Luka 1
1
Mbu kwaasǝ Luka yǝ nyorsǝ likarkar wa ɓa
1Ɓeta dem ɓǝn taa me ɓǝ nyor mbu tomsǝ a ɗaaso nwaado ɓa nga nkeesǝ wa. 2Ɓǝ nyor mbu ɓǝ kurasǝ a ee ɓa, ɓǝ wǝrsǝ mbusǝsa ma nuwa ɓosa a ntiiri wa, pa ɓǝn hoota mara sǝra wa, ɗǝm ɓǝ tomaa nkee mara Kaa ra wa. 3Tiyafulus yaa kwang, tomsǝ maaso wa niina ma nkweera na, nǝ sengge mbusǝsa nsaad a ntiiri tom keke nǝ nyor mbu ɓa fin fin, 4me ngǝ ma ɓongtǝrato mbu ɓaa fǝɗkǝ ngǝsǝ ɓa.
Ɓa na ee me ɓaakǝ haa Yohanna an tom Baptisma ya
5A fer Hiridus yǝsa a kuɓsutu Yahudiya wa, an nek mbusa ke kǝn ǝn yarsǝ me Zakariya, u yǝsa a ɓan nek mbusa a tuwa Abiya ra wa. Toonesi ǝn Alisabatu sase ɗǝm yǝ fiɗ a tuwa Haruna wa. 6Ɓǝ nsaad raɓ kou ɓǝ tom kaɗɗo yabwa a wiiyo a Kaa ni ɓǝn ɓǝ masaka Ankundi wa nsaad nga yǝ nkeesǝ a tom wa. 7Pa ɓǝ sem ma emba ra me Alisabatu yǝ haara ɗǝm ɓǝ nkoon nsaad.
8Kakake fer Zakariya yǝn tom tinima nek mbu seera kwalari ɓa a wiiyo a Kaa ni, 9ɓaa tausǝ a ɗǝɗa ǝn tomsǝ a tau an nek mbusaya wa me yǝ ko a Hit Kaa Urshalima wa me ya nek mbu sera yaɓa. 10Pa fer nek mbusǝsa kansǝwa ɗǝm ɓan bǝɗ Kaa ɓa ɓǝ kau taandi ɓaa kǝnara.
11Pa an timira Kaa ya yǝ weɗa ee usu a sani yǝ nǝɗ a kal nem seya ya a han nek mbu nsera ya ɓa. 12Pa Zakariya yǝ wǝrsǝ an timira Kaa ya wa kanggo aa paa kokto aa ma. 13Pa an timira Kaa ya ya nkee me, “Ngǝ kura kokto ra Zakariya. Kaa yǝ kura kǝnara ngaan, ɗǝm toonage Alisabatu kǝyǝngǝ haa auwe parara, kǝ ngaa ti ɗǝnda me Yohanna. 14Yǝ kǝngǝ tom mbu kuɗa pengpengra ɓa ma kwallo ɓeta dem ɓǝkǝ kwal ma haa usu, 15kiya tom kuɓ kwang kwangya a wii Ankundi ni. Ya fǝta wee mbraa emngwate inabi ma wa ra, hana mbu kasa ti aa taa ɓa ra. Ɓaa ka kung ma Wis Kaa wa a kuda a maasini. 16Ɓeta dem Isra'ila yǝ kǝɓǝsǝn kang a Ankundi Kaa ɓosa ni. 17Yǝkǝ ko a wiiyo Ankundi ni ɗaan a Wiso ma kwangto Iliya wa, yǝkǝ kǝrtǝ senta paapamse a ko a emɓǝsani, yǝkǝ kǝrtǝ ɓeta ɓa ɓǝ kurara ɓa, ɓǝ nfaa, ɓǝ ntii ɗǝm ngaa ɓaa ɓǝn nasǝ kwangto kaa ɓa kiya wǝrkǝ ɓeta u Ankundi wa.”
18Pa Zakariya yǝ taa an timira Kaa ya, “Kǝnǝ maa mini miniu mee mbu ngǝ nkeesǝ ɓa kǝ tom maa sou? Lawa nǝ nkoon ɗǝm toonane meeta ita heren.”
19An timira Kaa ya kakka, “Nǝn Jibrailu ya yǝ nǝɗsǝ a wii Kaa wa ya. Kaa yǝ timinǝ me nǝ wonǝ ngǝ nkee mbu kwalari ɓa. 20Nga wa kǝ ngǝ tom kwaara, ngǝ nkaa ngǝ kanda me ǝn kaa mbu ɓa ka kung ɓa ra, me ngǝ yau ma mara ra u kiya kaɗ ɓongtǝrato me tǝro usu kanan wara.”
