PANGERANGU 29
29
1Nggamu ma-pajarungu mànu jàka panaunya,
jiangu-ma ngeru na-hadànjalu hi nda peku hàmu belina.
2Jàka nayàpa pareta na tau mamola, nambaha eti na rayatu.
Tàka jàka tau akatu ma-kuaha, na-mayila na rayatu.
3Nggamu mambuha-nya na manggàna, na-panggaüru eti amana.
Nggamu ma-panggolu dàngu kawini pahunda, hiru hàru-nanja da nduina.
4Jàka naeti wànya na matànji paraï ma-kuaha, na-kapingatu na paraingu-na.
Tàka jàka na-pangia ngaba niha da àmahu, na-tanyungguru na paraingu-na.
5Nggamu ma-wotungu anguna,
batangu-nanya hiru nduma wikina.
6Na tau akatu nahiru-ya paraï njalana,
na tau tànji na-hangilu dàngu na-paohangu.
7Na tau hàmu napinya na ngabana na tau lamanga,
tàka na tau akatu nda na-jàngapu-aya.
8Na tau ma-mbuhangu pa-paakangu na-kuwaru paraingu,
tàka na tau manggàna na-papeku hàmuya na panggolu.
9Jàka ningu lii pahili la honga tau manggàna dàngu tau nduba,
na tau nduba duna haroputu-ananya tàka hi nariki hi lupa na tumbu na-kanyaüru.
10Na tau tànji eti na-karaü-nya eti paraï tau mawai ilunya nabungu wai ria tau,
tàka na-kahiri-ya paraï tau hàmu.
11Na tau nduba nambeni memangu la hangga,
tàka na tau manggàna duna na-roputu wikina dàngu na-roduku-nya na karaü etina.
12Jàka na-ihili-nya na pulungu kambàliku paraï ma-kuaha,
da panggawi-na da-akatu hàlama.
13Na haàtu tau mila dàngu na ma-kapidihu-ya ningu ngia pa-pahama-da;
lai nyuda pa-kadua-da nawua-nja mata paraïna i MIRI paita wàdanya na hambila-na na luri.
14Jàka na-kahiri ngera tau lamanga na hanganji,
mandai ndaungu ba na-katangu pareta.
15Na lii papekangu dàngu na lii kanyàngi panaungu na-pamanggàna-ya na tau.
Na ana na pa-patundu mànungu pambuha-na napa na-pamakia-ya na inana.
16Jàka tau akatu ma-kuaha, na-bonjangu na mapangga kalaratu.
Tàka na tau patutungu naita-yapa tàlaru-na na tau akatu.
17Papekangu anamu,
napa nawua-nggau pa-mambiru wàngu, tàka hi jiaya na panggaüru eti wàmu.
18Na banjaru na manda ngalangu londa lima welingu lai MIRI
nanjadi-ya banjaru ma-kanyaüru mànu.
Oha-anaka na tau
na ma-karadaku la Ukuna i MIRI.
19Na haàtu ata nda napeku-a pa-papeka wànya ngaru jua.
Napi-manya, tàka nda jia eti-wa-ananya.
20Narihi dangupa na pa-monungu nduma tau nduba,
welingu la nduma tau manda kanandi hahangu ba na-kareuku.
21Na ata na pa-kateli piti welingu ba bidi tauyapa,
napa na-katiku watu la malamiri.#napa ... la malamiri; jàka ndia: napa napiti ndàbaha da mangumu la malamiri.
22Na tau na marengga mbeni
na-pawiti-nya na pa-palumungu wàna dàngu na panjala wàna na madangu.
23Na tau jangga eti napa pa-pawawa-ya;
na tau karàda eti napa pa-wotungu-ya.
24Na tau na ma-pambapa dànya na ma-manganga,
karaü-nanya eti na wikina.
Jàka na-patànjingu la hangga ma-patandangu ngera,
napa na-ngalangu hukungu.
Tàka jàka pàdi wàna bia,
napa nanggàna-ya ràtungu welingu lai Ala.
25Mangàdatungu kanandingu tau, paharui wànguya.
Pawaiwa lai MIRI, napa napeku hàmu na lurimu.
26Nadangu na tau na mahimbu wihuna ka nambuha-nya ma-kuaha,
tàka na ma-wuangu matànji, didi-aya i MIRI.
27Na tau hàmu nda nahàmu-anya eti na tau akatu;
na tau akatu na-karaü-nya eti na tau hàmu.
@LAI 1995 Indonesian Bible Society (Lembaga Alkitab Indonesia)