Lóma 4
4
Ə zə̂u yi ə́ lə ghʉ̌ Sê fûŋ Ábələhâm ńgó ŋuu ndʉŋ-ndʉŋ mbi zʉ́
1Lə̂ mpfu wo, n ngwo lǎʼ có no yi ə́ náŋtə́ Ábələhâm yi a pə̌ mə́ngâa-njʉʼ wághʼə. Ə zə̂u yi a lə lǎghʼ ndʉʉ mətəʉ ye ngwô ə̂ hó? 2Sê lə ghíʼi ngí fúŋ Ábələhâm ńgó ŋuu ndʉŋ-ndʉŋ mbi zʉ́ ə́ ndéitə́ pə́ lə̂ məfaʼ mé, mə́i mboʼ a lə lâghʼ ńŋáʼtə́ gháʼate. Lə́ mboʼ a lə kûʼ yé lə̂ ndághʼ ńŋáʼtə́ mbi Sê po. 3Ə́ yaa ngǐ pə́, ŋwaʼa Sê pə̂ ndâʼ ngô: «Ábələhâm lə ghwô pə̂i-ntə̂ʉ nzəm Sê, a lêitə mə́u, ə́ fúŋ yé ńgó ŋuu ndʉŋ-ndʉŋ mbi zʉ́.» 4Ŋuu lə̌i fâʼ shʉʼʉ, a pfû məntsoʼó-faʼ mé; məntsoʼó-faʼ mêi kâa pə̂ yé ńgó pə́ maʼ pou yé, ə̂ zə̂u yi a yǎa ngwǒ lə̂ ngwô ńté faʼ ye. 5Lə́ ŋuu kə́ ndə́iʼ faʼ yé po, lə́ ngwǒ pə̂i-ntə̂ʉ nzəm Sê yi mboʼ a fûŋ ngaŋə-məfaa ńgó ŋuu ndʉŋ-ndʉŋ mbi zʉ́, mə́i mboʼ zʉ́ Sê lêitə lə̂ pə̂i-ntə̂ʉ ngaŋ, ə́ fúŋ yé ńgó ŋuu ndʉŋ-ndʉŋ mbi zʉ́. 6Davîd lə lâʼ no ńté ŋuu yi Sê fûŋ yé ńgó ŋuu ndʉŋ-ndʉŋ mbi zʉ́, tə́ leitə́ lə̂ mbə̂u məfaʼ mé lǎghʼ ḿbə́ ndʉʉ-mboŋ, a lə lâʼ ngô:
7«Pəndʉʉ-mboŋ ə̂ pye pi Sê lyəghʼə məfaa ghap, ə́ mbóu mvə́rə́ məno tə́poŋ máp!
8Ndʉʉ-mboŋ â ŋuu yi káa Nde pə́ ncôghʼ yé məfaa ye nou no!»
9Zêi yo no yi ə́ náŋtə́ pəndʉʉ-mboŋ lo, ə́ gháʼa mbə́ pə́ ndaʼ yi pye pi pə́ lə púʼ gháp áa? Ə́ ngə́! Ə́ kə́ mə́ nâŋtə mbaa pye pi káa pə lə púʼ yé gháp záp lə́wó. Kwaʼ lə́nə́ʉ, paghʼə fǔ ngěi lə̂ ndâʼ ngô: «Ábələhâm lə ghwô pə̂i-ntə̂ʉ nzəm Sê, a lêitə mə́u, ə́ fúŋ yé ńgó ŋuu ndʉŋ-ndʉŋ mbi zʉ́.» 10Ə́ lə lei gháʼá Sê poŋə́ fúŋ Ábələhâm ńgó ŋuu ndʉŋ-ndʉŋ mbi zʉ́? A lə ghí fúŋ Ábələhâm ńgó ŋuu ndʉŋ-ndʉŋ mbi zʉ́ mə́i pə́ púʼ mə́ yé, kəʉ mə́i pə́ kə́ púʼ yé? Ə́ ngə́, Sê lə ghí fúŋ yé yə́rə́ mə́i pə́ kə́ púʼ yé yé, zei yo no lə lei pə́ poŋə́ púʼ yé. 11Sê lə fúŋ Ábələhâm ńgó ndʉŋ-ndʉŋ mbi zʉ́, pə́ tâa mboŋə́ púʼ yé. Ə́ mbúʼ yé zêi pə̂ tâʼ ləiʼi. Ləiʼi zêi laghʼ ńdâʼ ńgó Ábələhâm lə ghwô pə̂i-ntə̂ʉ nzəm Sê, a lêitə mə́u, ə́ fúŋ yé ńgó ŋuu ndʉŋ-ndʉŋ mbi zʉ́, záʼa-ndě pə́ poŋə́ púʼ yé. Ə́ leitə yə́rə́, Sê ghʉ̂ Ábələhâm cʉ̂ʼ tə́ pə pye pə́tsəm pi gháp pə́i no Sê tə́ ghó pə́ púʼ gháp, ə́ pə̂ yə́rə́, Sê kə̂ fúŋ gháp záp ńgó pye ndʉŋ-ndʉŋ mbi zʉ́ lə́wó. 12Sê lə ghʉ Ábələhâm kə̂ ncí mbə́ tə́ pə pye pi pə́ púʼ gháp lə́wó. No pə́ pə́ ńgó gháp ŋə̂i ghíʼ Ábələhâm lə ŋə̌i yé, ə́ mbou ngwô pə̂i-ntə̂ʉ nzəm Sê ghíʼ tə́ wághʼə Ábələhâm wêi lə ghwô yé pə́ poŋə́ táa púʼ yé.
Ə zə̂u yi Sê ŋə̂ lə́ pye pé ə́ ndeitə lə̂ pə̂i-ntə̂ʉ
13Sê lə ghʉ̂ ndaʼá lə̂ ngʉ́ ŋə́ ndəu nzʉ̂ tsəm lə́ Ábələhâm gháp pə ngər ye tsəm. Lə́ káa Sê lə ghʉ̂ yé zêi yo ndaʼá ńté pə́ ńgó Ábələhâm lə ŋəi ghíʼ ləpə̌ʉ pə́ ntúŋú. A lə ghʉ zěi ńtê pə́ ghíʼ a lə leitə́ lə̂ pə̂i-ntə̂ʉ Ábələhâm, ə́ fúŋ yé ńgó ŋuu ndʉŋ-ndʉŋ mbi zʉ́. 14Ə́ yǎa mbə́ yi mboʼ ndaʼ pye pi gháp ŋəi ghíʼ ləpə̌ʉ pə́ ntúŋú, lə́ ghwo zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ pye, mə́i mboʼ pə̂i-ntə̂ʉ nzəm Sê kə̂ mpfûtə yé ŋuu lə̂ có zə̂u po, lə́u ndaʼá yi Sê lə ghʉ̌ lêi kə̂ mbyêr yé wó po. 15Ŋuu lə̌i ndə́iʼ pə́ ŋəi ghíʼ ləpə̌ʉ pə́ ntúŋú po, Sê záŋə-lóŋ lə́ zʉ́. Lə́, káa ŋuu pə́ ngwʉ̂ yé ləpə̌ʉ, ə́ yʉʼ yi kâa ləpə̌ʉ pə̂ yé wó.
16Ghíʼ ə́ kə́ mbə́ yə́rə́ lə̂, Sê lə ghʉ ndaʼá ńté ghíʼ pye-mə́soŋ pə́i no yé, ńjí ńgó ə́ lei yə́rə́, Sê lâghʼ fuʼ zêi ḿmâʼ pou ngər-ndə̂ Ábələhâm tsəm, tə́ pfû có zə̂u, lə́u ə́ ŋə̂ pə́ ndaʼ mbó pye pi gháp pə́ ŋəi ghíʼ ləpə̌ʉ pə́ ntúŋú po, lə́ ŋə́ mbaa mbó pye pi gháp pə́i no Sê ghíʼ Ábələhâm lə pə̂i yé no Sê lə́wó. Ábələhâm, â tə́ waghʼə pə́tsəm. 17Ə́ ghíʼ pə́ ŋwáʼá cər ŋwaʼa Sê ńgó Sê lə laʼ lə́ Ábələhâm ngô: «N ndə laghʼ gho ńgʉ̌ mə́ngâa-njʉʼ tâʼ tə́koʼ nou lâʼ.» Ábələhâm pə́ mbi Sê, ə́ mbə́ tə́ waghʼə, ə́ zʉ́ yi a lə pə́i no Sê. Ə́ Sê yi a ghʉ pəpfû zʉ̂ʉ lə̂ ləwʉ̂, ə́ mbou ngʉ́ məzə̂u mi kâa lə pə̂ yé wó pə̂ wó.
