YUHUA 10
10
Ba panyàku-ha da tau Amori
1I Andoni-Hendiku, na hanganji Yeruhali,#Yeruhali: La rehi nu na paraingu yiana paraingu tau Yembuhu-ya. narongu-ya ba mbàda wàhi-nanyaka dàngu ba mbàda pakabu ailulu-nanyaka na paraingu Aï i Yuhua dàngu na-pameti-ya na hanganji-na hama tuna na pambàda wundana hanggangu la Yeriku dàngu na hanganji-na. Narongu-mbuya ba mbàda tura-daka lii pa-njanjingu pa-paariyangu da tau Nggimbiungu dàngu da tau Ihirailu dàngu hi da-ndàdiku la hongada nyuda. 2Da mangianya na Yeruhali kanjupu mangàdatu-ha nadu na Nggimbiungu ba hama bokulu-mana dàngu da paraingu maningu hanganji-da; jiapa narihi bokulu-mbuipa welingu la Aï, tàka da taumbuna mini mbeni hanggangu mamàhi la pa-kabungu-maha. 3Tuna nuduka hi na-palewa tau i Andoni-Hendiku lai Hanganji Hohamu la Hemburungu, lai Hanganji Piriamu la Yàramutu, lai Hanganji Yapia la Lakihu, dàngu lai Hanganji Ndembiru la Enggulungu, la pangàndi-ya yiana na paboru-da la bànggi, 4“Mai àruki pandula-ka la pahada-nya na Nggimbiungu, ba mbàda tura-daka lii pa-njanjingu pa-paariyangu da tauna dàngu i Yuhua dàngu da tau Ihirailu,” wàna. 5Ka kahaungu-danyaka da hanganji Amori tau malima, nu da hanganji Yeruhali, Hemburungu, Yàramutu, Lakihu dàngu Enggulungu, hi da-nggupulu-ya wàngu nggubulu tanatara-da na Nggimbiungu dàngu hi da-kaluluku-nya.
6Ka pangàndingu-danyaka langu da tau Nggimbiungu lai Yuhua la kalibaru uma tera la Ngginggalu, “Ndula àruki-kama pa-pahàla-kama Umbu! Àmbu màta-nggama. Lu mai pandula-kama, nadu da tanatara-da mbuu ndàbada da hanganji Amori la ngaba ma-palindingu mbàda kahaungu-daka pa-ndubaku-kama!” wàda.
7Ka hadangu-danyaka welingu la Ngginggalu palua pa-pabera i Yuhua dàngu nggubulu tanatara-na, papohu-nja da pamba tanatara-na da mahàmu halawàla. 8Tàka i MIRI napanii-nya i Yuhua, “Àmbu mangàdatu-dunja nyuda. Mbàda wua-nggunggau-nyaka nyumu na talu, tuna nuduka hi nda ana haàtu-mbu ma-torungu welingu lai nyuda pa-ndubaku-kau nyumu,” wànanya. 9Da-kanjupu-ya na rudungu i Yuhua dàngu pamba tanatara-na ba hanàhu-da welingu la Ngginggalu hanggangu la Nggimbiungu, hi dahada harabànda-nja da tau Amori. 10I MIRI na-pamangàdatu-ha da tau Amori, hi nda dapingu tubada ba daita-ha da tanatara Ihirailu. Dangu tau Amori pa-pameti la Nggimbiungu, tàka da maluri-ipa payaulu-ha la pa-kamburungu la karaha palindi Mbetu-Horungu lundu hu luru la mamarau la Aheka dàngu Makenda. 11Ba talànga kamburungu-da la karaha palindi da tau Amori ba dapalai-nja da tanatara Ihirailu, na-panabu-nja ura watu mboka mabo - bokulu welingu la awangu i MIRI, nàhu la ànda lundu tàka la Aheka. Da mameti panggàna ura watu mboka darihi pada - dangu-mapa welingu la pa-pameti-da da tau Ihirailu.
