါ်တံပီး ယူဆော်လာပြီး ဝယ်ရားဝိုပေးလိုက်ဝိုခီမှာ ဝယ်ရားဟ မိဖြစ်သူဆီဝို ယူဆော်ဝါးလေရယ်။ 12အဲမိုဒန်းဝို ယောဟန်ရဲ့ဗြိဒွေကြားဝိုခါမှာ ကျဉ်းထော်ထဲဟ ယောဟန်ရဲ့ရုပ်လောဝို သွားရော့သယ်ယူပီး သင်္ဂြိုဟ်ဂေ့လေရယ်။ အဲနော့ သူ့နို့ဟ အဲမိုကြောရာဒွေဝို ကိုယ်တော်ယေရှုဆီဝို သွားပီး ရှော့တံဂေ့လေရယ်။ 13ကိုယ်တော်ယေရှုဟ အဲမိုဒန်းဂါးဝို ကြားသိရပြီးနော့ လှေပေါ်ဝိုတက်ပြီး ဗြိတော်ဒွေနတူတူ လူသူကင်းဝိုနေရာဝို ကြွတော်မူလေရယ်။ အယ်ဘေမဲ့ လူဒွေဟ ကိုယ်တော်ယေရှုကြွတော်မူဇာဝို ကြားသိဂေ့ဝိုခါမှာ ကိုယ်တော်ယေရှုရဲ့နော့တော်ဝို ခေဂျင်လိုက်လာဂေ့လေရယ်။ 14ကိုယ်တော်ယေရှုဟ လှေပေါ်ဟနေဆင်းဝိုခါမှာ သူ့နော့တော်ဝို လိုက်လာဝို လူအုပ်ဂီးဝိုဗြင်ဝိုခါမှာ အဲမိုလူဒွေဝို နားဂရုဏာသက်တော်မူပီး နာမကျန်းဖြစ်နေဝိုသူဒွေဝို ကျန်းမာစေဝို့ ကုသပေးတော်မူလေရယ်။ 15ညစ်နေခမ်းခီဝို ရော့လာဝိုခါမှာ ဗြိတော်ဒွေဟ ကိုယ်တော်ဆီဝိုချဉ်းကပ်ပီး "ကိုယ်တော် အယ်မိုနေရာဟ ဗြို့ဝါဒွေနလှမ်းဝွီးလှပါရယ်၊ မကြာခံ မှော်ဝေါ့မယ်ဖြစ်ရိတွက် အယ်မိုလူဒွေဝို ဗြို့ဝါဒွေဝို စားဇာဒွေ ဝယ်ယူနိုင်ဝို့ စေလွှတ်ပေးတော်မူပါ" ဆိုပီး ရှော့တံလေရယ်။ 16အယ်ဘေမဲ့ ကိုယ်တော်ယေရှုဟ "သူ့နို့သွားဝို့မလိုရ၊ နန်းနို့ကိုယ်တိုင် စားဇာဒွေဝိုပေးဂေ့လော့" ဆိုပီး ဗြိတော်ဒွေဝို မိလေရယ်။ 17ဗြိတော်ဒွေဟ "ကျနော်ဒို့မှာ ပါမုငါးလုံးန ငါးနှေ့ကော်ဘဲ့ရှေ့ရယ်" ဆိုပီး ကိုယ်တော်ဝို ပလန်လည်ရှော့တံဂေ့လေရယ်။ 18အဲခါ ကိုယ်တော်ယေရှုဟ "အဲမိုဇာဒွေဝို ငါ့ဆီဝိုယူလာဂေ့လော့" ဆိုပီး မိလေရယ်။ 19အဲနော့ လူထုပရိသတ်ဒွေဝို ဗြစ်ခမ်းပလန်ပေါ်မှာ ထိုင်ဂေ့ဝို့ မိတော်မူပီး ပါမုငါးလုံးနငါးနှေ့ကော်ဝိုယူပီး ကောကံရွှေဗြို့တော်ဝို မျှော်ကေ့ပီး ဘုရားရှင်ရဲ့ကျေးဇူးတော်ဝို ချီးမွှမ်းဆုတောပြီးန မုဝိုဖဲ့ပီး ဗြိတော်ဒွေဝို ပေးတော်မူလေရယ်။ ဗြိတော်ဒွေဟလဲ လူထုပရိသတ်ဒွေဝို ပေးဝီဂေ့လေရယ်။ 20လူထုပရိသတ်ဂီးဟလည်း ဝဝလင်လင်န စားသော့နိုင်ဂေ့လေရယ်။ အဲနော့ စားပြီးဝို ကျွင်းကျန်ဝိုမုဒွေဝို ကော့ယူသီးဆဲဂေ့ဝိုခါမှာ ဆယ့်နှေ့တောပလဲ့ရလေရယ်။ 21စားသော့သူဒွေမှာ မျိုးမီးဒွေန သားဂန်းရားဒွေ၊ ယော့ကျားဒွေ န စုစုပေါ ယော့ငါးထော်လော့ရှေ့ရယ်။ 22အဲနော့ ကိုယ်တော်ဟ ချင့်ချင်းဘဲ့ ဗြိတော်ဒွေဝို လှေပေါ်ဝိုတက်စေပီး ဟို့ဖက်ကမ်းဝို သူ့ရှေ့ဟနေ ရင်ဦးဆုံး သွားခိုင်းလေရယ်။ ဗြိတော်ဒွေ ထွက်ရားပြီးန လူထုပရိသတ်ဂီးဝိုလည်း သူ့နို့ရဲ့ဗြို့ဝါဒွေဝို ပလန်ဝို့ စေလွှတ်တော်မူလေရယ်။ 23လူထုပရိသတ်ဂီးဝို