YUHUA 6
6
Na mberana la Yeriku
1Da pindu bokulu la paraingu Yeriku pambàda dai pa-hàmungu-mahaka dàngu da-kapingatu-maka da ràpitu-da ka àmbu peku tamada da tau Ihirailu. Nda haàtu-a pa-pahiangu la patama jàka ndia la paluhu welingu la paraingu. 2Napanii i MIRI lai Yuhua, “Nàhu kuwua-nggaunya na Yeriku dàngu na hanganji-na dàngu mbuu ndàbana da tanatara da makabo - borangu. 3Lupangu-ma nyumu dàngu tanatara-mu ipajuru winggiru-nya na paraingu, handàkangu hau lodu la nomu mbua lodu mandaina. 4Lupangu-ma tau mapihu ratu ma-maràngga ngàndi taropitu da-mangilu-nya na Pàti Pa-ràndingu. La lodu na papihu wàna, lupangu-ma ipapihu wundangu pa-winggiru-nya na paraingu, nyumu dàngu da tanatara-mu ba talànga pini-daha da taropitu paraï da ratu. 5Hàlaka nu lupangu-ma dapini pamalai-ha da taropitu-da da ratu. Bai rongu-kiyaka nu na pini pa-malaingu, lupangu-ma napayaa-aungu mbuu ndàbana na tanatara ka nawàngu pa-katururu, ka ta-nyungguru-nanyaka napa na kangeli paraingu. Hàla lupangu-ma mbuu ndàbami ka ailulu tama-minya na paraingu,” wàna.
6Ka paau-nanjaka da ratu ba hapajia-ha paraïna i Yuhua, hi napanii, “Pitiya na Pàti Pa-ràndingu; lupangu-ma dalaku mangilu-nya tau mapihu welingu lai nyimi ba dàngu ngàndida taropitu,” wàna. 7Hàla paràha-nanjaka palaku pa-jurungu da tanatara-na i Yuhua la pa-winggiru-nya na paraingu, ba nawàngu pa-mangilu-nja juru manggangu la ngora ba da-mangilu-nya na Pàti Pa-ràndingu-na i Miri.
8-9Hama tuna na hupu liina i Yuhua, laku-nanyaka na juru manggangu la ngora da-mangilu-nja da ratu mapini taropitu, dandutu-ha ratu maduku-ya na Pàti Pa-ràndingu, la malamiri hi nawàngu pa-kanjupungu na juru manggangu la kiku. Nu ba talànga lakuda, papini pangalangu-maha da taropitu. 10Nggubulu-na na pamba tanatara pambàda wuangu-yaka pareta ka àmbu dapayaa-aungu jàka ndedi na-wuangu lii pairungu i Yuhua. 11Tuna nuduka ba na-paràha-nja da tanatara-na i Yuhua pangàndi-ya na Pàti Pa-ràndingu pa-winggiru-nya handàkangu na paraingu, hàlaka nu beli-danyaka la kalibaru uma tera, hi datodu lai nu.
12-13La haromu-na, la mbaru hada rudungu, hadangu-nanyaka i Yuhua tàka la pandua wundangu wàna da ratu ba hapajia-ha dàngu da tanatara da-pajurungu pa-winggiru-nya na paraingu la juru hama tuna na-pandutu-da la lodu kangeu-na: la mangilu na juru manggangu la ngora, hàlaka nu da pihu ratu mapini taropitu, dandutu-ha ratu maduku-ya na Pàti Pa-ràndingu, tàka la kanjupu-na na juru manggangu la kiku. Nu ba talànga tuda nu papini pangalangu-maha da taropitu. 14Nu la lodu padàmbu wàna da-handàkangu pa-winggiru-nya na paraingu, hàla beli-danyaka la kalibaru uma tera. Tuna numa na pawunda-da nimbihu lodu ba nomu mbua lodu mandaina.