21Ɗǝm ɓeta ɓǝn war fiɗo Zakariya wa ɓa senta me mbu kwa mbi yǝ kaɗsǝ dem a Hit Kaa Urshalima wau. 22Pa yǝ fiɗsǝ wa yǝ nkaa yǝ kan ma ɓosa ra pa ɓǝ maa me yǝ wǝr mbu weɗara ɓan a Hit Kaa Urshalima wa payǝn kan ɓǝ mara ma nema yǝ nkaa yǝ kan ma ee isi ra.
23Pa fer tom tinima usu feɗsǝ wa yǝ kang ɗuuru. 24Ndiira usu pa toonesǝ Alisabatu yǝ too kuɗa, paya nfaa ofe wonon. 25Alisabatu yǝ nkee, “A feɗefeɗe me Ankundi yǝ kura nyorataara nan. Yǝ hik nǝ a ɗuura waran a ɗaaso ɓeta wa.”
Ɓa nkee haa Yeso wa
26A ofe mindike ya Kaa yǝ timi an timira Kaa ya Jibrailu Nazarat a put Galili wa, 27yǝ koo a autoone ke ni u ɓaa waasǝsǝ me kaa nsaa wa eɗ kaya ǝn yarsǝ me Yusufu ya tuwa Dauda wa. Ɗenda autoone kara ǝn Maryamu. 28An timira Kaa ya yǝ koo a sani yaa nkee me, “Nkwaata ngase Kaa yǝ tigǝ nem isin! Kaa yǝ ke ma ngiinga.”
29Pa Maryamu yǝ kurasǝ tooma ira wa maa senda ira aa nii yaa senta me wa ndǝ nkamǝra tooma mbi wau. 30Pa an timira Kaa ya, yaa nkee me, “Maryamu, kǝ kura kokto ra, ngǝ taa ti neme wa a Kaa nin. 31Nwa kǝ ngǝ too kuɗa, ngǝ haa auwe parara, kǝ ngaa ti ɗǝnda me Yeso. 32Yǝ kǝ kaɗ wiine kwangya ɗǝm ɓaa kaa yarme Au Kaa ɓoti ya. Ankundi Kaa kiya na han kaɗ kuɓsutu papsi Dauda wa. 33Yǝ kǝ tom kuɓsutu tanda Yakubu ra feɗɗo semra, kuɓsutu usu ɗǝm a feɗɗa.”
34Maryamu yǝ taa an timira Kaa ya, “Pa kǝ tomtomniu si nanǝ ma parara rau?”
35An timira Kaa ya yaa kak yǝ nkee me, “Wis Kaa wa kǝ ham a ngani, kwangto Kaa Ɓoti wa ɗǝm kǝyǝ ngǝ liki. Pa ya sem ma tenatenato raya kiya haa aa yarme Au Kaa ya. 36Hana Alisabatu eɗ ɗange kiya taa auwe a nkooto usu hana yǝ haara siso nawa yǝma kuɗa ofe mindike. 37Mbu Kaa ya nkaa yǝ tomra ɓa semra.”
38Maryamu ya kakka, “Ya waano nǝn hoora Ankundi ra, a lee a kaɗ maaso nga ngǝ nkeesǝwa.” Pa an timira Kaa ya ya faɗ ya lee.
Maryamu yǝ koo a Alisabatu ni
39A fersiso Maryamu yǝ haɗ me yǝ koo a urko a ɗaaso ɗungate put ɓaa Yahudiya ɓa, 40payǝ kana a ɗuur Zakariya wa ya too Alisabatu. 41Pa Alisabatu yǝ kurasǝ tooma Maryamu ra wa, auwe yǝ nyaa a kuɗa sani. Pa Alisabatu yǝ kung ma Wis Kaa wa. 42Yǝ nik kwaro kwang ya nkee me, “Saltǝra a ɗaaso toonawa ɗǝm saltǝra a au kǝnga haa ya! 43Tomtomni maasou, nǝ taasǝ yauma a maa Ankundi yaane ya yǝ wosǝ a naniu? 44Ni kurasǝ tomanga wa au a kuɗa a nani ya yǝ nyaa me ndǝ kuɗa pengpengra. 45Saltǝra ǝn sase yayǝsǝ ma ɓongtǝrato ya me mbu Ankundi nkeesǝ ɓa kǝ kungu!”
Pin nyo Kaa Maryamu wa
46Pa Maryamu yǝ nkee me,
“Huurtu waano yǝ too ɗǝnda Ankundi ra
47ɗǝm huurtu waano ǝn kwal ma Kaa ankonnkweera yaane,
48me yǝ ɗim ma
nase hoora ira hana nǝsǝ hoora ira waaso nǝ mbukake ra.
Nii nga waso kaata kaata ɓeta nsaad a put taandi wa ɓǝkǝ nǝ yar me an saltǝra ya,
49me Yaa Kwang ya tomnǝ mbu kwang kwang ɓan,
ɗǝnda ira me yaa kwang Ɓoti ya.
50Kaata kaata, mayamayato usu ǝn koo a ɗuura ɓaa ɓǝn kurasǝ kokto usu ɓa.
