1 ሳሜላ 2
2
ሃን ዎሳ
1ሃና ሀዋዳን ያጋደ ዎሳዱ፤#ሉቃሳ 1:46-55
“ታ ዎዛናይ መና ጎዳን ናሸቴ፤
መና ጎዳን ታ ዎልቃይ ዳሬዳ።
ታ ሞርከቱዋ ቦላን ታን ጬቀታደ ሃሳያይ፤
መና ጎዳይ ታና አሼዳ ድራዉ፥ ታን ናሸታይ።
2“መና ጎዳ ማላ ጌሽ እቱነ ባዋ፤
አ ማል እቱነ ባዋ።
ኑ ጾሳፐ አትና፥
ሀራ አትያ ዎጋ ዛላይ ባዋ።
3“ኦቶሮ ሃሳያ አግተ፤
ኦቶሮ ቃላይ ህንተንቱ ዶናፐ ከሶፖ።
አያዉ ጎፐ፥ መና ጎዳይ ኤርያ ጾሳ፤
አሳ ኦሱዋ እ ይግ ጼሌ።
4“ኦላንቻቱዋ ዎንዳፊ መኤዳ፤
ሽን በቴዳዋንቱ ዎልቃ ዳንጬድኖ።
5ካል ኡቴዳዋንቱ ኮሻቲደ፥
ቁማዉ ሀራዉ ኦኖ፤
ሽን ኮሻት ኡቴዳዋንቱ ሀእ ካሌድኖ።
ማንታ ላፑን ናና የላዱ፤
ሽን ጮራ ናና የሌዳና ዳቡራዱ።
6“መና ጎዳይ ዎነ ፓ፤
ቃይ እ ዱገ ስኦልያን የጌነ ፑደ ከሴ።
7መና ጎዳይ ማንቀነ ዱረዬ፤
ቃይ እ ዝቂሴነ ቂሴ።
8እ ህዬሳቱዋ ባናፐ ደን።
መቶታንቻቱዋካ ብድን ፕቱዋፐ ደን፤
ኡንቱንታ ካፓቱዋና ኡትሴ፤
ኡንቱንታ ቦንቾ አራታ ላትሴ።
“አያዉ ጎፐ፥ ቢታ ባሳቱ መና ጎዳሳ፤
እ ኡንቱንቱ ቦላን ሳኣ ኤሴዳ።
9እ ጾሳ አሳቱዋ ገድያ ናጌ፤
ሽን ኢታቱዋ እ ማን ጮኡ ኡዳና።
“አሳይ ባረ ዎልቃን ጾነና፤
10መና ጎዳና ኤቀትያዋንቱ ሊቃና።
እ ሳሉዋፐ ኡንቱንቱ ቦላ ጉጉንዳን ጉማና፤
መና ጎዳይ ሳኣን ደእያዋንታ ኡባ ፕርዳና።
“እ ባረ ካትያዉ ዎልቃ እማና፤
እ ባረ ኦኬዳዎ ጾኑዋ እማና”
ያጋደ ዎሳዱ።
11ሄዋፐ ጉይያን፥ ኤልቃን ራማን ደእያ ባረ ሶይ ቤዳ፤ ሽን ናአይ ሳመል ቄስያ ኤልያፐ ጋርሳና መና ጎዳዉ ኦ።
ኤልያ አቱማ ናና ኢታተ
12ኤልያ አቱማ ናናይ ኢታ ናናቱዋ፤ ኡንቱንቱ መና ጎዳ ኤርክኖ፥ 13ዎይ ያርሹዋ እምያ አሳዉ ቄሳቱ ኦያ ዎጋ ናግክኖ። ሄዌነ፥ አሳይ ያርሹዋ ያርሽያ ዎደ፥ ቄስያ ቆማይ ሄዙ አቻ ብራታ ኮጫን አኬዳ፤ አሹ ብሮ ካእ ደእሽን፥ 14ዶይስያ ዎጋ ኦቱዋን ዎይ ከርያን ሄ ኮጫ የዲደ፥ ኮጫይ ኦይቂ ከስያ አይ ቆሞ አሹዋ ግዶፐነ አፊደ፥ ቄስያዉ እሜ። ያርሹዋ ያርሻናዉ ሴሎ ይያ እስራኤልያ አሳ ኡባ ኡንቱንቱ ሀዋዳን ኦኖ። 15ቃይ ሞዋ ያርሽያ ሳኣን ጺጻናፐ ካሰቲደ፥ ቄስያ ቆማይ ያርሹዋ ያርሽያ ብታንያኮ ቢደ፥ “ቄሲ ቃየ አሹዋፐ አትና፥ ዶይሳ አሹዋ ኔፐ አከና ድራዉ፥ አዉ ጺጻናዉ አማሬዳ አሹዋ ሀማ” ያጌ።
