Isaya 10
10
1Woyi hee kuli'nye!
Mono si mukunoza ling'ani langa mukuwewonela wanhu wangu.
2Nayo yo yikuleka mukuwewajiza waciwa,
mu zinghani zawo ze ling'ani,
ho walece kutuga ling'ani yawo.
Kanyhi na yiyi yo yikuleka mukuwasolela zisawo,
i wacekulu wono wafwiliywe ne walume zawo,
na ye wana wono wasina walezi wawo.
3Hamba monozaci kolo Mulungu yakumulipicizenyi?
Hamba monoza nhawule,
kolo yakumuletelenyi magazo ku wulawa ku yisi yo kutali?
Hamba motiziza hayi hene mukalondole wutazi?
Hamba hayi hene hono mozihundika zisawo zenyu?
4Hambi wose nha mowulajilwa ku wulugu,
hamba mosolwa nhe wafungwa.
Ninga hamba nhavivyo,
likuwo lyo Muwaha Mulungu,
si lyoduma ng'o,
langa kojendelela kuwugolola muwoko wakwe ho yalipicize.
Mulungu yakumwitumamila Mutemi we Ashuli
5Muwaha Mulungu yakatya,
“Gwe Ashuli!
Ashuli go nghome yangu yono nokwitumamila
ho niwalipicize wawo wono niwakoleywe likuwo.
6Nowategula Waashuli wakalihome likungugo lyono lisina cihuliko,
wono wanghoza likuwo.
Nowategula wakasole vinhu mateka,
kanyhi wakahize no kuwakanyanjiza wanhu kotya nhope mu zinzila.”
7Ninga mwene mutemi wa Ashuli,
nha yekondelezeze lukulu kuli zo wuwulaji mu mutima wakwe.
Holeka yewikanize ho yongomeze makungugo menji.
8Kanyhi yakwilumba yakutya,
“I wawaha wose we wasilikale wangu wo wulugu, wose watemi!
9Ane nagasuma makaya ga Kalino,
na Kalekemishi,
hamonga ne makaya ga Hamati, na Alipadi.
Kanyhi nghazisuma Samaliya na Damesiki.
10Nghawugolola muwoko wangu
no kuwalipiciza wa mu wutemi wono wahembaga vihwani,
kanyhi vihwani vinji muno kuciza vya ku Yelusalemi na Samaliya.
11Nghayongomeza Samaliya hamonga ne vihwani vyayo vyose.
Holeka na Yelusalemi nayo,
noyitendela nhavivyo,
hamonga ne vihwani vyono wanhu wakuvihemba kuko.”
12Kanyhi u Muwaha Mulungu yakutya nhavi, “Ninga nane kolo nakondya kuzinoza mwi'tunda lya Sayuni na mu Yelusalemi, nolomulipiciza u mutemi wa Ashuli ku soko yo widunhumuzi wakwe no wiwoni wakwe wose.”
13Nayo mutemi wa Ashuli,
yakwilumba yakutya,
“Ane nha nazituma zizo zose
kwe vilungo vyangu nene no mweneco.
Ane nili vilungo,
kanyhi nina mahala, kanyhi nili musugu.
Hambi nha nayiwusiza lukulu mipaka haciligati ye makungugo,
nghasola sunga ne vinhu vyawo
vyono wali wewutiye mu viwutwa vyawo.
Nane nghawa nha nghambaku,
nghawakanyanjiza i wanhu wono wekalaga mumo.
14Ne makungugo gose ga mono'nze,
gakawa nha manhuli ga ndeje,
nghakongholeza zisawo zose mu nzila mhelu du,
kotya munhu mono yakutondola magangha.
Hamba hasina mono yagolola libawa,
hamba mono yanyhenjela lwanji!”
15Ninga Muwaha Mulungu yakutya nhavi,
“Mukwihwesa nha vyono hongo nhemo,
yosuma kumulonjela munya nhemo,
yiwe kutya nha vyono yene yo yina lilumbo,
yicizize munya nhemo?
Hamba musumeno ma,
wo wina lilumbo wumucizize mono yakuwitumamila?
Sunga ne nhumbi yo si yikuwa kumugumila munhu,
langa munhu yo kayigumilaga nhumbi.”
