YUHUA 8
8
Ba wàhiya dàngu ba pakabu-ya na paraingu Aï
1I MIRI napanii-nya i Yuhua, “Pauhi ndàbanya na tanatara-mu kau lua karia-nya la Aï. Àmbu na-bàrangu na etimu dàngu àmbu mangàdatu-du! Napa ku-pawiti-nggaunya na talu la hanganji Aï; napa uwàhiha da rayatu-na, na paraingu-na, dàngu na tanana. 2Lupangu-ma upalua-nya lima na Aï dàngu na hanganji-na hama tuna yianana bau palua-nya lima na Yeriku dàngu na hanganji-na. Na nyuna la rehina nàhu pekuna kai pitiha patuu ndumami da banda-malanja-na dàngu da banda lurina. Hawa - waritu-wa la pahada harabànda-nya nuna na paraingu welingu la liuna,” wàna.
3Ka hawa - waritu-nanyaka i Yuhua palua la Aï karia-nja nggubulu-da da tanatara-na. Napindi tau 30.000 mini mbeni hanggangu mahàmu halawàla, hi na-palewa-ha la rudungu, 4ba dàngu wua-nanja yiana na pareta, “Kawiningu-wa mbara lua la liuna na paraingu, na nyuna àmbu lalu marau pàkumi; hanii mànu-mami bàdi la hawaritu la pa-kaluluku. 5Napa nyungga dàngu da taunggu ka ma-ndàharu-nya na paraingu. Ba daluhu-ka da tau Aï pahangga-nggama nyuma, napa ma-punjilungu nyuma hi mapalai hama tuna na pawunda-nda yianana. 6Napa nyuda dayaulu pangala-nggama nyuma lundu maraunya na paraingu. Napa dakaka-ya ba wala-manya wikima hama tuna na pawunda-nda yianana. 7Nu ba tuna la rehina nu duka bàdi bai luhu nyimi welingu la ngia pa-kawiningu-mi, kai wàhiya nuna na paraingu. Napa i MIRI na Alami nawua-manggainya duna. 8Ba hàlaka pawàhi-ya lupangu-ma huluya nuna na paraingu hama tuna na papanii-na i MIRI la hupu liina. Nuya na wai ngerami,” wàna. 9Ka palewa-nahaka paraïna i Yuhua, hi dalaku pa-kawiningu la patama loduna na Aï, la henaku-na na Aï dàngu na Mbetilu. Tàka nyuna i Yuhua todu-nanya la kalibaru uma tera banjaru Ihirailu.
10La mbaru hada rudungu hadangu-nanyaka i Yuhua hi nawua-nya pareta pa-pauhi na pamba tanatara-na. Tunaka nu nyuna dàngu da liku uru banjaru Ihirailu da-karia-nya la Aï na pamba tanatara. 11Nuna na pamba tanatara dàngu nyuna i Yuhua dalaku hanggangu la pindu bokulu mbulungu-na na paraingu Aï, hi da-pahadangu uma tera la mbara diana, la maningu hau lolangu-na la henaku-da nyuda dàngu nuna na paraingu. 12Ràkangu tau 5.000-ya danguna na pa-paràha-na pa-kawiningu la patama loduna nuna na paraingu, la henaku-na na Aï dàngu na Mbetilu. 13Ba tuna na pa-wandalungu-da da pamba pa-kabungu tuna nu ba na-wandalu-ha: na maü mbulungu la dia paraingu-ya dàngu na pamba hawiangu la patama loduna, tàka nyuna i Yuhua nalaku la lolangu la rudungu nu. 14Ba naita-kihaka da tauna i Yuhua na hanganji Aï, ri - ringa-naka ba na-kaingatungu. Luhu-danyaka hanggangu la Lolangu Yorundangu nyuna dàngu mbuu ndàbada da tauna la pa-kaluluku-nja da tau Ihirailu la pangia-da yianana. Nda napi-anya ba tiangu-kika na rapa kaluluku-nya welingu la liu. 15Da pahada ma-kandulingu i Yuhua dàngu da tauna; dapalai hanggangu la ngabana na maràda katukuru. 16Mbuu ndàbada da mini la paraingu Aï pa-paràhangu-haka paluhu ka yauluha i Yuhua dàngu pamba tanatara-na. Tàka ba hama huka yaulu-danya i Yuhua, hama huka marauda welingu la paraingu-da. 17Nimbihu-na na tau la Aï daluhu pa-yauluha da tau Ihirailu, hi ailulu màta bia-danya pa-tanelaku na paraingu, dàngu nda ningu madaiya.