12La lodu nu ba nawua-nya talu na tau Ihirailu i MIRI hanggangu la tau Amori, napanii dànya i MIRI nyuna i Yuhua. Dàngu la hangga tau Ihirailu, napanii Yuhua,
“Ha mata lodu! Ndudiwa la ditana na Nggimbiungu.
Tàka nyumu dumu wulangu!
Àmbu tanggihiru-du
welingu la ditana na Lolangu Ayalungu,” wàna.
13Ka ndudi-nanyaka na mata lodu tàka na wulangu nda na-tanggihiru-a lundu dahàla pa-pakàku muhuda da tau Ihirailu. Yiana na matumbu pa-tulihu-ya la Mbuku Yaharu. Hau lodu titapu-na ba nda natama na mata lodu, tàka ndudi bia-nanya la padua awangu, dira mandaiya hi na mangu patama. 14Ndedi ninguma duna handàkangu dàngu nda hili ningu-mbupa napa lodu mahama-nya na lodu nuna ba nanunju-ya paraïna i MIRI na pambuha tau pinu tana. I MIRI na-pabera angunya na Ihirailu!
15Ba hàlaka-nu pa-pakabungu, beli-nanyaka i Yuhua dàngu tanatara-na la kalibaru uma tera la Ngginggalu.
Ba nayàpa-ha da hanganji Amori tau malima i Yuhua
16Na nyuna da tambòtuhu nu da hanganji Amori tau malima hi da-kawiningu la hau liangu la Makenda. 17Ka ninguka tau maita-ha, hi dapanii-nya i Yuhua na ngia pa-kawiningu-da. 18“Kilunya watu mabo - bokulu-ma nu la ngaru liangu, dàngu tunya madai lai nu,” wàna i Yuhua, 19“na nyuna àmbi ndàdiku-du lai nu. Yaulu pangala-nja dàngu kaluluku-manja welingu la liu; àmbi pahia dunja patama la paraingu-da! Mbàda wua-mana-nggaika talu paraïna i MIRI na Alami,” wàna. 20I Yuhua dàngu da tau Ihirailu da-pameti-ha da tau Amori, na nyuna ningumai nyuna nu la honga muhu ma-ngalangu patama la paraingu-da pahimbu ngia pa-hinggilu-da, hi nda pa-pameti-ha. 21Tunaka nu beli-danyaka lai Yuhua la kalibaru uma tera la Makenda nggubulu-da da tanatara-na i Yuhua dàngu nda nggàra ehida.
Nda haàtu-a la tana nuna matoru mbeni papanii ngga - nggàra pa-ndubaku wànja da tau Ihirailu.
22Hàlaka nu napanii i Yuhua, “Bunggahu-yawa nàhu nu na ngaru liangu dàngu ngàndiha nàmu da hanganji tau malima,” wàna. 23Ka bunggahu-danyaka na liangu hi dundilu-ha la hambeli da hanganji Yeruhali, Hemburungu, Yàramutu, Lakihu dàngu Enggulungu, 24hi ngàndiha lai Yuhua. Hàla, hi napaau-ndàbanja pa-pauhi da tau Ihirailu i Yuhua. Tunaka nu nawua-nja pareta i Yuhua da ngora tanatara ba hapajia-ha da mambàda lua karia-nya pa-pakabungu, ka damai padili-ha da pola nggoruda nuda da hanganji. Ka mai-danyaka da ngora tanatara padili-ha da pola nggoruda nuda da hanganji. 25Hàlaka nu, napanii-nja da ngora tanatara ba hapajia-ha paraïna i Yuhua. “Àmbi mangàdatu-du dàngu àmbu da-nggidiku da etimi. Màtawa kai tara ura mbeni mangu, ba tuna yia-maka na-palua-nanja lima i MIRI mbuu ndàbada da muhumi,” wàna. 26Hàla pameti-nanjaka nuda da hanganji i Yuhua hi na-tiwalu-nja la lima mbungu andungu. Pa-màtangu-ha da metida lai nu lundu malingu. 27Ba natama-ka na lodu, la hupu liina i Yuhua pa-papurungu-ha da metida hi patàda-nja hu daa la liangu nunama, na ngia pa-kawiningu-da la mangilu nuda da hanganji. Hàlaka nu, watu mabo - bokulu-ma patuda-nya nu na ngaru liangu. Ni-manjapa lundu nàhu nuda da watu.