16Ninga Muwaha Mulungu we mihanga,
koleta nhamwa yawalipicize wose wono wajinile.
Nawo wotuga wusungu wukali muno mu miwili yawo.
17U Mulungu mono wo wuzelu we Waisilayeli, kolowa moto,
u Mulungu mono yelile we Waisilayeli,
kolowa malambi ga moto,
mono kolovitakamiza vyose mwi'zuwa limonga,
hamonga ne mamivya ne mabijili.
18Nayo mbago ye nhojo,
hamonga ne migunda miswanu,
vyose vyolohodanjilwa lukulu,
nha vyono litamwa libi, limuhodangaga munhu.
19Ne mibici yayo ya mu mbago yono yolosigala,
yolowa micefu muno muno,
yono sunga no mwana mudodo kosuma kuyiwala.
Wuwuye wa wono wowa wasigaye
20Ne vilo vikuza, vyono i wanhu wa Isilayeli wono wolopona, si wololyegamila kanyhi likungugo lyono lyamulipicizenyi ng'o. Langa wolomwitumbila Muwaha Mulungu, u Mulungu mono yelile wa Isilayeli. 21Ne wanhu wacefu wa Isilayeli, wolomuwuyila Mulungu we vilungo. 22Hamba yiwe lulo i wanhu wa Isilayeli wolowa wonjezeka wawa wenji muno nho musawawa wa mwi'lenga, ninga wacefu wolowuya. No wongomezwe wuwikanizwe so wanhu, nawo wuli baho du. 23Na mbeka u Muwaha Mulungu, u Mulungu we mihanga kolo wuleta wongomezwe du nha vyono yatemya mweneco.
Muwaha Mulungu koyilipiciza Ashuli
24U Muwaha Mulungu we mihanga yakuwalonjela i wanhu wono wekaye ku Sayuni, yakutya, “Ale, mulece kuwogopa Waashuli, hamba wawe wamwiwonelenyi 'nye, nha vyono Wamisili wamwiwonelenyi. 25Hambi nha cikali cipango cidodo du ane noleka kumulipicizenyi, hanyuma niwapitucile nawo niwongomeze. 26Ane no Muwaha Mulungu we mihanga, nowakunanga no mukotya wangu, nha vyono nawakunanga i wanhu wa ku Midiyani he'bwe lya Olebu. Nowalipiciza Waashuli, nha vyono nayilipiciza Misili. 27Ne vilo vivyo kolo vyaza, nomuwusenyi mu vilungo vye Waashuli. No lubano lwawo, si wolowa mutegulo kanyhi mu mawega genyu.”
Walugu wakwinjila
28I walugu wali wakondya kulisola likaya lya Ai!
Wakawa wakolela mu Migiloni!
Wakavileka vinhu vyawo ha Mikimashi!
29Wakalowoka cilowoko,
wakagona ha Geba!
I wanhu we cikaya ca Lama wenjilwa no woga wuwaha.
Nawo wanhu wono wekalaga mu Gibeya cikaya co mutemi Sawuli,
wakondya kutiza wose.
30Ale muzoze anye nyo wanhu wa Galimu!
Nanye nyo wanhu wa Layisha, muhulicize!
Nanye nyo wanhu wa Anatoti, mupitule!
31Ale, mulanje i wanhu wa ku Madimena
na wa ku Gebimu weza kutiza, ho weponye.
32Ne zuwali, walugu wakondya kwinjila mu cikaya ca Nobu,
na kuko wakwikamanga zingumi zawo mwi'tunda lya Sayuni,
mwi'kaya lya Yelusalemi.
33U Muwaha Mulungu we mihanga,
kowaleka webamilize hasi nhe manhambi gono gakudumulwa mwibici.
U wiwoni no widunhumuzi wawo,
wowuswa, nawo wonyetywa.
34Nayo Muwaha Mulungu,
kowadumula wagwe nhe mibici,
yono yili haciligati ye mbago,
vyono yikuwa kutemangwa ne nhemo yiwa kugwa hasi,
nha vyono ne mibici miswanu ya Lebanoni yose yogwa!
Cigogo Bible © Bible Society of Tanzania, 2002.