15La lodu papihu wàna dahada mbarungu ba hina nahunga na lodu, hi da-winggiru-nya na paraingu Yeriku hama tuna na pambàda wàngu, na nyuna mbulungu nu la lodu papihu wàna-a ba da-papihu wundangu pa-winggiru-nya na paraingu. 16La papihu wundangu wàna, ba dapini-kihaka da taropitu-da da ratu, wuangu-nanyaka lii pairungu i Yuhua la nggubulu pamba tanatara ka dapayaa-aungu. Napanii i Yuhua, “Mbàda wua-nanggai-nyaka yiana na paraingu i MIRI! 17Nggubulu-na na paraingu dàngu mbuu ndàba na ihina lupangu-ma pamànji ailulu-ya ka beri hunggu maraku lai MIRI-ya. Mbulungu i Rahàpu-a, nu na kawini pahunda dàngu da kalembi-na da pa-pahiangu paluri, nadu ba mbàda ndula-nahaka da ma-kapilitu welingu lai nyuta. 18Welingu la ngga - nggàra bia, ba lupangu-ma pa-pamànji-ha, àmbu jia ningudu papiti-mi. Jàkai pitiha napa nanggàna-ya hanggàmaru na kalibaru uma tera Ihirailu. 19Mbuu ndàbada da banda àmahu bara, àmahu rara, wudu, dàngu bàhi lupangu-ma pa-kawàri pa-hinggilu-ha ndumana i MIRI, dàngu hi pahàmu-ha la ngia pa-pahàmu banda manguna i MIRI,” wàna.
20Ka pini-dahaka da taropitu-da da ratu ba hapajia-ha. Tàka ba darongu-kiyaka nu na lingu taropitu paraï da tau Ihirailu, kabàtingu-danyaka papayaa-aungu, ka tanyungguru-nanyaka na kangeli paraingu Yeriku. Ka ailulu hei-danyaka nggubulu-na na pamba tanatara Ihirailu, hi datama la paraingu hi dawàhi-ya. 21Mbuu ndàbada da maninja la kuru paraingu ma-kaweda bidi tau, mini kawini, pa-pameti-ha wàngu hapanda. Mbuu ndàbada da banda hapi, mbimbi dàngu kalandai pa-pameti-mbuha.
22Napanii-nja da tau madua ma-kapilitu i Yuhua, “Iluawa la umana nu na kawini pahunda, dàngu karia-nyawa la hambeli dàngu da kalembi-na hama tuna na pambàda njanji-minya nyuna,” wàna. 23Ka lua-danyaka nu da tau madua ma-kapilitu hi da-karia-nja la hambeli i Rahàpu dàngu da ama-inana, da ana minina, da anguna kawini, dàngu da kalembi-na hawiangu. Nggubulu-da da kalembi-na i Rahàpu dàngu da atana pangàndi-ha la hambeli la pangia ma-nggàpulu la lihi kalibaru uma tera tau Ihirailu. 24Tunaka nu hulu pambuta-danyaka nggubulu-na na paraingu dàngu mbuu ndàbada da ihina paraï tanatara Ihirailu, hinggilu-da da banda àmahu rara, àmahu bara, wudu dàngu ma-welingu la bàhi. Da banda nuda dapiti-ha hi dangàndi-ha la ngia pa-pahàmu banda manguna i MIRI. 25Na nyuna i Rahàpu na kawini pahunda dàngu nggubulu-da da kalembi-na namàta-nja paluri paraïna i Yuhua, nadu ba mbàda ndula-nahaka da tau madua ma-kapilitu papalewa-na i Yuhua la Yeriku. (Lundu lodu nàhu ni-manjapa da ana umbuku-na i Rahàpu la Ihirailu.)
26La rehi nu wuangu-nanyaka larangu i Yuhua, “Nggamu biaya na ma-katingarungu la pa-pahada belinya yiana na paraingu Yeriku napa nanggàna-ya ràtungu-na i MIRI.
Nggamu na-matunya latana,
napa na-yàmihu-ya na kawunga anana;
dàngu nggamu ma-pakàna-nja da pindu bokulu-na,
napa na-yàmihu-ya na ana kamuri-na,” wàna.
27I MIRI na-angunya i Yuhua, dàngu na-kawulangu na tamuna i Yuhua la nggubulu-na na tana lai nu.
@LAI 1995 Indonesian Bible Society (Lembaga Alkitab Indonesia)