PAMALANGUNGU 78
78
I Ala dàngu na banjaru-na
1Na ludu lii papekangu-na i Ahawàpu.
Tingiya na lii papekangu-nggu, dou na banjaru-nggu,
tanaü-ha da kareuku-nggu.
2Napa kutiki lawiti dàngu lii pangerangu,
da dekangu la handàka-na napa ku-kaloka-ha,
3da matumbu da parongu-ma dàngu da payema-ma,
da papanii-da da kawunga bokuma.
4Nda ma-pahini-anya la a - anama;
tàka ka bobaru-ya la ana handalaru ma-pandutungu, wàma
rukuna na kodi màkana i MIRI dàngu da paràma-na da ma-bokulu,
dàngu da pawunda-na da pa-hangàtarungu.
5La banjaru Ihirailu na-wuangu-ya na Ukuna,
dàngu na hupu liina la wàlana i Yakupu.
Na paràha-nja da bokunda la mangilu
pa-papeka wànja da anada,
6ka datanda-ya Nyuna paraï ana handalaru ma-pandàkingu,
hi da-pangala-nya la anada nyuda.
7Ba tuna nu nyudambu
da-pahangga-nya na monungu-da lai Ala,
nda da-maromba-nja da pawunda-na,
tàka da-pamàndu-nya na hupu liina,
8ka àmbu dahama-nja da bokuda la mangilu
da makàli kawutaru dàngu katadaku;
nu da ana handalaru makàli tayonggahu pawaida,
dàngu nda da-manundu lai Ala.
9Na kabihu Epuraïmu na mambeni wàngu pana dàngu tandai pana,
napalai la rehi pa-hànjalangu.
10Dapangga-ya na pa-njanjingu-na i Ala lai nyuda,
dàngu nda da-mbuhangu panunju-ya na Ukuna.
11Da maromba-nja da pawunda-na,
dàngu da pa-hangàtarungu pa-paloha-na lai nyuda.
12La hangga bokuda la mangilu, i Ala nawunda pa-hangàtarungu
la tana Mehiru la ma-ndidaru Huangu.
13Nabika-ya na tehiku hi na-papala-nja nyuda;
hama tuna kahiri-ya na wai, ba na-dimbaku-ya.
14La lodu na londaha wàngu karumangu
la rudungu wàngu epi ma-hambila.
15Nabika-ha da palindi watu la maràda telangu,
nawua-nja pa-ngunungu mabundu làndangu.
16Na-paràha-nya na tandula watu pa-paluhungu wai,
hi hama lukuya ba na-lulungu na wai.
17Tàka nyuda pa-daingu-madanya panjala lai Ala,
la maràda telangu da-kawutaru hangganya i Hupu Majangga.
18Da-harawuku pakama-nya i Ala,
ba da-karuhi pangangu pambuha-da.
19Da-ndubaku-ya i Ala ba dapanii,
“Yia la maràda telangu namàka ihu pawua-nda pangangu i Ala?
20Deningu-na ba napalu palindi watu ma-kalatungu,
hi na-mbangatu na wai ba na-lulungu.
Tàka namàka ihu pa-paloku-nya roti
dàngu pawua-nya tolungu na banjaru-na?” wàda.
21Ba narongu-ya nuna i Ala, na-karoruku wànya epi na banjaru-na;
na-hàngga-nanja nyuda hama hukana,
22ba nda dapawai lai Ala,
la kodi màkana na ma-ngalangu pa-pamara-ha.
23Jiapa-kai ba tuna na-paràha-nya na awangu
pa-bunggahu-ha da katonga-na.
24Na-papurungu uhu nggàndumu welingu la awangu,
nu na màna#màna: pangada da tau Ihirailu ba jiaya na-njadangu-da la maràda telangu. Hama tuna wua dalu ma-màrahu-ha dabara. Tàngaru-ya la Lu. 16:14-21 dàngu Di. 11:7-9. ka dangangu.
25Nawua-nja pangangu mabundu làndangu;
dangangu roti maranongu.
26Na-paràha-mbunya pa-hapuputu na ngilu timiru;
ruku kodi màkana na-hadumbalu na ngilu weli lurungu.
27Nduma banjaru-na na-papurungu ma-hawurungu,
hama waraha ba nda pataü-ha danguda.
28Nu da ma-hawurungu napuha-ha la ma-pauma terangu
la winggiru ngia pa-ngiangu-da.
29Hi dangangu lundu mbihuda,
ba mbàda wua-nanja parinju-da paraïna i Ala.
30Tàka ndedi nali-aya na mangàba-da;
hi lupa ba talànga nganguda,
31na-hawuwatu na hànggana i Ala hi na-ndubaku-ha;
da bidi tau dàngu da ma-kaborangu la Ihirailu na-pameti-ha.
32Jiapa-kai ba tuna, na banjaru-na pa-daingu-madanya panjala,
da pawunda-na da pa-hangàtarungu nda da-hàrangu-wa-anya la papawai.
33Tuna nu duka hi na-kanjupu-ya na lurida paraïna i Ala, hama tuna kayeku,
mangàdatu jua-ma-aya la ngala lurida.
34Handàka ningu - handàka ningu pa-pameti-na i Ala la hongada,
hawiangu dapeka halaera dàngu hi da-pambelingu lai Nyuna.
35Danamu-ya ba i Ala maopa-nja nyuda,
dàngu bai Hupu Majangga ma-pamàna-nja nyuda.
36Tàka nyuda da-kakòlulu lai Nyuna,
da patiki-da ma-kambàliku jua-maha.
37Nda da-manundu lai Nyuna
dàngu nda da-pamàndu-nya na njanjina.
38Tàka i Ala nanamu dàngu najàma-nja da njala banjaru-na,
hi nda na-patàlaru-ha.
Nda na-pambirangu bia pa-roputu-ya na karaü etina,
hi nda na-hanubuku-nya na hànggana.
39Nanandi-nya ba ruku lima-nanja manda payatangu-ha,
hama tuna ngilu mali hàmbu manda hili beliha.
40Kanjupu pa-nutakungu-ha pa-kawutaru lai Nyuna,
hi dahàka etiya Nyuna ba la maràda telangu-ha.
41Dakama hili weli - hili welinya i Ala,
da-pahanduka-ya i Ma-matua, na Ala Ihirailu.
42Nda danandi-anya na mbihana Nyuna,
na lodu pahàla-naha welingu la papada,
43ba nawunda-ha da pa-hangàtarungu la Mehiru,
dàngu da pa-maratangungu la maràda Huangu.
44Da lukuda, Nyuna ma-pambeliha wai ria,
hi lupa nda peku unu-danya na waina.
45Na-pamayila-ha wàngu kapelatu panda taü,
hi namàta-nja da tanada ba na-pamolu-nja kapaki.
46Na-patàka-nja ana kataru dàngu kabala,
ma-pambuta-ha da pangangu dàngu da ihi woka.
47Na-paruha-ha da pingi angguru-da wàngu ura watu mboka,
dàngu da pingi kapilitu-da wàngu wai hamburungu kamàndalu.
48Namàta-nja panggàna-ha ura watu mboka da bandada,
dàngu pahira-ha kabàla#ura watu mboka ... kabàla; jàka ndia: kanyaki pa-mangàdatungu jàka ndia hidu pa-nggàbalungu pameti wàngu. da bandada.
49Na-hanubuku-nya na mbeni mbàringu-na na ma-kandulangu
ba nawàngu pa-paràhangu hapamba maranongu ma-butuhu kayeku
hi kiri mbota monungu-da.
50Nda na-roputu-aya na hàngga-nanja nyuda, jàka ndia la paaï-ya na lurida,
tàka na-patàlaru-ha wàngu tàparu.
51Na-pameti-ha da kawunga anada mini
la nimbihu kuru uma tau Mehiru.
52Hi na-kapipi-ya na banjaru-na beri kabàba mbimbi,
nalonda-ha hi dali ningu la maràda telangu.
53La kapipi-naha da-mambiru dàngu nda da-mangàdatu-a,
tàka na muhuda da-tandaningu la tehiku.
54Hi na-karia-nya na banjaru-na la tana matua-na,
la ma-palindingu na pawàhi wikina Nyuna.
55La hangga banjaru-na nanyara-ha da mangu tanangu lai nu
hi napabe - berinya nu na tana
la mbuu ndàba kabihu tau Ihirailu, na banjaru-na,
hi peku ngia-danja da uma tera muhuda.
56Tàka nyuda da-kawutaru dàngu da kamanya i Ala Hupu Majangga,
da hupu liina nda-danunju-aha.
57Da-kandulingu hama tuna da boku la kawunga-da,
dàngu nda pamonu-nja hama tuna tandai pana kaleka.
58Da ndubaku wànya ngia pa-hamayangu la marapu i Ala,
dawuda-ya na pawutangu-na Nyuna wàngu kahala hadada.
59Ba naita-yaka nuna, na-mbumbaru na hànggana i Ala,
hi na-tulaku ailula-ha nyuda.
60Na uma terana Nyuna la Hilu#Hilu: na ngia palumu mbulungu-da lai Ala nggubulu-na na tau Ihirailu ba ndedi na-katangu pareta i Ndautu. na-dunjaku-nya,
nu na ngia pa-ngiangu-na la honga tau pinu tana.
61Napuli-nya na Pàti Pa-njanjingu-na pa-tanawa-nya;
na ninu maü mangunju-na nawàhi-ya muhu.
62Nahàngga-nya na banjaru-na, na mangu na kangeha-na,
namàta-nja ka pameti-ha wàngu hapanda.
63Da bidi minida nahoba-ha epi;
hi nda ningu ma-kanoma-ha da anakaria-da.
64Da ratuda pa-pameti wànja hapanda,
da kawini meti leida nda damàka-a pahii.
65Lumbatu wàna i MIRI hama tuna ma-pawàla welingu la katuda-ya,
hama tuna tau parii mahàla paunu angguru.
66Na-nàhaku-ha da papana hi da kandulingu,
dàngu lundu numaka ba na-pakàku-ha.
67Tàka da wàlana i Yuhupu na tulaku-ha
dàngu nda naleha-aya na kabihu Epuraïmu.
68Na-paleha-na jiaya na kabihu Yahunda,
dàngu na Palindi Hiungu na pambuha-na.
69Na-pahada-nya na Umana hama tuna na ngia pa-ngiangu-na la awangu,
dàngu hi hama tuna na pinu tana ba na-paundu-nya lundu nu - nu.
70Naleha-ya i Ndautu atana,
hi napiti-ya welingu la kabàba banda,
71welingu la ngia pa-radangu-na bai mbimbi,
ka napawa-nya na Ihirailu na banjaru-na Nyuna.
72Wàngu eti tànjina ba napawa-nja paraïna i Ndautu,
dàngu nalonda limaha wàngu lima màpihu-na.
@LAI 1995 Indonesian Bible Society (Lembaga Alkitab Indonesia)