51Yǝ tom mbu kwang kwang ɓa ma kwakwato nem isi wa,
yǝ nwee ɓa ɓǝn toosǝ ɗuura ɓora ɓa ma nsaad ɓaa ɓǝn nheusǝ a senta ɓota ɓa.
52Yǝn ham kuɓsa a kuɓsutu ɓoso,
pa yǝn too ɓa ɓǝsǝ sem mbuka ra ɓa.
53Yǝn nkwee ɓa ma ɗoora ɓa ma mbu kwalari ɓa
pa yǝn tung ɓa ma kǝnaa ɓa nema sal.
54Yǝ kwasi hoora ira Isra'ila,
yǝ ɗim ma mayamayato u
55yǝ tomsǝ Ibrahim wa ma sirta ɓǝsa pakarese wa,
nga yǝ nkeesǝ paapamse yaande wa!”
56Maryamu ɓǝ kaɗ ma Alisabatu ofe taatǝn pa yǝ kang ɗuuru.
Haa Yohanna an tom Baptisma ya
57Pa tǝrma haa usu kungsǝ wa pa Alisabatu yǝ haa auwe parara. 58Pa ɓanda nsaatǝra ɓǝsa ma haato usu ɓǝ kurasǝ me Ankundi yǝ kura nyorataara iran nwa, pa ɓaa kwasi hur kuɗa wa.
59A tǝrma kurkurun ma ɓaa saa wo me aa firi, ɓǝn taa me ɓǝkaa ti ɗǝnda papisi ra Zakariya, 60pa maasi ya nkee me, “Awo! Kaa yar me Yohanna.”
61Pa ɓa nkee me, “Yake semma ɗǝnda sǝra a haato waaso ra.”
62Pa ɓǝ taa papisi ma nema me yǝ nkee ɗǝnda kaa yar au sisi ra. 63Ya taa mbu nyora, pa ya nyor, “Ɗǝnda ira me Yohanna.” Ɓeta nsaad ɓǝ tom mbu nhiinyanhiinya ɓa. 64Nok kǝnso ee isi a wili, yǝ tii kanmǝra yǝn nyoo Kaa. 65Ɓanda nsaatǝra nsaad ɓǝ kung ma kokto a ɗaaso ɗungate put Yahudiya wa, ɓaa kanmǝra mbusǝsa ra nsaad. 66Nsaad ɓa kurasǝ mbu sa wa, ɓǝ ta me, “Au ya kiya kaɗ eɗ mbiu?” Me kwangto Ankundi wa, ke ma sase.
Pin Zakariya wa
67Papisi Zakariya yǝ kungsǝ ma Wis Kaa wa, pa yǝ nawanto me:
68“Nyoo a ko Ankundi ni, Kaa ɓaa Isra'ila ɓa,
me yǝ wo yǝ hik ɓet ɓisan.
69yǝ nik ankonnkweera ya, yaa ma kwangto ya me ndase a ɗuur hoora ira wa Dauda,
70nga yǝ nkeesǝ tangtang ma lau ɓannawanto ɓisa ɓaa ɗekɗek ɓa wa me,
71kiyǝ ndǝ konnkweera a ɓaataker ɓǝnda ni,
ma ɗǝm a nema ɓaa nsaad ɓǝ yaudara ɓa.
72Me maso yǝ weɗasǝ sirta ɓǝnda nyorataara wa,
ma lau yǝ ɗimsǝ waa usu ɗekɗek wa,
73ma kuu wo yǝ tomsǝ paade Ibrahim wa,
74me kiyǝ ndǝ kon a nema ɓaataker ɓǝnda ni wa,
me nda tom tinima kokto sem ra,
75nda kaɗ ɗekɗek nda tom tinima kaa tǝ Kaa ma a tǝro waando nsaad.
76“Ngase ɗǝm auwane, ɓaa kǝ ngǝ yar me annawanto yaa ma kwangto too ya,
me kǝ ngǝ nkaa Ankundi ko a wii usu, me nga wǝrkǝ ɗǝɗa,
77me kǝ ngǝ nkee ɓet ɓisa konnkweera wa
ma lau lee a senda tenatenato ɓoso wa,
78ma lau yauta Kaa ta wa, weɗweɗɗo usu kǝ ham a dani nga wosa ǝn nweesǝ a liuta wa,
79yǝ too ɓaa ɓǝn kaɗsǝ a ham teptep
ma ɓaa ɓǝn kaɗsǝ a kuu woɗɗa wa,
yǝ ndǝ bǝɗ ma ɗǝɗa naupa ra.”
80Pa Yohanna yǝ mbraa yǝ tom kwakwa a huurtu ya kaɗ a sanglo ndub fer yǝ fiɗsǝ a talte a ɓaa Isra'ila ni ɓa wa.
Цяпер абрана:
Luka 1: LLA
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
©2023 Seed Company in collaboration with Language Developers and Bible Translators Association