ኢያሳ 5
5
1ዮርዳኖሳ ሻፋፐ አዋይ ዉልያ ባጋና ደእያ አሞራዋናቱዋ ካተቱነ ሜድትራነ አባ ላንቂያ ላንቂያ ኦይቂደ ደእያ ካናነቱ ካተቱ ኡባይ፥ እስራኤልያ አሳይ ፕናና ጋካናዉ ጾሳይ ዮርዳኖሳ ሻፋ ሃ መልሴዳዋ ስሴዳ ዎደ፥ ኡንቱንቱ ዎዛናይ ኮልዴዳ። ኡንቱንቱ እስራኤልያ አሳና ጋከታናዉ ጻልበይክኖ።
እስራኤልያ አቱማ አሳይ ቃጻረቴዳ
2ሄ ዎደ ጾሳይ ኢያሳ፥ “ሳልያ ጌተትያ ሹቻፐ ቃራ ማቅላ ጊግሳደ፥ እስራኤልያ አቱማ አሳ በንዋንቱዋዳን ሀእካ ቃጻራ” ያጌዳ። 3ኢያሱ ሳልያ ጌተትያ ሹቻፐ ቃራ ማቅላ ጊግሲደ፥ ቃጻራ ደርያ ጌተትያ ሳኣን እስራኤልያ አሳ ቃጻሬዳ። 4እ ሄዋ ኦዳ ጋሱ: ግብጼፐ ከሴዳ አሳን ላይይ ኦላዉ ጋኬዳ አቱማ አሳይ ኡባይ ግብጼፐ ቢደ ዎራን ሀይቄዳ። 5ግብጼፐ ከሴዳ አቱማ አሳይ ኡባይ ቃጻረቴዳ፤ ሽን ዎራን ዩይያ ዎደ የለቴዳ አቱማ ናናይ እቱነ ቃጻረትቤና። 6እስራኤልያ አሳይ ጾሳዉ አዛዘተናን እጼዳ ድራዉ፥ ግብጼፐ ከስያ ዎደ ላይይ ኦላዉ ጋኬዳ አቱማ አሳይ ኡባይ ሀይቂደ ዉራና ጋካናዉ ዎራን ኦይታሙ ላይ ዩዬዳ። ሄዌነ፥ ጾሳይ ኡንቱንታ፥ “ኤሳይነ ማይ ጎግያ አራዳ ጋድያ፥ ታን ካሰ ህንተንቱ ማይዛ አዋቶ እማና ጌዳ ሄ ጋድያ ህንተንቱ በእክታ” ጌዳ ቃላይ ፖለታናዳና።#ፓይ. 14:28-35 7ሄዋ ድራዉ ጾሳይ ኡንቱንቱ ናና ኡንቱንቱ ሳኣን ደንዳ፤ ኢያሱ ቃጻሬዳዋንቱካ ሄዋንታ። ኡንቱንቱ ቃጻረተናን ደእያዌ ኦግያን ቢደ ኡንቱንቱ ቃጻረትቤና ድራሳ።
8አሳይ ኡባይ ቃጻረቴዳዋፐ ጉይያን፥ ኡንቱንቱ ማይይ ፓጻና ጋካናዉ ባረንቱ ዱንካኔዳ ሳኣን ጋምኤድኖ። 9ጾሳይ ኢያሳ፥ “ሀቼ ታን ግብጼቱዋ ቦርያ ህንተፐ ድጋድ” ያጌዳ። ሄ ሳኣ ሱንይ ሀቼ ጋካናዉ ገልጋላ#5:9 ገልጋላ፦ ሀ ሱን ብለይ እብራዌዋን፥ “ድጌዳ” ዎይ “ጎንዶርሴዳ” ግያዋ ማላቴ። ጌተቴ።
10እስራኤልያ አሳይ ያርኮ ደምባን ገልጋላ ግያ ሳን ዱንካኒደ፥ አግናዉ ታማነ ኦይደን ጋላስ ኦማርሴዳዋን ፓስጋ ባላ ቦንቼዳ።#ከሳ 12:1-13 11ፓስጋፐ ጉይያን ዎንተ ጋላስ፥ ቢታን ዶልያ ካ አይፍያ እርሹ ገልቤና ኡክነ ጺጸቴዳ ትሻ ሜዳ። 12ሄ ቢታን ዶልያ ካ ሜዳ ዎንተ ጋላስ ማናይ ቡክያዋ አግ ባሼዳ። ሄዋፐ ጉይያን እስራኤልያ አሳይ ማና ደምቤና። ሄ ዎድያፐ ዶሚደ ኡንቱንቱ ካናነን ዶልያ ካ ሚደ ደኤድኖ።#ከሳ 16:35
ኢያሳነ አዳ ኦይቄዳ ብታንያ
13ኢያሱ ያርኮ ማታን ደእያ ዎደ፥ ቁ ጊደ ጼሊደ፥ እት ብታኒ ማሻ ሾድ ኦይቂደ፥ ባረ ስንን ኤቄዳዋ በኤዳ። ኢያሱ አኮ ሺቂደ፥ “ኔን ኑ ባጋ አሴየ ኑ ሞርከቱዋ ባጋ አሴ?” ያጌዳ።
14ብታኒ፥ “ታን ኦ ባጋካ ግድከ። ሽን ታን ጾሳ ኦላንቻቱ ጋዳዋ ግዳደ ሀእ ያድ” ያጌዳ።
ኢያሱ ሳኣን ኩንድ ጎይኒደ፥ “ታ ጎዳይ ባረ ቆማዉ ኦድያባይ አዬ?” ያጌዳ።
15ጾሳ ኦላንቻቱዋ ጋዳዋይ፥ “ኔን ኤቄዳ ሳአይ ጌሻ ግዴዳ ድራዉ፥ ነ ገድያፐ ጫማ ከሳ” ያጌዳ። ኢያሱ እ ጌዳዋዳን ኦዳ።
Цяпер абрана:
ኢያሳ 5: DFBE
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The Word for the World Ethiopia