18Ábələhâm lə ghwô cər ntə̂ʉ zʉ́ ńgó ə zə̂u yi Sê lə ghʉ̌ ndaʼá mə́u lə̂ ngʉ́ ŋə́ lə́ zʉ́, a ghʉ̌ ŋə́. Tə mbaa pə́ ghíʼ məno tə nzáa lə pə́ nyárə ńgó mboʼ ə́ kə̂ mbə̂ yé no po, lə́ a kə̂ ngwô pə̂ pə̂i-ntə̂ʉ nzəm Sê. Ə́ leitə yə́rə́, Sê ghʉ̂ a cʉ̂ʼ «mə́ngâa-njʉʼ tâʼ tə́koʼ nou lâʼ», ə̂ ghíʼ Sê lə lǎʼ lə́ zʉ́ ngô: «Jwó mbə̂u yi ngər-ndə̂ zô táa lǎghʼ záa.» 19Sê lə ghí laʼ lə́ zʉ́ yə́rə́, a ghwô no nguʼ nkʉ, lə́ káa pə̂i-ntə̂ʉ yé pwôr yé, tə mbáa pə́ ghíʼ ə́ lə ghí pə́ mə́i a cəghʼtə́ mə́, ə́ mbou mə́ njî ńgó ngwě ye Sará nkə̌i. 20Káa a láʼ mʉ̂ŋtə yé leʼé có lə̂ zə̂u yi Sê lə ghʉ̌ ndaʼá lə̂ ngʉ́ ŋə́ lə́ zʉ́, tə ncʉ́ʼ yə́rə́, pə̂i-ntə̂ʉ ghʉ a kʉ́ʼʉ tə̂itə́ təitə́; ə́ mbou mə́ ngûʼtə Sê mpfu tsəm. 21A pôu sâa-sǎa mə́ njî cər ntə̂ʉ zʉ́ ńgó Sê kûʼ lə̂ ngʉ́ zə̂u yi a lə ghʉ̌ ndaʼá mə́u lə̂ ngʉ́ ŋə́ lə́ zʉ́ pəutə. 22Ə̂ zə̂u yi ə́ lə ghʉ̌ «Sê fûŋ Ábələhâm ńgó ŋuu ndʉŋ-ndʉŋ mbi zʉ́.» 23Pə́ laʼ cər ŋwaʼa Sê ngô: «Sê lə fúŋ Ábələhâm ńgó ŋuu ndʉŋ-ndʉŋ mbi zʉ́», kâa pə lə lâʼ pə́ Ábələhâm zʉ́ zə́ghʼə́. 24Pə́ lə laʼ paghʼə zághʼə lə́wó. Sê ghʉ̌ fúŋ wághʼə ńgó pye ndʉŋ-ndʉŋ mbi zʉ́, ńté ńgó paghʼə ghwo pə̂i-ntə̂ʉ nzəm zʉ́ yi a lə ghʉ̌ Nde wághʼə Yěso Kəlísto zʉ̂ʉ lə̂ ləwʉ̂ təcər pəpfû. 25Sê lə féi yé ŋə́ pə́ jwî yé ńté məno tə́poŋ mághʼə, ə́ mbou ngʉ́ a zʉ̂ʉ lə̂ ləwʉ̂, lə̂ ndêitə́ yə́rə́, ə́ fúŋ wághʼə ńgó pye ndʉŋ-ndʉŋ mbi zʉ́.
