Röm 11
11
Mo Nøk Ojier Ki Met Ec
1'Ba a pëëö nø, «?Jwøk jiye akwiere?» Ba doo løny. Aani ki dëëra, aana nyï Icriel, ni aana nyikwaar Eeberam naa käla dhi øt Benjamen. 2Jwøk jiye käre kwierø, jøøa kwøŋ ŋäc cøøn. ?Aŋø, gïn wø caan Wëël Jwøki kiper Ilaaja kuyu, kanya dwaalle nyïm Jwøk kiper gïna tïïc jø Icrielli? 3Na kööe, ni «Wui Wuuö Jwøk, nyïïkuk moï anäkge, ni raanyge gïï wø cïp olämme bäätge moï, ni beeye a keera na dööŋ, ni ge manynya man 'näkge aani.» 4?'Ba agïnaŋø na dwøk Jwøki jïre? Ena köö, ni «Jïra da jiy ma kume abïriiø mo yaa gwøø kipera, mo cøŋge kärge këël piny kiper Baal.»#1 Nyeye 19:18 5Kaawat manøgø thuwø, kawaane poot da jiy møøk mo odööŋ, mo ojier Jwøki ki met yie. 6'Ba ni näk beeye met ec, paa gïn mo ogöök ri tïïe këët. Onää ennø nø, met ec ba doo naa met ec këët.
7?'Ba agïnaŋø nø? Icriel akääŋö ki gïna caye. Jøøa näk ojierø beege na joot gø, 'ba jø møga cwïnyge adøøc mo teek, 8kaawat mana gööri,
ni «Gena mooc Jwøki ki wïdhi mo dhïïl
ki nyeŋ mo bäŋ gïn neenge,
ki ïdhi mo bäŋ gïn wïnyge,
këël dïcäŋi en.»#Tiet Ciik 29:4
9'Ba Deebit aköö thuwø,
ni «Kar cam marge wär tïme na abïëp ka akupa,
ki buur mo ge pätha yie, ni coolla kwöri dëëtge.
10Wär nyeŋge tïïc na cööye nee ba nëënge,
ni kööm pëëtge na bäre bäre.»#Dut Pwøc 69:22-23
Pïëm Man Piem Juurre Ki Gø
11?Kiper manøgønø, a pëëö, ?Jø Icriel, tietge acwanyge ni päthge na bäre bäre? Ba doo løny. 'Ba beeye dhal luubö marge na tïm pïëmmi man piem jiy ki gø ni pïï baŋ juurre, kiper nee jø Icriel døøc mo këëö. 12'Ba ni näk dhal luubö marge beeye na käl kwärö jï jø piny, ni kääŋö marge beeye na käl kwärö jï juurre, a teeŋ kwärö mo nyïëdi nø kanyo duu geni yie!
13'Ba kawaane a cäänö ka uuni, u na juurre. Kiper mana näk aana nyïïatwiel jï juurre, tïïc mara wø jiema jiemø, 14kiper nee jø powa ma jø Juuth døøya mo këëö, nee møøk dïge piema ki jöörögø. 15?'Ba ni näk kwier marge na kwier geni ki gø beeye na cäŋ piny dwøk kanya ciel ki Jwøk, a kanyo jïëc geni, ba put tïmö ni beeye kwøwa eni køør thøø? 16'Ba ni näk møø mo okudö ocïbö na jëëdhi na këël wï Jwøk ni ena kur keere na mar Jwøk, møgøgø bäre mana dööŋ ena kur keere thuwø. Ni lweet jaath ni näk mo ena kur keere, bäät jaadhøgø bëët ena kur keerge na mo Jwøk.
17'Ba ni näk bäädi møøk otuur wøk, ni ö ïïni na näk jaath paap ni rap ïïni karge niï nywaagï beeny jaath paac, 18kärï töödö bäät bäätögø. 'Ba ni näk miï töödö, wär ŋäyï ni patha ïïni ni piem lweet jaadhøgø, 'ba beeye lweet jaadhøgø ni wø piem ïïni. 19'Ba kanymør ï köö, ni «Bäädi atuur wøk, kiper naa rap yie.» 20Manøgø adïëri. Gena tuur wøk møn kiper mana kärge jïëy, 'ba ïïni, ï bëëdö karï ka køør ŋäädhe keere. Kiper manøgønø, kärï tïmö niï töödö, 'ba bëëdï niï lwäär. 21Kiper ni näk Jwøk bäät jaadha näk jaath paac käre wiiø, ï ba wiie thuwø. 22Neen bäth yi Jwøk ki teek dwøre, ni beeye dwøl mo teek kiper jøøa pädhö, 'ba beeye bäth yi Jwøk kiperï, ni näk miï puta bëëtö yi bäth ec mare. 'Ba ni näk miï ba bëëdö ree, ï ŋula wøk thuwø. 23'Ba këël jøøke thuwø, ni näk mo ge ba nieŋ ri kweer, ge raba yie. Kiper Jwøk jïre da teek ki man cäŋ ge rap yie. 24'Ba ni näk miï ŋul wøk ka dëër jaath paap ni rap ïïni ri jaadha näk opiidhø paac na gïn mo bäŋ wø tïïc, jööt døc kiree ki man cäŋ bäät jaadha näk opiidhø paac rap ri jaadha kälge ree.
Jø Icriel Ocäŋ Piemmø
25'Ba nyïïmera, a manynya uuni man ŋäyu gïn en na näk tiere okwøŋ kan, kiper nou ba töödu ni reegø nyeŋŋu. Kiper thäk jø Icriel møøk cwïnyge adøøc mo teek këël mano ci kwään juurre moa wäŋŋi yie. 26Kanyøgø nø jø Icriel bëët opiem. Kaawat mana gööri,
ni «Pïëmi oööi ki yi Dhayan,
ni käl ataa wøk cwïny jic Jeekap.
27'Ba man otïmö na luubö mano tuuda ki geni
kanyo wëënna raacge.»#Aydheea 59:20-21; 27:9
28'Ba ki kur luumma nyään na met, jø Icriel atïmö na nyïïmän Jwøk, kiper nee luumma nyään ni met ci jïïu, u na juurre; 'ba ki kur jïër mare, gena omëëye ki køør kwäcge. 29Kiper muuce mo Jwøk ki cwönne paa gïï mo di wellø. 30'Ba kaawat mana kwøŋu bëëtö ni wïthu teek ki Jwøk ni jootu met yi Jwøk ki køør teek wïc mar jø Icriel, 31geni thuwø wïthge atïmö ni teek kawaane kiper nee met ec mana nyuth uuni nee ci jïge thuwø. 32Kiper Jwøk jiy bëët ee twöö ri teek wïc nee met yie wëëk geni bëët.
33Wui, a teeŋ kwäya ŋø ni en jï Jwøk en, ki leec wïc ki ŋäc jammi bëët! A teeŋ ŋøla ŋø ni tiere ba maar kwany na en jïre, ki uutjïëthe mo tietge ba maar joot!
34Kiper «?Aŋa na ŋäc mana en cwïny Wuuö Jwøk,
na aŋa na kwøŋ gø nyuunhnhö ki luubö?»#Aydheea 40:3
35Wala «?Aŋa na cïpö jïgø ki muuy,
kiper nee eni cäŋ cunnö?»#Jööp 41:11
36Kiper beeye eni na ö jammi bëët ki baŋe, ni ööi ka køøre, ni cäätha baŋe. Ajiem en jïre na bäre bäre. Enøgønø.
Цяпер абрана:
Röm 11: AnyuB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia