Lóma 2
2
Ə mbə̂u yi Sê ghʉ̌ lǎghʼ záʼ kôr təcər páp pə pye-mə́soŋ
1Gho yi o tô məlǒʼ pye, o lə̌i mbə́ pə̂ wǒ, mə́i Sê ghʉ̌ nyêr yé tə́ tághʼ ngwôʼ tû gho po. Ńté ńgó o lə̌i mə́ ntô məlǒʼ pye, ə́ mbóu mə́ ngʉ̂ məno mi gháp ghʉ měi, mə́i o sʉʉ gháʼá mənkʉ ńdághʼ shərə́ ńkə̂r mbəʉ zô pə́ gho. 2Paghʼə pə̌ njî ńgó Sê zâʼ kôr pye pi gháp ghʉ mbə̂u məno zêi pə̂ ndʉŋ-ndʉŋ ghíʼ ə́ yǎa mə́ ntúŋú. 3Gho yi o tô məlǒʼ pye ńté məno mi gháp ghʉ̌, lə́ ə́ mbou mə́ ngʉ̂ zô měi, o kwaŋ ńgó o ghʉ̌ khʉ̌ záŋə-lóŋ Sê tə cwór áa? 4O lə̌i nkwáŋ yə́rə́, o jî ńgó o laghʼ ńgwâghʼ gháʼá Sê; lə́ mə́i â kwaʼ ŋuu shʉʼʉ, ə́ ngwǒ shəghʼ-ntə̂ʉ, káa pə́ fátə́ ntâghʼ yé ngwôʼ tû ŋuu. Koo o pə́ njî ńgó Sê ghwo poŋə-ntə̂ʉ nzəm gho gháʼá ə́ ndaghʼ ńdôu ńgó ô kə́p cǐ tə́poŋ yi o ghwǒ mo? 5Lə́ o pə̌ təi tû, ə́ ndəʼ lə̂ kə́p cǐ tə́poŋ yi o ghwǒ. Ə́ ngʉ yə́rə́ gháʼá ńdaghʼ ńshûŋ tə́koʼ záŋə-lóŋ Sê ńcôghʼ ndəu gho, ə́ leʼé yi a wo nyarə záŋə-lóŋ ye; ə́ mbə́ leʼé yi a wo nzáʼ kôr təcər páp pə pye-mə́soŋ ə́ ndʉŋ-ndʉŋ ghíʼ ə́ pə́ ntúŋú. 6Ə́ ghʉ̌ pə́ leʼé wêi, ə Sê lêitə́ lə̂ məfaʼ wǒwó, ə́ ncóghʼ yé lǎa pô zʉ́. 7A ghʉ̌ ŋə́ ləcwôr tə me lə́ pye pi gháp cî sâʼ təʉ ə́ ngʉ̂ pə̂ məno shʉʼʉ, ə́ ndaghʼ ńdôu ńgó Sê jwó gháp shʉʼʉ, ə́ fə́tə́ gháp, ə́ mbou ngʉ́ gháp kə́u cər lənyâŋ yi káa ŋuu pə́ kwʉ̂ yé cər wó. 8Lə́ ə́ ngwǒ lə́ pye pi gháp təi tû ə́ ŋə́ mbó Sê, ə́ ndə̂ʼ lə̂ ŋə̂i ghíʼ no lə́nə́ʉ pə́ ntúŋú, ə́ ŋə̂i pə́ lə̂ laŋə́-ndə̂u no tə́poŋ, Sê ghʉ̌ nyárə́ gháp ńgó a ghwo záŋə-lóŋ gháʼate nzəm páp. 9A ghʉ̌ ghʉ̌ pye pə́tsəm pi gháp ghʉ məno tə́poŋ ghí pə́ jwô ngwôʼ, ə́ mə́ fʉ̂; a ghʉ̌ lǔŋ mbi jǐ lə́ pəyúda, ə́ páatə́ kə́u lə́ pye pi káa gháp pə́ gháp pəyúda. 10Lə́ ə́ wǒ lə́ wǒwó yi a ghʉ məno shʉʼʉ, ə́ jwó yé shʉʼʉ, ə́ pǒu fə́tə́ yé, ə́ cóghʼ mə́shwítə cər ntə̂ʉ zʉ́; ə́ jǐ lə́ pəyúda, ə́ páatə́ lə́ pye pi káa gháp pə̂ gháp pəyúda, 11ńté ńgó káa Sê ghwô yé peʼe-mbî təcər pye-mə́soŋ.
12Ŋuu tsəm yi a ghʉ məfaa tə́ pə́ njî ləpə̌ʉ Mə̌usə̂i ghʉ̌ lyəghʼtə́ pə́ tə jǐ zěi; lə́ ŋuu tsəm yi a ghí ghʉ̌ məfaa, ə́ mə́ njî ləpə̌ʉ Mə̌usə̂i, Sê ghʉ̌ lǎghʼ pə̂ ləpə̌ʉ zêi ə́ záʼ kôr yé. 13Ńté no Sê kâa pə́ fúŋ yé ŋuu ńgó â ŋuu ndʉŋ-ndʉŋ mbi zʉ́, ə́ ńté pə́ ghíʼ a pə̌ nzûʼ ləpə̌ʉ, a fûŋ yé ńgó ŋuu ndʉŋ-ndʉŋ mbi zʉ́, ńté ghíʼ a zǔʼ ləpə̌ʉ mbou mə́ ŋə́i ghíʼ zěi pə́ ntúŋú. 14Pye pi káa gháp pə́ pəyúda kâa pə́ njî gháp ləpə̌ʉ Mə̌usə̂i, lə́ pəcó pye təcər páp pə̂ nzûʼ ləpə̌ʉ zêi ndəu páp, ə́ ngʉ ghíʼ ə́ pə́ ntúŋú. Ə pye pêi kâa ghwô gháp ləpə̌ʉ, lə́ záp ləpə̌ʉ fû mbə́ ndəu páp. 15Ə́ pə́ yə́rə́ ə́ ndághʼ ńnyarə́ ńgó məfaʼ mi ləpə̌ʉ pə́ ntúŋu ńgó pə́ fâʼ, ə Sê lə ŋwaʼa cər məntə̂ʉ páp, məkwaŋtə máp fû mə́ nyárə ńgó ə́ pə́ yə́rə́. Ə́ pə̂ mpfu yi gháp ghʉ̌ no tə́poŋ, mbəʉ záp feʼ gháp, ə́ mbə́ mpfu yi gháp ghʉ̌ no shʉʼʉ, gháp ghwo lətsei cər məntə̂ʉ páp, ə́ pə̂ yə́rə́ ndághʼ ńnyárə ńgó gháp ghwo ləpə̌ʉ zêi cər məntə̂ʉ páp lə́nə́ʉ. 16Yo məno mi ə́ ghʉ̌ kwatə, ə́ leʼé yi Sê ghʉ̌ leitə́ lə́ Yěso Kəlísto, ə́ fěʼ pye lə̂ məno mi ə́ pə́ ləlwǒ cər məntə̂ʉ páp, ə́ ndʉŋ-ndʉŋ ghíʼ Nkəʉ Shʉʼʉ yi məŋ tsətə zěi pə̌ ndǎʼ.
