Muganuzi 1
1
I mikalile ya mono'nze, yo nghani ya bwete du.
1Azi zo nghani zo muganuzi, u mwana wa Dawudi, mono yali mutemi ku Yelusalemi.
2Yo nghani ya bwete du, yo nghani ya bwete du,
nghukulonjela mbeka ane no muganuzi!
Vinhu vyose, yo nghani ya bwete du!
3Munhu kamotaga ci cici mu wipiganze wakwe wose wa mono'nze?
4Ndelo na ndelo zipulutaga,
na ndelo zinji kanyhi zikuza,
ninga yinze, yene yikalaga cibitilila.
5Lizuwa nalyo lisosomokaga,
kanyhi lizuwa liswezaga,
likubita musunho muno hanhu hono lilawaga.
6Nayo mbeho yiputaga wulawilila lubavu lwe takama,
yiwa kuputa kanyhi no lubavu lwe sumuka,
yiputaga kali kenji du,
akuno yikupilima-pilima no kuwuyajila kukolela
mu wukolo wayo we nhondo zose.
7Ne makolongo gose nago gahulumililaga kwi'lenga,
ninga 'lanje, lilenga si limemaga yaye hamba hadodo,
nago makolongo, kuko kono gahulumililaga,
kanyhi kuko ko galawililaga.
8Ne zinghani zose, ziletaga mukatalo du,
mukatalo muwaha si wakulonga.
Meso getu nago, si gegutaga yaye no kulanga,
ne makutu getu nago,
hamba si gegutaga yaye no kuhuliciza.
9Na zono zejela katali,
zo zizo du zono zokwijela kanyhi na lulu,
na zono zetumwa katali,
zo zizo du zono zokwitumwa kanyhi na lulu,
mono'nze musina nghani mhya, hamba monga.
10I wanhu watezaga, “Lanje, ayi nghani mhya,”
kumbe nghani yiyo,
yali yili baho du ku wulawa katali,
na lono cali cikali nalelwa.
11Na mbeka, hasina munhu mono kozikumbucila ze katali,
hamba mono kozikumbucila zono zikuza.
Ku wulawa lulu na mu vilo vyono vikuza.
Zono yaziwona Muganuzi
12Ane no Muganuzi, nali nili mutemi we Waisilayeli, kuko ku Yelusalemi. 13Nane nghapiligala muno kuzilondola-londola kwe mahala, no kuzisunjilila muno muno zose zono zikwitumwa mono'nze yiyi. Nawo wuwu wo mulimo muwaha, wono Mulungu yawapela wanhu. 14Nane nghukulonjela, naziwona zose zono zikwitumwa mono'nze yiyi vyono, yo nghani ya bwete du, kanyhi wo wigaze du wono wusina cambuzi.
15Naco cono cipetizye,
si cosuma kugoloswa,
naco cono cili hasina,
si cosuma kuwalwa.
16Holeka mu wihwese wangu nghawa kutya, “Netujila mahala menji muno, kuciza wose wono wanongolela kuwa watemi mu Yelusalemi. Heya, alu nakondya kumanya nhunizo ye mahala co cici.” 17Nghapiligala muno muno ho sume kumanya wisimajile we mahala, no lukwale, no wulele. Ninga nghamanya vyono, wunoza nhavivyo, wo wigaze we bwete du, wono wusina cambuzi co cose.
18Hambi nha mu nghango yono kocila kuwa na mahala menji,
yo nghango yiyo du kanyhi,
yono kocila kwipela u wu wula mulamu mu nhumbula yako,
na mu nghango yono wukucila kuwa no wumanye winji,
ale yo nhavivyo kanyhi vyo kocila kwiyonjelezeza wukalale mu nhumbula yako.
Cigogo Bible © Bible Society of Tanzania, 2002.