PANGERANGU 17
17
1Narihi hàmupa ba ngangu uhu handàka hoba pa-kariangu mambiru,
welingu la pangangu ma-màtaku bundu làndangu pa-kariangu parau ngaru.
2Na ata na mamàhi napa na-kawaha-ya na ana na mawunda pa-makia wàngu;
hi peku ngalangu-na kangeha-na pa-kariangu da angu dedina nu na ana.
3Àmahu rara dàngu àmahu bara pa-kamangu la epiha,
tàka da eti tau pakama-na i MIRI-ha.
4Na tau akatu nakiku-nya na lii kamahingu ma-akatu,
na tau kambàliku na-mbuhangu pa-patingingu kareuku mapawau anguna.
5Nggamu ma-paakangu tau mamila,
pawawa-nanya i Ala na ma-padika-nya.
Nggamu ma-nggaüru eti wànya na manjurangu-na na tau,
lupangu-ma na-ngalangu hukungu.
6Na pa-bokulu eti wàna na tau mambàda kaweda jiaha da ana umbuku-na;
na pa-bokulu eti wàda da ana jiaha da ina amada.
7Na tau patembi nda ràka-ana ka na-kareuku kambàliku;
na tau nduba nda ràka-ana la patuu kareuku ma-pawilingu.
8Ningu na makaka-ya da ndui pakei li hambeli da-ngalangu pawunda pa-hangàtarungu;
wànja da ndui pakei li hambeli peku pa-palaku hàlaya jàka nggàra biaya.
9Jàka urinjungu ka nambuha-nggau angumu,
ujàmanja bàdi da njalana.
La pawuda mànuha da njala
pambota wàna na pa-kanduangu-maaya.
10Handàkangu pa-kanyàngi la tau paeti narihi pa-wilingu-pa
welingu la hangahu ràmbahu la tau nduba.
11Na tau akatu na-patumbu mànu pa-kanyaüru wàngu,
tàka na meti namai tomaya beri hama tuna na pa-palewa mambana eti.
12Narihi hàmupa ba hàmburu-ya na ina mbaruangu na ma-mbulangu anana,
welingu ba hàmburu-ya na tau nduba na ma-nutakungu pawunda-ya na panduba wàna.
13Nggamu ma-papapa wànya akatu na mahàmu,
nda peku paluhu-mbuya na ma-akatu welingu la umana.
14Ba pakiri-nya na pa-lumungu hamana ba bowaya na londa wai;
jia ba tuna yilangu-wa ba ndedi na pakiringu na pa-lumungu.
15I MIRI na-karaü-nya eti na tau na ma-pamàna-nya na tau katadaku,
tàka hi na-panjala-ya na tau manda njala.
16Nda ningu linguna na tau nduba ba na-pambuta-ha da nduina la pahimbu manggàna;
maa ba nda kanandingu ma-tubangu-aya na pamangu-na.
17Na haàtu kandua na-tuturu mànuma la anguna,
tàka na haàtu angu dedi angu pàdangu haruiya.
18Na tau ma-panjanjingu la patanggu-nja da wutangu anguna
tau manduba-maya.
19Na tau na mambuha-nya na njala,
na-mbuhangu pa-palumungu.
Na tau bàkulu ngaru,
himbu-nanya pa-taweharu wàngu.
20Na haàtu tau pa-lapingu nda jia pa-ohangu-ana,
na tau kahanga làma napa na-ngalangu hanggàmaru.
21Ba ngalangu ana manduba nda halindingu hamana na-ngalangu hawina;
ba njadi amana na ana manduba nda pa-hawola wàngu-aya.
22Na eti na ma-nggaüru na-pahayandalu tàda ihi;
na eti na ma-kamundangu na-poraku-ya na ringgitu.
23Na hakimu na ma-hiliru, nakei winingu ndui pawua pa-runungu
tàka hi nda na-palaku-ya na tànji.
24Na pawuku tau ma-jàngapu kanandingu-na jiaya ka-ngalangu papingu wàngu,
tàka na pawuku tau nduba nda papi-anya tubana.
25Na ana na manduba na-pahanduka amana,
dàngu na-pahawina inana.
26Nda na-patuba-a la pa-panggàna-nya ndànda
na tau manda njala;
nda na patuba-a la pa-kapidihu-ya na tau ma-matua huri lurina.
27Na tau na ma-dàkatu kanandingu-na nda na-kareuku padangu-a.
Na tau manggàna na-mandangu manuma duna.
28Na haàtu tau nduba làbu mapingu dàngu ma-manggàna-ya wànanya tau
jàka pàdi wàna ba nda na-kareuku.
@LAI 1995 Indonesian Bible Society (Lembaga Alkitab Indonesia)