ပလန်လွှတ်ပြီးနော့ ကိုယ်တော်ယေရှုဟ ဆုတောဝို့ တော်ပေါ်ဝို ဘားဒဲ ကြွတော်မူလေရယ်။ ညစ်နေဇောခီဝိုရော့ဝိုခါမှာ အဲမိုနေရာမှာ ကိုယ်တော်ဘားဒဲဘဲ့ရှေ့နေလေရယ်။ 24အဲခီမှာ ဗြိတော်ဒွေရဲ့လှေဟ ကမ်းန ဝွီးကွာနေပြီဖြစ်ပြီး လေဆန်ဖြစ်ရိတွက် ပြင်းထန်ဝိုလှိုင်းလုံးဒွေရဲ့ ရိုက်ခတ်မှုဒဏ်ဝို ခံနေရလေရယ်။ 25မိုးလန်းဝိုခီမှာ ကိုယ်တော်ဟ တော်ပေါ်ဟနေ ဆင်းလာပြီး ရေပေါ်မှာလမ်းရှော့ပီး ဗြိတော်ဒွေရှေ့ဝိုနေရာဝို ကြွတော်မူလေရယ်။ 26ဗြိတော်ဒွေဟ ရေပေါ်မှာ ကိုယ်တော်လမ်းရှော့နေဇာဝို ဗြင်ဝိုခါမှာ ကြော့လန့်တူလှုရားဂေ့ပြီး "တစ္ဆေ" ဆိုပီး ကြော့လန့်တဂျား အော်ဟစ်ဂေ့လေရယ်။ 27အယ်ဘေမဲ့ ကိုယ်တော်ယေရှုဟ "စိုးရီဂေ့ပါန၊ ငါကိုယ်တော်ယေရှုပါ၊ ကြော့ဂေ့ပါန" ဆိုပီး ဗြိတော်ဒွေဝို ချင့်ချင်းဘဲ့ မိတော်မူလေရယ်။ 28အဲခါ ပေတရုဟ "ကိုယ်တော်၊ ကိုယ်တော်ဖြစ်ကြောမှန်ရယ်ဆိုဝါ ကျနော့်ဝို ကိုယ်တော်ဆီဝို ရေပေါ်ဝို လမ်းရှော့လာနိုင်ဝို့ မိပေးတော်မူပါ" ဆိုပီး ရှော့တံလေရယ်။ 29ကိုယ်တော်ဟလဲ "လာခဲ့လော့" ဆိုပီး မိတော်မူလိုက်ဝိုခီမှာ ပေတရုဟ လှေပေါ်ဟနေဆင်းပီး ရေပေါ်မှာလမ်းရှော့ပီး ကိုယ်တော်ယေရှုဆီဝို သွားလေရယ်။ 30အယ်ဘေမဲ့ သူဟ လေပြင်းဒွေတိုက်ခတ်လာနေဇာဝိုဗြင်ခီမှာ ကြော့ရွံ့လာပြီး ရေဟ စပီးနှစ်မြုပ်လာလေရယ်။ အဲနော့ ပေတရုဟ "ကိုယ်တော်၊ ကျနော့်ဝို ကယ်တော်မူပါ" ဆိုပီး အော်ဟစ် ရှော့တံလေရယ်။ 31အဲခါ ကိုယ်တော်ယေရှုဟ လက်ဝိုဆန့်ပီး ပေတရုဝို ဆွဲကိုင်ပီး "နန့်ယုံကြည်ခြင်းဟ ရားဒိုင်းအားနည်းနေရယ်၊ ဟဲရာဂျော့သံသယဖြစ်နေရပါနူး" ဆိုပီး မိဆိုလေရယ်။ 32အဲနော့ သူနို့ဟ လှေပေါ်ဝို တက်ရားဂေ့ရာ လေပြင်းဟလဲ ငြီသက်ရားလေရယ်။ 33လှေပေါ်မှာ ရှေ့နေဝိုဗြိတော်ဒွေဟ "ကိုယ်တော်ဟ မှန်တဂယ်ဘဲ့ ဘုရားရှင်ရဲ့သားတော်ဖြစ်ပါရယ်" ဆိုပီး ရှော့တံဂေ့လေရယ်။ 34အဲနော့ သူ့နို့ဟ ရေအိုင်ဝိုဖြတ်ကူးပီး ဂင်နေသရက်ဗြို့ဟ ကမ်းပေါ်ဝိုတက်ဂေ့လေရယ်။ 35အဲမိုရပ်ဒေသမှာ နေထိုင်ဝိုသူဒွေဟ ကိုယ်တော်ယေရှုဝိုဗြင်ဝိုခါမှာ မှတ်မိဂေ့ရိတွက် နီးပတ်ဝန်းကျင်မှာရှေ့ဝိုဝါဒွေဝို ဒန်းဖလန့်ရိ အဲမိုဒန်းဟ ပလန့်နှံ့ရားလေရယ်။ လူဒွေဟလည်း နာမကျန်းဖြစ်နေဝိုသူဒွေဝို ကိုယ်တော်ယေရှုဆီဝို ခေါ်ဆော်လာဂေ့လေရယ်။ 36သူ့နို့ဟ ဖျားနာနေသူဒွေဝို ကိုယ်တော်ယေရှုဝတ်ရုံတော်ရဲ့ ချည်မျှင်တစ်ဇလော့ဘဲ့ ထိတို့ခွမ့်ပြုဝို့ တောဘန်ဂေ့လေရယ်။ ထိတို့ရဝိုလူဒွေဟလည်း နာရောဂါဒွေ ပျော့ကမ်းရားဂေ့လေရယ်။
Цяпер абрана:
Matthew 14: ttpv-rv
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.