ዳናቱዋ 18
18
ምካነ ዳና ዘረ
1ሄ ዎደ እስራኤልያ ጋድያን ካቲ ባዋ። ሄ ዎደ ጋካናዉ ዳና ዛረቶ እስራኤልያ ዛራቱዋ ግዱዋን ላቴዳ ጋዲ ባዋ። ሄዋ ድራዉ፥ ኡንቱንቱ ባረንቱ ደእያ ጋድያ ኮዪደ ደኢኖ። 2ሄዋ ድራዉ፥ ዳና ዛራቱ ባረንቱ ዛራቱዋፐ እቼሹ ምኖ አሳቱዋ ዶሪደ፥ ጋድያ ዎቺደነ አኬኪደ ስማናዳን፥ ጾርአነ ኤሽታኦላ ጌተትያ ካታማቱዋፐ ኡንቱንታ ኪቴድኖ።
ኡንቱንቱ ኤፍሬማ ገዝያ ጋኪደ፥ ምካ ሶን አቄድኖ። 3ኡንቱንቱ ምካ ሶን ደኤዳ ዎደ፥ ሌዊያ ዛረ ግዴዳ ያላጋ አ ሃሳያን ኤሬድኖ። ኡንቱንቱ አኮ ሺቂደ፥ “ኔና ሀዋ አሄዳዌ ኦኔ? ሀዋ አያዉ ያድ? ሀዋን አያ ኦይ?” ያጊደ ኦቼድኖ።
4እ፥ “ምክ ታዉ ሀዋ ሀዋ ኦዳ፤ እ ታዉ ድርጉዋ ጭግና፥ ታን አዉ ቄሰ ግዳደ ኦይ” ያጊደ ኡንቱንቶ ዛሬዳ።
5“ኑን ብያ ኦጊ ኑዉ ጊገናን አጋነንቶነ ሀያና አነ ኑዉ ጾሳ ኦቻርክ” ያጌድኖ።
6ሄዋፐ ጉየ ቄሲ ኡንቱንቶ፥ “ሳሮ ጋክተ፤ ህንተንቱ ብያ ኦግያን መና ጎዳይ ህንተናና ግዳናዋ” ያጊደ ዛሬዳ።
7ሄዋፐ ጉይያን፥ እቼሹ አሳቱ ያፐ ደንዲደ፥ ላይሻ ጌተትያ ካታማ ቤድኖ፤ ያን ደእያ አሳይ ሲዶና ጋድያ አሳዳን ሳሩዋን ደእያዋ በኤድኖ፤ አሳቱ ኦናነ ስና ዎፓ አሳ፤ ኡንቱንቱ አያይነ ፓጨናን፥ ኡባባይ ኩሜዳ አሳ። ኦናናነ ጋከተናን ሲዶና ጋድያ አሳፐ ሃኪደ፥ ባረካ ዱማ ደኢኖ።
8እቼሹ አሳቱ ጾርአነ ኤሽታኦላ ካታማቱዋን ደእያ ባረንቱ እሻቱዋኮ ስሜድኖ፤ ኡንቱንቱ እሻቱ፥ “አያ ኦዱዋ አኪደ ዬድቴ?” ያጌድኖ።
9ሄዋፐ ጉየ ኡንቱንቱ ዛሪደ፥ “ቢታይ ሎይ አራዳ ግድያዋ ኑን በኤዶ። ሄዋ ድራዉ ደንዲደ፥ ላይሻ ካታማን ደእያ አሳ ኦሌቶ! ሃዋን ኦሱዋ ዪደ ጮ ኡቶፕተ፤ ኤለካ ቢደ ኦይቂተ። 10ህንተንቱ ያ ቢደ፥ ኦናነ ስናን ሳሮ ኡቴዳ አሳኮ ጋካኒታ። አሳዉ ኮሽያ ኡባባይ ሄ ጋድያን ደኤ። ጾሳይ ሄ ጋድያ ህንተንቶ እሜዳ” ያጌድኖ።
11ያትና፥ ዳና ዛራቱዋፐ ኡሱፑን ጼቱ አሳቱ ኦላ ሚሻ ኦይቂደ፥ ጾርአነ ኤሽታኦላ ካታማቱዋፐ ደንዲደ ቤድኖ። 12ይሁዳ ጋድያን ደእያ ቅርያት-ይኣሪማ ጌተትያ ካታማፐ አዋይ ዉልያ ባጋና ኡቴድኖ። ሄዋ ድራዉ፥ ሄ ሳአይ ሀቼ ጋካናዉ ዳና ሞ ጌተቲደ ሱንቴዳ። 13ሄዋፐ ደንዲደ፥ ኤፍሬማ ገዝያን ደእያ ምካ ሶ ዬድኖ።
14ላይሻ ጋድያ ዎቻናዉ ቤዳ እቼሹ አሳቱ ባረንቱ እሻቱዋ፥ “ሀ ሳኣን፥ ሀ ኬቱዋፐ እቱዋን ኤፉዲ፥ ሶ ግዶ ኤቃ ምስለቱነ ምፐ ማሰቲደ ብራን ሼሸቴዳ ምስሊ ደእያዋ ኤሪቴ? አነ አይ ኦናዉ ኮሽንቶ ቆፕተ” ያጌድኖ። 15ሄዋፐ ጉየ ኦግያፐ ስሚደ፥ ሌዊያ ዛረ ግዴዳ ያላጋ ቄሲ ደእያ ምካ ሶ ቢደ፥ አ ሳሮቴድኖ። 16ሄ ዎደ ኡሱፑን ጼቱ ዳና አሳቱ ኦላ ሚሻ ኦይቂደ፥ ገልያ ፐንግያን ኤቄድኖ። 17ኡንቱንቱ ሄ ቄስያና ያን ኤቂደእሽን፥ ጋድያ ዎቼዳ እቼሹ አሳቱ ምካ ሶ ገሊደ፥ ምፐ ማሰቲደ ብራን ሼሸቴዳ ምስልያ፥ ኤፉድያነ ሶ ግዶ ኤቃ ምስለቱዋ አኬድኖ።
