DIHA 33
33
Na lakuda welingu la Mehiru hanggangu la Muapu
1Ba datuu kajia-yaka na Mehiru na banjaru Ihirailu da-pajurungu pa-namatunya na kabihu - kabihu banjaru-mada la kapipi-naha paraï da i Muha dàngu i Harungu, dali la hau pangia - hau pangia. 2I MIRI nawua-nya pareta i Muha la pa-tulihu-ha da tamuda da hau pangia - hau pangia ngia palida.
3Na banjaru Ihirailu datuu kajia-ya na Mehiru la tànggalu hakambulu lima wulangu hau, hau lodu la hambeli Paha na ma-wungangu. La opa-nanja i MIRI datuu kajiaya na paraingu Ràmihu la ita mata-daha tau Mehiru, 4da matani-nja da kawunga anada da pambàda pameti-na i MIRI. Ba tuna nu na pawunda-na i MIRI, paloha-nanya ba narihi kapàru-pa Nyuna welingu la marapu Mehiru.
5Ba datuu kajia-ya ka na Ràmihu na banjaru Ihirailu, da-pamaüngu la Hukutu. 6Hàla, hi dahili laku hi da-pamaüngu la Etàmu, la hingi maràda telangu. 7Welingu lai nu dabeli-ha la Pi-Hahirutu la pahunga loduna na Mbaàlu-Hepungu, hàla hi da-pamaüngu la lihina la Mikundulu. 8Tunaka nu datuu kajiaya na Pi-Hahirutu hi dapala tehiku dàngu hi datama la maràda telangu Etàmu; ba tailu mbua lodu-daka ba dalaku, da-pamaüngu la Mara. 9Welingu lai nu da-pangalangu hi da-pamaüngu la Elimu; lai nu ningu matawai nu ba hakambulu dàmbuda dàngu pihu kambulu-da da pingi ai karumangu.
10Tunaka nu datuu kajiaya na Elimu hi da-pamaüngu la lihina na Njobu wai Huwihu. 11-14Na pangalangu-na da-pamaüngu la maràda telangu Hingu, hàla hi la lihina la Ndòpuka, hàlaka nu la Aluhu, hi mangupa la Rapindimu, na nyuna nda ningua wai pa-unungu lai nu.
15-37Welingu la Rapindimu da pangalangu la Palindi Hòru hi da pa-maüngu la hau pangia - hau pangia da patiki pa-ndakingu yiada: maràda telangu Hinai, Kimburutu-Taawa, “Reti Tau Malumbangu”, Hahirutu, Rituma, Rimungu-Perihu, Lipuna, Riha, Kehilata, Palindi Hiapiru, Haranda, Màkahelutu, Tahàtu, Tara, Mitika, Hàhamona, Moherutu, Mbeni-Yaakàngu, Hòru-Nggitinggàtu, Yòtumbata, Àpurona, Ehiungu-Nggembiru, maràda telangu Njingu, dàngu Palindi Hòru, la padira tana Endumu.
38-39La hupu liina i MIRI, nahei la Palindi Hòru i Ratu Harungu. Lai nuya nameti ningu la tànggalu hau wulangu lima ndaungu papatu kambulu wàna ba da hàla patuu kajiaya na Mehiru na banjaru Ihirailu. Ba nameti 123-na na ndaungu lurina i Harungu.
40La rehi nu tàka-nanyaka pulungu na hanganji Aràtu la tana Nenggipu la Kanaàngu mbara luru, ba hanggangu-nanya la tanana nyuna na banjaru Ihirailu.
41-49Ba dalaku-ha welingu la Palindi Hòru hanggangu la ma-ndidaru Muapu, dapamaüngu da tau Ihirailu la hau pangia - hau pangia da patiki pa-ndàkingu yiada: Halumona, Punungu, Ombutu, tanyungguru watu Ambarimu, la tana ngaba Muapu, Ndimbungu-Nggàtu, Àlumungu-Ndibulataïmu, Palindi Ambarimu la lihi Palindi Nembu, dàngu la ma-ndidaru Muapu la hingi Luku Yorundangu, la lihi paraingu Yeriku, la henaku-na na Mbetu-Yehimutu dàngu na Lolangu Hitimu.
Da pareta ba ndedi palaya na Luku Yorundangu
50Nu la ma-ndidaru Muapu, la lihi Luku Yorundangu la lihina na paraingu Yeriku, nawua-nyaha i Muha i MIRI 51yiada da pareta nduma banjaru Ihirailu, “Jàkai palaya na Luku Yorundangu ka tamanya na tana Kanaàngu, 52lupangu-ma iwànggaha nyimi nggubuluna na ma-mandapu-nya nuna na tana. Patàlaru ndàbaha da marapu-da da ma-welingu la watu dàngu bàhi dàngu da pangia ngia pa-lumungu-da nyuda. 53Lupangu-ma kai wàhiya nuna na tana kai mandapu-nya, ba wua-nggunggainya nyimi. 54Hàlaka nu lupangu-ma ipabe - berinya nu na tana la kaliba - kalibaru-mi bai wàngu patunya undi. Na kalibaru na ma-bokulu lupanguma iwuanya tana kangeha ma-bokulu ndumana, tàka na kalibaru makudu panduma-nya tana kangeha makudu. 55Na nyuna jàka ndai wànggaha da mangia-nya nuna na tana, napa da tau da ma-ndàdiku pa-daingu lai nu da pa-handuka-kai nyimi beri punangu la matami jàka ndia kàna la wihimi. Napa nyuda da berakai nyimi. 56Jàka ndai wànggaha nyuda, nyimika napa pa-patàlaru-nggu hama tuna na pambàda lakunda-nggu la pa-patàlaru-ha nyuda,” wàna.
@LAI 1995 Indonesian Bible Society (Lembaga Alkitab Indonesia)