16ሄዋፐ ጉየ ብታኒ ዛሪደ፥ “ዎጋዳን ቄሳቱ ሞዋ ኮይሮ ጹግኖ፤ ሄዋፐ ጉይያን፥ ኔን ኮይያዋ አካ” ያግያ ዎደ ቄስያ ቆማይ፥ “ቱይት፤ ታዉ ሀእ እማ፤ ኡባ ኔን ድጎፐ፥ ታን ኔፐ ዎልቃን አካና” ያጌ።
17መና ጎዳዉ እምያ ያርሹዋ ኤልያ ናናይ ካዳ ድራዉ፥ ኡንቱንቱ ናጋራይ መና ጎዳ ስንን ሎይ ዳሬዳ።
ናኣ ሳመላ
18ሽን ሳመል ናአተን ደኢደ፥ ሱፍያ ጌተትያ ክርያፐ ዳደቴዳ ኤፉደ ጌተትያ ማዩዋ ማዪደ፥ መና ጎዳዉ ኦ። 19ሳመላ ዳያ ላይን ላይን ጉ ቆልያ ጊግሳደ፥ ላይ ያርሹዋ ያርሻናዉ ባረ አስናና ባደ ሳመላዉ አካደ ባዉ። 20ኤል ኤልቃናነ አ ማቻቶ፥ “ነ ማቻታ መና ጎዳዉ እሜዳ ናኣ ድራዉ መና ጎዳይ ነዉ ሀ ምሽራትን ሀራ ናና እሞ” ያጊደ አንጄ፤ ያትና፥ ኡንቱንቱ ባረንቱ ሶይ ስሚኖ። 21መና ጎዳይ ሃኖ አንጅና፥ ሻሃራደ ሄዙ አቱማ ናናነ ላኡ ማጫ ናና የላዱ። ናአይ ሳመል መና ጎዳ ስንን ድጬዳ።
ኤልያነ አ ናና
22ኤል ሎይ ኤጬዳ። አ ናናይ እስራኤልያ አሳ ኡባ ቦላ ኦዳ ኡባባነ ቃይ ጾሳ ዱንካንያ ፐንግያን ጾሳዉ ኦያ ማጫ አሳቱዋና ግሴዳዋ ስሴዳ። 23ኡንቱንታ፥ “ህንተንቱ ሀዋ ማላ አያዉ ኦቴ? ህንተንቱ ኢታ ኪታ ታን አሳ ኡባፐ ስሳይ። 24ታ ናቶ፥ ሀዋ አግተ፤ መና ጎዳ አሳይ ህንተንታ ግያዋ ታን ስሴዳዌ ሎኦባ ግደና። 25እት አሳይ አሳ ናቆፐ፥ ጾሳይ አዉ ጋናታና፤ ሽን አሳይ መና ጎዳ ናቆፐ፥ ኦኔ አዉ ጋናታናዌ?” ያጌዳ።
መና ጎዳይ፥ “ታን ኡንቱንታ ዎና” ጌዳ ድራዉ፥ ኡንቱንቱ ባረንቱ አዉዋ ሴራ ስሰናን እጼድኖ።
26ናአይ ሳመል ጾሳ ስንንነ አሳ ስንን ድጬዳነ ሳበቴዳ።#ሉቃሳ 2:52
ኤልያ ሶይ አሳ ቦላ ኦደቴዳ ትምቢትያ
