PANGERANGU 27
27
1Àmbu abungu-du rukuna na lodu haromu,
ba ndau pianya jàka nggàraya na matumbu nu la loduna.
2Àmbu wotungu-du wikimu;
màta ka nawotu-nggau tau hawiangu, jiapa ka paraï tau mandedi tandakau.
3Watu dàngu wara da-halimu-a,
jàka pamenja-nja dàngu na paharui wàngu na pa-patumbuna na tau na manduba.
4Na mbeni duna mambana eti dàngu ma-palàjaru-ya,
na nyuna ba hangganya na kapihi nggamu na ma-torungu?
5Narihi hàmupa ba kanyàngi la hangga
weli ba mbuha kangunduhungu.
6Da angunda da-papalu wàngu pa-namungu,
tàka da muhu da-parohu wàngu upahu.
7Jàka mbihu, da manggaluangu nda pambuha-mbunja;
jàka manjuu, da mapaita dalànggambu ba pàdanja.
8Na tau na malaku wàrungu umana,
hama tuna ma-hawurungu ma-wàrungu hibuna.
9Hama tuna ba dapalii eti da mina mbii kati dàngu da mawau hiritu-ka,
tuna numbu na hàmuna na angunda ba na-pahayandalu hamangu.
10Àmbu rombangu-du angumu jàka ndia anguna na amamu.
La haruimu, àmbu karaidu pa-ndulangu la angu dedimu;
da tau la lihi uma darihi palingu-pa
welingu la angu dedi la mamarau.
11Ha ananggu, màtawa kau manggàna,
ka peku hàmuna na etinggu dàngu ka peku hema-nggunya jàka na-paakangu na tau.
12Na tau manggàna na-hinggilu jàka naita-ya na hanggàmaru;
na tau nduba nalaku pangalangu hi nanggàna-ya ura dedi.
13Nggamu ma-mbuhangu pa-tanggungu wutangu tau hawiangu,
ràka-mana ba pitiha da manguna ka pamàndu wànya na ràndina.
14Nggamu na ma-kamàhaku pawàndi-nya na anguna la mbaru hada rudungu,
natama la kaloka peka-nanya ràtungu.
15Na papaha mambuha-nya na pa-lumungu
hamana na lingu urangu na mapuru weli mbarungu lundu rudungu.
16Nda napeku-a pa-paràha-nya pakandii nyuna,
hamana na ngilu ba nda napeku la papàtu-ya
dàngu na lonahu ba nda napeku la pawunggu-nya.
17Hama tuna waja ba nadeli-ya na waja,
tuna numbu na tau ba na-papekangu welingu la anguna.
18Nggamu ma-anggaraa pingi ai, lupangu nanganya na wuana.
Na ma-paloku napa patembi-ya jàka na-pakateli-ya na mirina.
19Hama tuna na wai ba na-pangitangu-ya na matamu,
tuna numbu na etimu ba na-pangitangu-ya na wikimu.
20La pangia tau meti, ningu mànuma pangia;
tuna numbu na parinju-na na tau ba nda ningu dirana.
21Da àmahu rara dàngu àmahu bara pa-kamangu la epiha;
na tau patanda-ya welingu la hurina ba nawotu-nya tau.
22Jiapa-kai ka palu pajàra-ya na tau nduba,
nda jia mbulangu-ana na panduba wàna.
23Mu-kulipu pahàmu-manja da bandamu, 24maa ba nda da-palupangu-a da pawulu wàngu. Jiapa na kuaha pa-pareta-mbu, nda jia pa-daingu-ana lundu nu - nu. 25Da rumba la woka dàngu la palindi pakaü-ha dàngu pa-pauhingu-ha ndumada da bandamu, nu ba tuna tumbu-danyaka da rumba bidi. 26Welingu la ruu ihi mbimbimu mu-ngalangu paki, dàngu welingu la àmahu ba dangganja hawiangu da kamàmbi-mu hi mudingi tana bidi. 27Welingu la kamàmbi hawiangu mu-ngalangu wai huhu nduma wikimu dàngu kuru umamu hamanai da papalewa-muka.
@LAI 1995 Indonesian Bible Society (Lembaga Alkitab Indonesia)