18Tunaka nu napanii i MIRI lai Yuhua, “Jijiku-nya na nimbumu kau pangaku-nya hanggangu la Aï; wua-nggunggau-nyaka nàhu nuna na paraingu,” wàna. Ka pahàra-nanyaka i Yuhua na papanii-nanya i MIRI la hupu liina. 19Ba na-pangakungu-kika limana i Yuhua, ri - ringa-daka pa-ndolaku na pamba tanatara da ma-kawiningu hi dalua panjungu-nya nuna na paraingu, hi dawàhi-ya. Ailulu hulu-madanya nuna na paraingu. 20-22Dambaili la kajia da tau Aï, kaita-danyaka na kutu epi ma-hambumbatu toma la awangu. Daita-mbuya paraï da i Yuhua dàngu pamba tanatara-na, ka pi-danyaka ba mbàda wàhi-danyaka na paraingu paraï nu na hau pamba tanatara. Ba tuna, punjilungu-danyaka i Yuhua dàngu pambana la pa-kaluluku-nja dàngu la pa-pameti-ha da tau Aï. Nàmu-mbunjaka da tau Ihirailu welingu la paraingu pa-kaluluku, hi nggupulu-ha da tau Aï hi lupa nda ningu àndada la pawala wikida. Nda haàtu-a welingu lai nyuda ma-tambòtuhu, mbutada dameti ndàba ba na-pameti-ha tau Ihirailu, 23hinggilu-na na hanganji Aï. Dayàpa-ya hi dangàndi-ya la hanggana i Yuhua.
24Ba dahàla-ka da pamba Ihirailu pa-pameti ndàbaha da tanatara muhu da mayaulu-ha nyuda la maràda katukuru, beli-danyaka la Aï, hi da pameti ndàbaha da tau lai nu. 25-26Pa-daingu-mana-nyapa i Yuhua pa-pangakungu nimbuna hanggangu la Aï, nda ana pawawa-mananya na nimbu lundu pameti ndàbaha da tau la Aï. La lodu nuna dameti mbuta nggubulu-da da-mangia-nya na Aï – 12.000-ha danguda mini kawini. 27Da banda dàngu da malanja da pawàhi la paraingu nuna, dapiti-ha patuu manguda nyuda da tau Ihirailu, hama tuna na papanii-na i MIRI lai Yuhua. 28I Yuhua nahulu-ya na Aï, hi namàta-nya ka tanyungguru watuya, lundu nàhu. 29Na hanganji Aï na-tiwalu-nya la kapuka ai, hi namàta-nya lundu malingu lai nu. Tàka ba natama-ka na lodu, paràhangu-nanyaka tau i Yuhua papiti-ya na metina hi tòkunya la ànda tama hanggangu la pindu bokulu paraingu. Tunaka nu hi da-pabundu pada - daanya watu na pangia nuna. Nuda da watu ni-manjapa lai nu lundu nàhu.
Ba dihaha da Ukuna i MIRI la Palindi Embàlu
30Tunaka nu pahadangu-nanyaka hau ngia pawotu maraku ndumana i MIRI na Ala Ihirailu, la Palindi Embàlu i Yuhua. 31Na-pandoi-ya nuna na ngia pawotu maraku nunjuya na lii kaloka nduma banjaru Ihirailu, na maninya la Mbukuna i Muha atana i MIRI, “Hau ngia pawotu maraku pa-pahadangu welingu la watu pandedi ràma ndoku wàngu bàhi,” ba wàna. La pinu ngia pawotu maraku nuna dawotu-ha da maraku-da lai MIRI da tau Ihirailu, da kameti maraku patunu, dàngumbu da kameti maraku papeku. 32Ba dàngu ita-danya tau Ihirailu, na-tulihu-ha lai nu i Yuhua la wa - watuna na ngia pawotu maraku da ukuna i MIRI da maninja la Mbukuna i Muha. 33Da tau Ihirailu dàngu da liku uru da ngora tanatara da hakimu dàngumbu da tau tàka da ma-ndàdiku la hongada, da-ndolaku mara hapapa-ya na Pàti Pa-ràndingu-na i MIRI hangganja da ratu Lewi ba hapajia-ha da maduku-ya na Pàti Pa-ràndingu. Da beri mandua-da da-hanggangu la Palindi Nggerihimu tàka dahili beri mandua-dai da-hanggangu la Palindi Embàlu. Mbàda wua-mana-njaka pareta paraïna i Muha, na atana i MIRI ka dawunda-ya nuna jàka jia-yaka na rehi rapa ngala-danya na kanyuru panjanji-nanja i MIRI. 34Tunaka nu diha pawàndi-nanjaka nggubulu-da da uku i Yuhua jia pawingungu-maha hama tuna da pa-tulihu daa la Mbuku Uku papohu-nja da kanyuru dàngu da ràtungu. 35Nimbihu-da da hupu liina i Muha, nadiha ndàba-manja paraïna i Yuhua la nggubulu-na na banjaru Ihirailu na ma-pauhi lai nu, papohu-nja da kawini, da anakeda, dàngu da tau tàka da ma-ndàdiku la hongada nyuda.
@LAI 1995 Indonesian Bible Society (Lembaga Alkitab Indonesia)