18ሄ ዎደ ቄሲ ኡንቱንታ፥ “ዋቲቴ?” ያጌዳ።
19ሄዋፐ ጉየ ኡንቱንቱ አ፥ “ሀይዛ! እት ቃላነ ቃቶፓ! ኑናና ባደ ኑዉ አዉዋነ ቄሰ ግዳ። እት ጎልያ አሳዉ ቄሰ ግድያዋፐ እስራኤልያ ግድያ እት ዛረ አሳዉ ቄሰ ግድያዌ ነዉ ኬከኔ?” ያጌድኖ። 20ሄዋፐ ጉየ ቄሲ ናሸቲደ ኤፉድያ፥ ሶ ግዶ ኤቃ ምስለቱዋነ ምፐ ማሰቴዳ ምስልያ አኪደ፥ አሳቱዋና እትፐ ቤዳ።
21ሄዋፐ ደንዲደ፥ ባረንቱ ናና፥ ባረንቱ መህያነ ባረንቶ ደእያዋ ስንን ዎደ ቤድኖ። 22ኡንቱንቱ ምካ ጎልያፐ ሃኪደ ቤዳዋፐ ጉይያን፥ ምክ ባረ ሾሩዋን ደእያ አሳቱዋ ጼስና፥ ኦላዉ ከሴድኖ፤ ዳና አሳቱዋ ካሊደ ጋኬድኖ። 23ዋስና፥ ዳና አሳቱ ጉየ ስሚደ ምካ፥ “ዋናዲ? ሀ አሳ ኡባ አያዉ ሺሻዲ?” ያጊደ ኦቼድኖ።
24ሽን ምክ ዛሪደ፥ “ታን መዳ ታ ጾሳቱዋነ ታዉ ኦያ ቄስያ አኪደ ይክቼድታ። ታዉ ሀራይ አዬ አቴዳዌ? ህንተንቱ ታና አያዉ፥ ‘ዋናዲ?’ ጊቴ?” ያጌዳ።
25ዳና አሳቱ፥ “እት ቃላ ቃታደ ኔና ኤራ! ሀ ይሉዋና ደእያ አሳ ኔን ደንፐ፥ ኡንቱንቱ ነ ቦላ ደንዳናነ ነ ሶ አሳ ኡባ ዉርሳና” ያጌድኖ። 26ዳና አሳቱ ባረንቱ ኦግያ ቤድኖ። ምክካ ኡንቱንቱ ባረፐ ሎይ ዎልቃምያዋ በኢደ፥ ባረ ሶ ስሚደ ቤዳ።
27ዳና አሳቱ ምክ መዳ ጾሳቱዋነ አ ቄስያ አኪደ፥ ላይሻ ካታማን ኦናነ ስናን ሳሮ ደእያ አሳቱዋኮ ቤድኖ፤ ካታማን ደእያ ኡባ ቃራ ማሻን ዎደ፥ ካታማ ታማን ጹጌድኖ። 28ላይሻ ካታማይ ሲዶና ካታማፐ ሃኪደ ደእያ ድራዉነ አሳይ ሀራ አሳና ጋከት ኤረና ድራዉ፥ ኡንቱንታ አሻናዉ ኦንነ ዳንዳይቤና። ላይሻ ካታማይ ቤት-ራሆባ ግያ ሳኣ ማታን ደእያ ዎምባ ግዶን ደኤ።
ዳና አሳቱ ካታማ ዎ የግ ኬጺደ፥ ያን ደኤድኖ። 29ካታማ ሱንካ በን ባረንቱ ማይዛ አዉዋ፥ ያቆባ ናኣ ዳና ሱንን ላሚደ፥ ዳና ያጊደ ሱንድኖ፤ ሽን ኮይሮ ሄ ካታማይ ላይሻ ጌተቴ።
30ዳና አሳቱ ባረንቶ ሄ ማሰቴዳ ምስልያ ዎደ፥ ሙሴ ናኣ ገርሾማፐ የለቴዳ ዮናታና ባረንቱ ቄሳቱዋ ኦድኖ። አ ዛራቱ አሳይ ኦሞደቲደ ቤዳ ዎዲ ጋካናዉ፥ ያን ቄሳቱዋ ግዴድኖ። 31ሄዋዳን ሀኒደ፥ ጾሳ ዱንካኒ ሴሎን ደኤዳ ላይቱዋን ኡባን ምክ ማስሴዳ ምስለቱ ያን ጋምኤድኖ።
Цяпер абрана:
ዳናቱዋ 18: DFBE
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The Word for the World Ethiopia