Ioan 8
8
Muljearea tsi Cãlcã Curuna
1[Sh-Isusul s-dusi tu muntili a Masnjilor. 2Ma, cum deadi dzua, s-turnã nãpoi tu templu sh-tut populu vini la elu, sh-elu s-apunã sh-lji nvitsa. 3Atumtsea scriblji shi Fariseilji lji adusirã unã muljeari tsi eara acãtsatã cãlcãnda curuna. Dupã tsi u bãgarã tu mesi, 4lji dzãsirã a Isusului: “Nvitsãtore, aestã muljeari u avem acãtsatã cãlcãnda curuna. 5Tu lege Moisiul nã ari dimãndatã si s-vatãmã cu chetri ahtãri muljeri, ma tini tsi dzãts?” 6Aestã elji u dzãsirã tsi s-lu bãga tu provã shi s-afla itii s-lu giudica. Ma Isusul, s-aplicã shi scria cu dzeaditlu pri loc. 7Sh-dupã tsi elji dipriunã lu ntriba, elu si sculã sh-lã dzãsi a lor: “Cai di voi easti fãrã amãrtii, s-arucã protlu cheatra pri ea!” 8Deapoea s-aplicã nãpoi shi scria pri loc. 9Atumtsea elji, u avdzãrã aestã shi s-dipãrtarã un cãti un, apãrnjinda di la ma vecljilji, pãnã cãndu Isusul armasi singur cu muljearea atsea tsi shidea aclo. 10Isusul atumtsea si s-culã sh-u ntribã: “Muljeari, iu suntu acuzãtorlji a tãlji? Vãrã nu ti giudicã?” 11Shi ea apãndisi: “Vãrã, Doamne.” Isusul lji dzãsi: “Nitsi mini nu ti giudicã, duti sh-nu amãrtisea ma.”]#8:11 Atselu textu nu s-aflã tu manuscrisi atseli ma veaclji. Ma mults pistipseascã cã easti bãgat tu evanghelul al Ioan ma nãpoi dupã traditsia oralã.
Ncãceari trã Mãrtiria al Isus
12Sh-Isusul lã grãi a lor nãpoi dzãcãnda: “Mini escu lunjina trã lumea. Cai mi urmeadzã nu va s-imnã pute tu scutidi, ma va s-aibã lunjina a banãljei.” 13Atumtsea Fariseilji lji dzãsirã: “Tini mãrtirseshti trã tini, mãrtiria a ta nu easti alihioasã.” 14Isusul apãndisi: “Sh-macã mãrtirsescu trã mini, mãrtiria a mea easti alihioasã, cã mini shtiu di iu am vinitã sh-iu mi duc. Ma voi nu shtits nits di iu yin, nits iu va mi duc. 15Voi giudicats dupã pãrearea di nafoarã, mini nu giudic nitsiun. 16Ma, sh-cãndu giudicã, giudicata a mea easti alihioasã, cã mini nu escu singur, ma escu cu Tatãl tsi mi pitricu. 17Tu Legea a voastrã easti scriatã cã mãrtiria a doi oaminjlor easti alihioasã.#Deut 19:15. 18Mini escu atsel tsi mãrtirsescu trã mini, sh-Tatãl tsi mi ari pitricut mãrtirseashti trã mini.” 19Atumtsea lji ntribarã: “Iu easti Tatãl a tãu?” Isusul apãndisi: “Voi nu mi cunushtets nitsi mini, nitsi Tatãl a meu. Macã va mi cunushteat mini, va s-cunushteat sh-Tatãl a meu.” 20Isusul li dzãsi aesti zboari nvitsãnda tu loclu a ayishteariljei a templui. Vãrã nu lu acãtsã, cã nu avea vinitã ninga oara a lui. 21Isusul lã dzãsi a lor nãpoi: “Mini ma mi duc sh-voi va mi cãftats, sh-va murits tu amãrtia a voastrã. Aclo iu mi duc mini, voi nu putets s-yinits.” 22Trã atsea Iudeilji dzãtsea: “Nacã va si s-vatãmã, cã dzãtsi: ‘Iu mi duc mini, voi nu putets s-yinits’?” 23Sh-elu lã dzãsi a lor: “Voi hits di nghios, iarã mini escu di nsus. Voi hits di aestã lumi, mini nu escu di aestã lumi. 24Trã atsea vã dzãsh cã voi va murits tu amãrtiili a voastri. Macã voi nu pistipsits cã mini escu, voi va s-murits tu amãrtiili a voastri.” 25Atumtsea elji lu ntribarã: “Cai eshti tini?” Sh-Isusul lã apãndãsi a lor: “Exact, atsea tsi vã dzãsh di tu ahurhitã. 26Multi lucri am ti dzãtseari sh-ti giudicari trã voi. Ma atsel tsi mi ari pitricut easti alihios shi atseali tsi am avdzãtã di la nãsu li dzãc a lumiljei.” 27Elji nu aduchirã cã elu ma lã grea a lor di Tatãl a lui. 28Atumtsea Isusul lã dzãsi a lor: “Cãndu s-lu avets anãltsat Hiljilu a Omlui, atumtsea va nvitsats cã ‘Mini escu’, sh-cã nu fac tsiva di la mini, ma dzãc ashã cum Tatãl mi ari nvitsat. 29Sh-atsel tsi mi ari pitricut easti cu mini. Elu nu mi ari alãsat singur, cã fac totãna lucrili tsi lj-arãsescu a lui.” 30Tu oara tsi elu dzãtsea aesti zboari, multsã oaminji pistipsirã la nãsu.