27እት ጋላስ ጾሳ አሳይ ኤልያኮ ዪደ አ፥ “መና ጎዳይ ሀዋዳን ያጌ፤ ‘ነ ማይዛ አዉ አሮነነ አ ሶ አሳይ ግብጼ ካትያ አይለተን ደእያ ዎደ፥ ታን ኡንቱንቶ ቆንጫድ። 28አሮነ ታ ያርሽያ ሳኣ ፑደ ከሳና ማላ፥ እጻና ጩዋያና ማላነ ታ ስንን ኤፉድያ ማያና ማላ፥ ታዉ ቄስያ ኡዳደ እስራኤልያ ዛራቱዋ ኡባፐ አ ዶራድ። ቃይ እስራኤልያ አሳይ ታማን ያርሽያ ያርሹዋ ኡባ ታን ነ አዉዋ ዛርያዉ እማድ።#ከሳ 28:1-4፤ ዎጋ 7:35-36 29ታን ታ ደእያ ሳኣ ሺሻና ማላ አዛዜዳ ታ ያርሹዋነ እምያዋ ህንተንቱ አያዉ የ ካኢቴ? ታ አሳይ እስራኤሊ፥ ታዉ ሺሼዳ ያርሹዋ ኡባፐ ሙሩትያዋ ህንተንቶ ሚደ ኦርድያዋን፥ ኔን ነ ናና ታፐ አደ አያዉ ቦንቻድ?’ ያጌ።
30“ሄዋ ድራዉ፥ መና ጎዳይ እስራኤልያ ጾሳይ ሀዋዳን ያጌ፤ ‘ነ ዛሪነ ነ አዉዋ ዛሪ መናዉ ታዉ ኦና’ ጋድ፤ ሽን ሀእ፥ ሄዌ ታፐ ሃኮ! ታና ቦንችያዋንታ ታን ቦንቻና፤ ታና ካያዋንታ ታን ካዉሻና። 31ነ ዛርያን አሳይ ጭመና ማላ፥ ታን ነ ዎልቃነ ነ አዉዋ ዛርያ ዎልቃ ይስያ ጋላሳቱ ያናዋ። 32ኔን መቶታና፤ ታን እስራኤልያ አሳዉ እምያ አንጁዋ በኣደ ኔን ቃናታና፤ ሽን ነ ዛርያን ጭማና አሳይ ኦንነ ባዋ። 33ታን ታ ያርሽያ ሳፐ ይሰና አሳይ ደኦፐ፥ አ ጋሱዋን ነ አይፊ አፎጺደ ቆቃናነ ነ ዎዛናይካ ምሹዋ ጹገታና፤ ነ ዳሮ ዘረ ኡባይ ያላጋተን ደኢደ ሀይቃና።
34“ነ ናናይ ላኡ ሆፍኒንነ ፒንሃስ እት ጋላስ ሀይቃና፤ ሄዌ ነዉ ማላታ ግዳናዋ።#1 ሳሜላ 4:11 35ታን ታዉ አማነትያ ቄስያ፥ ታ ዎዛናዳንነ ታ ቆፋዳን ኦያዋ ደንና፤ ታን አ ዛራቱ ደእ በአናዳን ኦና፤ ታን ዶሬዳዌ ካትያ ስንን ኡንቱንቱ ኡባ ዎደ ኦና። 36ነ ዛርያን አቴዳ ኡባይ ጉ ሚሻ ዎይ ባሶ ኡክ ዎሳናዉ ዪደ፥ አ ስንን ጉፋኒደ፥ ‘ታን ኡክ ማና ማላ፥ ቄሳቱ ዋፐ እቱዋ ሳኣ ማላን ታና ዎርኪ’ ያጋና ያጌ” ያጌዳ።
Цяпер абрана:
1 ሳሜላ 2: DFBE
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
The Word for the World Ethiopia