PANGERANGU 23
23
– 6 –
1Jàkau uhuku panga dànya na haàtu tau bokulu patanda hàmunya nggamuya na pahangga-mu.#patanda hàmunya nggamuya na pahangga-mu; jàka ndia: ngàdaya jàka nggamuya nyuna. 2Jàka mu-patikingu panga padangu, munàdi-ya na patikingu-mu. 3Àmbu mangàba-nja da pangangu hàmu pa-paloku-nanggau, raï ai duna hi kahili biana-nggau.
– 7 –
4Àmbu pamukarungu dira matiki pàku la pawulu. Pabeta-nya nuna na patikingu-mu. 5Nadu, ndedi mbàdiku-na na njàpuda, hama tuna ningu ruu kàpada ka àmangu hi da-hawurungu hu dita la ma-kahàna hama tuna mbaku.
– 8 –
6Àmbu nga dànya na tau kutuhu. Àmbu mangàba-mbunja da pangangu hàmuna. 7Nadu, ba napanii, “Màla tangangu; hili bonjangu-ki,” ba wànanggau, làti na pawuku etina nda tuna nua duna. Na-minangu la ngaruna, tàka hauyai la etina. 8Napa mumuta beli-dunya na pambàda kawàluku-mu dàngu mbuu ndàbada da kareuku wotu-munya nda ningu-apa linguda.
– 9 –
9Àmbu panau-dunya na tau nduba; nda jia tu-ananya wilina nuna na panaungu-mu.
– 10 –
10Àmbu jia paleli-dumunya na padira tana kangeha jàka ndia la papiti-ya na tana manguna na ana mamila. 11Nadu, ba jiaya i MIRI na ma-mbangatu pa-kahiri-ha, Nyunama ma-kahiri-ha palawa-nggau nyumu.
– 11 –
12Eti wànya na lii papekangu nggurumu dàngu mu-papeka pa-dangunguma.
– 12 –
13Àmbu kanodaru pa-papekangu anamu. Jàka mu-ràmbahu-ya nda jia meti-ana, 14pamara-wa bia-nanya duna.
– 13 –
15Ha ananggu, dira hàmuya na etinggu jàka mu-manggàna. 16Na-bokulu na etinggu ba kurongu-ya na patiki-mu na kareuku ma-nggànangu.
– 14 –
17Oha-naika nyuna àmbu wàmu-dunya na tau njala. Karadaku mànu-nyawa i Ala 18keha ka na-habola na lodumu na manàmu-nya, dàngu na monungu-mu ka àmbu na-mbulangu.
– 15 –
19Patingingu-wa, ha ananggu! Màtawa kau manggàna. Tanara pahàmu-nya na huri lurimu. 20Àmbu panggolu dàdunja da tau maüku jàka ndia da tau manganga eti, 21maa ba jiangu-ma damila. Jàka mu-katuda bia, ndedi nggi tuna mandaina napa bau kalambungu ma-kanyapatu.
– 16 –
22Karadaku la amamu; nadu, jàka nda ninya nyuna nda nimbunggau nyumu. Jàka na-kaweda-ka na inamu, paloha-nyawa bau tembiya nyuna.
23Da lii papekangu ma-tubangu, da manggàna, da papekangu, dàngu da kanandingu ma-jàngapu – nuda mbuu ndàbada lupangu-ma ba keiha, tàka nambotu-maka la padangga-nja.
24Na haàtu ama napa nambaha eti jàka na-paeti na anana; na-bokulu eti wànya jàka na manggàna na anana.
25Màla aruki ka da-bokulu eti da ama da inamu rukumu nyumu; màla aruki ka paoha-nya na kawini ma-paana-nggau.
– 17 –
26Hamata pahàmu-manya dàngu mukiku-manya na luringgu, dou na ananggu! 27Na kawini pahunda na maluri kiu kaü jiaya na kambia pa-hanggàmaru wàngu. 28Nyuda da pandapungu hama tuna tau rambangu-ha dàngu da-titiru-ha da mini dangu la pa-njuraku.
– 18 –
29-30Mupi-nyaka nu jàka nggàra madeni-nya na tau na malalu unu padangu-na angguru, dàngu na ma-kamangu paunungu mamaüku? Na tau nuna na-harui dàngu na-mayila. Na-pahànggangu mànu dàngu na-kaingu. Darara da matana dàngu na-manua na ihina, làti duna napeku-ma la pa-wiliru-nja nuda mbuu ndàbada. 31Àmbu pahia-nya na angguru la parunda-kau, jiapa-kai narara-na ba dira pali etiya dàngu ba ji - jilana la kaha hamanai ba dira hàmuya ba kawàluku-nya. 32Haromu la mbaru mupàda-nya ba hama tau pambàda kati kataru mbanakau. 33Da matamu hama tuna ma-itangu kapi mamaha, na kanandingu-mu na-hariwatu dàngu na ngarumu na-karepaku. 34Mu-pàdangu wikimu ba beri ninggau la kapuka tandai lamanga kapalu la padua tehiku; nawingu na katiku-mu dàngu mbembatu - mbembatu-mu bau laku. 35Tàka nyumu, “Talànga wanguna palu-nangga dàngu tàba-nangga tau ihu, tàka nda kunamu-ayapa nggàraya na mambàda tumbu. Nai a-ai, dira tàtiku-ka! Kuhili unungu-ki bàdi!” wàmu-madua-ka.
@LAI 1995 Indonesian Bible Society (Lembaga Alkitab Indonesia)