Ncãceari trã Dupã-yinitorlji al Abraham
31Atumtsea Isusul lã dzãsi a Iudeilor cai pistipsirã la nãsu: “Macã va armãnets tu nvitsãtura a mea, voi hits dealihea ucenitsilji a melji. 32Va u cunushtets alihea sh-ea va s-vã facã liberi.” 33Elji lji apãndisirã: “Noi him dupã-yinitorlji al Abraham sh-nu avem fut pute sclayilji a vãrui. Cum pots s-dzãts tini: ‘Va hits liberi’?” 34Isusul lã apãndisi a lor: “Dealihea ma vã dzãc, cai fatsi amãrtii easti sclav a amãrtiiljei. 35Sclavlu nu armãni di totãna la Fumealja, iarã hiljilu armãni di totãna. 36Ashã, macã Hiljilu va vã facã liberi, va hits dealihea liberi. 37Mini shtiu cã hits dupã-yinitorlji al Abraham, ma voi cãftats s-mi vãtãmats, cã zborlu a meu nu aflã loc la voi. 38Mini zburãscu di atsea tsi am vidzutã la Tatãl a meu, sh-voi fãtsets atseali tsi avets avdzãtã di la tatãl a vostru.” 39Elji apãndisirã: “Tatãl a nostru easti Abrahamul!” Isusul lã dzãsi a lor: “Macã va earat hiljilji a Abrahamului, va fãtseat faptili al Abraham. 40Ma voi tora cãftats s-mi vãtãmats mini, un om tsi vã am aspus alihea tsi am avdzãtã di la Dumnidzãlu. Abrahamul aestã nu u featsi. 41Voi fãtsets faptili a tatãlui a vostru.” Atumtsea elji lji dzãsirã: “Noi nu ni amintãm di putãnsirili, noi avem un singur Tatã, Dumnidzãlu.” 42Atumtsea Isusul lã dzãsi a lor: “Ma s-eara Dumnidzãlu Tatãl a vostru, voi va mi vreat, cã mini am vinit di la Dumnidzãlu. Nu am vinit di la mini, ma elu mi ari pitricut. 43Cãtse nu aduchits dzãslu a meu? Cã nu putets s-lu ascultats zborlu a meu. 44Voi hits di la draclu, tsi easti tatãl a vostru, sh-vrets s-fãtsets vrearili a tatãlui a vostru. Elu eara vãtãmãtor di tu ahurhitã shi nu armasi tu alihea, cã tu nãsu nu easti alihea. Cãndu dzãtsi arãdeari, greashti di la nãsu, cã easti arãdios shi tatãl a arãdeariljei. 45Iarã mini, cu tutã cã vã dzãc alihea, nu mi pistipsits. 46Cai di voi nji dzãtsi cã am amãrtii? Macã dzãc alihea, cãtse nu mi pistipsits? 47Cai easti di la Dumnidzãlu, li ascultã zboarili a Dumnidzãlui. Trã atsea voi nu ascultats, cã nu hits di la Dumnidzãlu.”
Isusul Aspuni ti Nãsu
48Atumtsea Iudeilji lji apãndisirã: “Nu dzãtsem ghini noi cã tini eshti Samaritan sh-cã ai un demon?” 49Isusul dzãsi: “Mini nu am demon, ma tinjisescu Tatãl a meu, sh-voi mi dispretsuits. 50Sh-mini nu caftu mãrirea a mea. Easti un tsi caftã mãrirea a mea sh-giudicã. 51Dealihea ma vã dzãc, cã atsel tsi fatsi zborlu a meu, nu va-u veadã pute moartea.” 52Atumtsea Iudeilji lji dzãsirã: “Tora videm, cã tini ai un demon. Abrahamul sh-prufitsilji au murit, iarã tini dzãts: ‘Macã vãrã fatsi zborlu a meu, nu va u veadã moartea pute.’ 53Nacã eshti ma mari di tatãl a nostru Abraham, cai ari murit? Sh-prufitsilji au murit, cai dzãts cã eshti?” 54Isusul apãndisi: “Macã mini mi multumãrescu, mãrirea a mea nu easti tsiva. Easti Tatãl a meu tsi mi multumãreashti, trã cai voi dzãtsets cã easti Dumnidzãlu a vostru. 55Ma voi ninga nu lu avets cunuscut, iarã mini lu cunoscu. Ma s-vã dzãc cã nu lu cunoscu, va s-earam un arãdios ca voi. Mini lu cunoscu sh-lu fac zborlu a lui. 56Abrahamul, tatãl a vostru, s-hãrsea cu nãdia tsi s-videa dzua a vinitãljei a mea, u vidzu shi s-hãrsi.” 57Atumtsea, Iudeilji lji dzãsirã: “Tini ninga nu eshti tsindzãtsi di anji sh-ai vidzutã Abrahamul?” 58Isusul lã dzãsi a lor: “Dealihea, mini ma vã dzãc, ma nãinti tsi s-aminta Abrahamul, ‘Mini escu’.” 59Atumtsea elji loarã chetsri, tsi s-arca cãtrã nãsu, ma Isusul s-ascumsi shi ishi dit templu.
Цяпер абрана:
Ioan 8: BLRR
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце