Zimbazi 21
21
1Muwaha Mulungu, kayitongaga nhumbula yo mutemi,
nha vyono kacihulumyaga cikolongo.
2Nagwe kokwihwesa 'mba vyono, zose zono wukwituma,
wukwituma ze ling'ani.
Ninga wukumbucile vyono,
Muwaha Mulungu, yo kazijelaga zinzila zako.
3Nhondo zose, weze kwituma ze ling'ani na zo mugoloka,
zono zikumwendeza Muwaha Mulungu,
si nho kumulavizya makumbiko.
4I wanhu wabi,
watongwaga no wiwoni hamonga no widunhumuzi wawo.
Ne nghani yiyi, wo wubi.
5Hono wuwe wuli mwihwesa viswanu, kotuga vinji.
Ninga, hono wuwe wuli munhu we papala-papala,
hamba si kotuga vinji.
6No wugoli wono kowutuga mu zinzila zimbi,
wokwajilila musunho, hambi nha wo mutego wako we lifwa.
7Nawo i wabi, wongomezezwaga mu wugazi wawo weneco.
Hambi nha wakulema kwituma ze ling'ani.
8Ne wanhu wahodanji,
wakolaga mu nzila yono yipetyapetizye,
Ninga we ling'ani, wene wetumaga ze ling'ani.
9Yili ciba kwikala kunze mwi'tembe lye kaya,
si nho kuhanga kaya monga, no mucekulu mono yali zozo.
10I wanhu wabi, nhondo zose wekalaga wadabuciye zimbi du.
Kanyhi wasina lusungu kuli munhu wo wose.
11Na lono munhu mwidunhumuzi yakulipicizwa,
sunga no munhu mono yasina mahweso,
nayo mo keyijizizaga lifundo.
No munhu we mahala nayo,
kokwiyijiziza muli zono yafundwa.
12Mulungu yo we ling'ani,
nayo yazimanyile zose zono zikwitumwa mu zikaya ze wanhu wabi.
Nayo kowaletela i wabi wose wongomezwe.
13Na hono wuleme kuwahuliciza waciwa cililo cawo,
Nagwe cililo cako, co kulondola wutazi,
hamba si cohulikwa yaye.
14Na hono yunji yakukolelwe likuwo,
cipegwa cono komupela cinyele,
comupoza likuwo lyakwe.
15Na lono ling'ani yikwitumwa, i we ling'ani,
wakuwa kusangalala muno.
Ninga i wanhu wabi wakongomezwa.
16Nalyo lifwa, liwalindiye wose wono wajiliye,
no kuyileka nzila yo wizuce.
17Na hono wende ze cinyemo-nyemo, divayi,
ne ndigwa swanu muno, hamba si kogolipa yaye.
18Nawo i wanhu wabi, ziwawuyilaga weneco i zimbi,
zono wakuwa kusaka kuwatendela we ling'ani.
19Na mbeka, yili ciba kwikala ku nyika,
si nho kwikala no mucekulu we lizozo,
mung'ung'ulici, kanyhi mukali.
20I wanhu we mahala, wekalaga mu wugoli,
hamonga ne nyemo.
Ninga i walele weyagazaga sawo zawo kolo wazituga.
21Weze muswanu, kanyhi mwihuwilwa,
holeka kokwikala vilo vinji.
Sunga ne wanhu wanji,
wokupela cogopo no kukutendela viswanu.
22No mucekulu we mahala,
yadahile kulisola likaya,
lyono lina no wulindilizi we vilungo,
no kugakumulanga ne majinji gono wagetumbiye.
23Na hono wusace wileje ne mazozo,
ale, wilanjilile mu zinghani zako zono kulongaga.
24Ale, agwe wundajile u munhu mwidunhumuzi,
nane nokulajila u munhu mwiwoni, no mwivuni,
mono si kawacelelelaga wanhu wanji.
25No munhu mudoba, mono si kasakaga kwituma milimo,
ayo yakwiwulaga yali wene.
26Na zizo zono yakwituma,
yakwihwesa 'mba mo kotujila vyono yakusaka.
Ninga u munhu we ling'ani,
kalavyaga hamba kwimila yaye.
27Nayo Muwaha Mulungu,
hamba si yendile i wanhu wabi,
wamulavizye makumbiko, ko muno,
gono gakulawa mu wuhile wawo wubi.
28No wuhomelezi wo munhu mulambi,
si witumbilwaga yaye.
Langa nghani yo munhu mwinenenyhezi, yovumilwa.
29I wanhu we ling'ani, wena witumbilo.
Ninga i wabi, wajelaga kwinoza weneco,
ho wawe nha waswanu.
30I mahala go munhu, hamba lukumyo,
hamba wizuce, si vyosuma kukutaza cinji,
hono Muwaha Mulungu yo yalece kuwa hamonga nagwe.
31Kosuma kuyiwikaniza fwalasi yako so wulugu.
Ninga Muwaha Mulungu du, yo kaletaga wusume.
Cigogo Bible © Bible Society of Tanzania, 2002.