Káa Pəyúda pə́ ŋə̂i gháp ghíʼ ləpə̌ʉ Mə̌usə̂i pə́ ntúŋú
17Gho yi o pə̌ ndaʼ ńgó ô ŋuu pəyúda, ə́ mə́ ŋâʼtə ńgó o laghʼ ghíʼ o pə̌ ŋəi lə̂ ləpə̌ʉ Mə̌usə̂i, ə́ mbə́ ŋuu Sê; 18gho yi o pə̌ njî zə̂u yi Sê pə̌ koŋ ńgó pə ghʉ̂, ləpə̌ʉ lə pou njyéʼ ghô lə̂ ntsuŋú náŋ məzə̂u, ə́ nkǎŋ yi shʉʼʉ; 19gho yi o pə̌ ntsuŋú njî ńgó o kuʼ ŋuu yi mboʼ o ghwô pô fwoghʼ-mə́nyôghʼ ə́ nyarə́ yé laŋə́-ndə̂u, ńgó ô nkeʼ mbó pye pi gháp pə́ cər nzə̌m, 20ńgó o pə̌ njyêʼ pye pi gháp kə́ pə́ njî gháp no, ńgó o pə̌ njyéʼ pye pi jîno záp pyér nkhwóghʼ. O kwaŋ ńgó o pə́ yə́rə́, ńté ńgó o jwǒ ləpə̌ʉ ghíʼ zə̂u lətəi-ndwuŋ yi ə́ pə́ ŋə̂ gho jîno, ə́ mbou mə́ ngʉ́ o jî no lə́nə́ʉ. 21Gho yi o ŋə̂ ntǎghʼ lə́ pye, ńté hó koo o tâghʼ zô mbəʉ lə́wó? Gho yi o laʼ lə́ pye ńgó koo pə́ ju, o pou njû zô ńté hó? 22Gho yi o laʼ lə́ pye ńgó koo gháp ghʉ məghap, o pou ngʉ̂ zô ńté hó? O pə̌ ndaʼ ńgó koo pə́ ghûʼtə məsê, ə́ mbou njû məzə̂u cər məndə̂ məsê máp ńté hó? 23O pə̌ ŋâʼtə no pə́ lə ŋə́ ləpə̌ʉ lə́ gho, lə́ mbou mə́ ngʉ̂ zə̂u yi ləpə̌ʉ zêi pə́ ndə̌ʼ, ə́ ngʉ yə́rə́ ndághʼ ńzoutə Sê. 24Pə́ yaa ŋwáʼá cər ŋwaʼa Sê ngô: «Pei lə̂ ghʉ ńgó pye pi káa gháp pə̂ gháp pəyúda zôutə́ Sê.»
25O lə̌i ngʉ́ zə̂u yi ləpə̌ʉ pə́ ntúŋú, ə́ pə̂ ńgó ləpə̂ yi pə́ lə púʼ ghô lə pfútə́ ghô; ə́ nkə́ ndə́iʼ ŋə̌i ghíʼ ləpə̌ʉ pə́ ntúŋú po, ə́ pə̂ ńgó o kə̌ mbə̂ zô pə́ ghíʼ ŋuu yi pə́ laa kə́ púʼ yé. 26Ə́ laghʼ ḿbə́ ńgó ŋuu yi káa pə́ lə puʼ yé lə̌i ŋə̂i ghíʼ ləpə̌ʉ pə́ ntúŋú, mə́i Sê wo jwô yé yé ghíʼ ŋuu yi pə́ lə púʼ yé po? 27Ə́ pə̂ yə́rə́, ə́ mbə́ ńgó ŋuu yi pə́ jwô pə́ lə̂ mənyôghʼ ńgó pə́ lə púʼ yé, a pôu mə́ ŋə̂i ghíʼ ləpə̌ʉ Mə̌usə̂i pə́ ntúŋú ghʉ̌ cóghʼ fər paa gho, ə́ gho yi koo o pə́ ŋə̂i ghíʼ ləpə̌ʉ pə́ ntúŋú, lə́ mə́i o pə̌ njî ləpə̌ʉ, pə́ lə pôu mbúʼ ghô. 28Ə́ laghʼ ndâʼ ńgó pə́ ghí jí ńgó yo ŋuu pəyúda, káa té pə̂ zə̂u yi pə́ pə́ njwô lə́ zʉ́. Ə́ mbou ngí jí ńgó yo ŋuu yi pə́ lə púʼ mə́ yé, lə́u pə́ lei pə́ lə̂ có ləiʼi yi pə́ jwó ndəu zʉ́ po. 29Pə́ leitə pə́ lə̂ zə̂u yi káa pə pə́ njwô yé, ə́ mboŋə́ jî kwaʼ ŋuu pəyúda, kwaʼ mbúʼ ŋuu pə́ pə́ cər ntə̂ʉ zʉ́, ə́ mbə́ yi Zəghʼə Sê lə́ ghʉ; ə́ mbúʼ ŋuu zêi kâa fú pə́ lə̂ ləpə̂ yi ŋuu ŋə̌i ghíʼ ləpə̌ʉ pə́ ntúŋú. Məkuʼ kwaʼ ŋuu pəyúda wêi fû pə́ mbó Sê, kâa fû pə́ mbó pye-mə́soŋ.
