Isaya 53
53
1Nawo wanhu wolopitula watye
“Alo nani 'mbi mono yazihuwila zono cazilonga?
Hamba nani mono yawuwona muwoko wo Muwaha Mulungu muli zizi?
2Hambi nha wali wo wuhile wo Muwaha Mulungu,
u mwitumami wakwe yawiluce nhe cilimwa
cono cihimbize milela mu yisi nghavu.
Yasina futa hamba wuswanu ho cimulanje,
hakawa hasina cinji ciswanu muli mwene,
hamba cono cocikwega nase ho cimulanje.
3Camuzwajiza kanyhi cikamulema
nayo yakangalila magazo no wusungu.
Ninga hasina munhu wo wose mono yali yamulanjile
si camucelelela, cikamuwona si cinji yaye.
4“Ninga mwene yakangalila magazo gono gali
ganojeye gawe getu sese,
wusungu wono wali wucinojeye ciwutuje.
Nase cehwesa vyono magazo gakwe,
wali wulipicizwe wono Mulungu yawuleta.
5Ninga yahomwa so wubi wetu
yakatowangwa so mahodango getu gono cetuma,
Nase cikuponywa so wulipicizwe wakwe wono yawutuga.
Na so wutamiswe wakwe, ase mo ciponyezwe.
6Ase wose cinha zingholo zono zajiliye,
munhu yakubita na nzila yakwe mweneco.
Ninga Muwaha Mulungu yakamulipiciza so sese,
u wulipicizwe wono wali wucinojeye sese co weneco.
7“Yatendelwa vibi muno,
ninga yakangalila ko winenenyhezi, yakanyamala twii.
Yakawa nhe nyana ye ngholo yono yikutegulwa kuwulagwa,
kanyhi kotya nha ngholo yono yikunyonyolwa
wukunzeje wayo, hamba si yalonga cinji ng'o.
8Yakebatwa, yakaling'anizwa, yakategulwa yawulagwe,
na hali hasina mono yawucelelela wusungu wakwe,
mwene yawulagwa so wubi we wanhu wetu.
9Yakawikwa mu citenjelo hamonga ne wanhu wabi,
yakazikwa hamonga ne wagoli,
hamba yawe mwene yali si yetumile wubi,
hamba kulonga zo wulambi yaye.”
10Muwaha Mulungu yakutya nhavi,
“Nene no mweneco nali nyendile yagazwe,
ne lifwa lyakwe,
lyali lyo likumbiko lyono likuleta wunenelwe wo wubi.
Nayo kowawona wanagwe, kanyhi kokwikala vilo vinji.
Na muli mwene, wuhile wangu mo wofisilizizwa.
11Nayo yalaza kuwa yapuluta mu magazo,
hanyuma kolowa na nyemo,
baho ho komanyila vyono kumbe magazo gakwe si gali ga bwete yaye.
U mwitumami wangu mwihuwilwa mono nyendezwe nayo,
yuyo yo kowudinghula wuling'anizwe wa wenji,
nane nowanenela ku soko yakwe.
12Holeka nane nomupela lilumbo yiwaha,
hamonga ne wanhu we lilumbo liwaha,
kanyhi hamonga ne wanhu wono wali vilungo.
Hambi mwene nha yelavya wumi wakwe mweneco
sunga ko ku wufwe.
Yakawalilizwa hamonga ne wanhu wabi.
Yakawudinghula wubi wa wenji,
yakawalombela ho wanenelwe.”
Cigogo Bible © Bible Society of Tanzania, 2002.