Darihi dangu-mapa da pahili wàhina i Yuhua la ngabana la Amori
28La lodu nuna nahada-nya na Makenda i Yuhua hi na-pakàku-ya nuna paraingu pa-pohungu hanganji-na. Na-pameti ndàba-maha da tau la paraingu nuna; nda haàtu-ma pamàta-na paluri. Na-palua-nya lima na hanganji Makenda i Yuhua hama tuna ba na-palua-nya lima na hanganji Yeriku.
29Hàlaka nu, hanàhu pangalangu-mada i Yuhua dàngu pamba tanatara-na welingu la Makenda hanggangu la Lipuna hi dahada-nya na Lipuna. 30Ba hangganya na paraingu yiana dàngu hanganji-na, nawua-nja talu da tau Ihirailu i MIRI. Nda haàtu-ma pamàta-na paluri; mbuu ndàbada da maninja la paraingu pa-pameti-ha. Na-palua-nya lima nuna na hanganji paraïna i Yuhua hama tuna ba na-palua-nya lima na hanganji Yeriku.
31Tunaka nu ndàharungu-danyaka i Yuhua dàngu pamba tanatara-na welingu la Lipuna hanggangu la Lakihu. Da-nggupulu-ya nuna na paraingu hi danjungu-nya. 32La padàmbu wàna na lodu pa-hànjalungu, nawua-nja talu da tau Ihirailu i MIRI hangganya na Lakihu. Na pawunda-da la Lipuna dawunda-mbuya la Lakihu; nda haàtu-ma pamàta-da paluri pa-pameti ndàba-maha. 33I Horàmu na hanganji Nggehiru namai pandula-ya na Lakihu na nyuna na-pakàku-ya dàngu pamba tanatara-na, paraïna i Yuhua; nda haàtu-ma ma-kanjepi, dameti ndàbama.
34Na pandàkingu-na dahili ndàharungu i Yuhua dàngu pamba tanatara-na welingu la Lakihu hanggangu la Enggulungu hi da-nggupulu-ya dàngu da-kaluluku-nya nuna na paraingu. 35La lodu nuna ba dawàhi-ya na Enggulungu, hi da-pameti ndàbaha da tau lai nu hama tuna na pawunda-da la Lakihu.
36Welingu la Enggulungu da-kandekalu la palindi i Yuhua dàngu pamba tanatara-na hi dalua la Hemburungu hi da-kaluluku-nya nuna na paraingu 37hi dawàhi-ya nuna na paraingu. Na hanganji-na dàngu nimbihu-da da tau da maninja la paraingu nuna dàngu la paraingu hawiangu-ka la winggiru-na lai nu, pa-pameti ndàba-maha. Na-pakabu ailulu-maya nuna na paraingu i Yuhua hama tuna na pawunda-na la Enggulungu. Nda haàtu-ma pamàta-na paluri lai nu.
38Hàlaka nu, beli-danyaka i Yuhua dàngu pamba tanatara-na hi dalua pahada-nya na Ndembiru. 39Nuna na paraingu dàngu na hanganji-na dàngu mbuu ndàbada da paraingu hawiangu la winggiru-na nawàhi-ha i Yuhua. Na-pameti ndàba-maha da tau lai nu. Na-palua-nya lima na Ndembiru dàngu hanganji-na paraïna i Yuhua, hama tuna ba na-palua-nja lima na Hemburungu dàngu na Lipuna pa-pohungu hanganji-da.
40Nggubulu-na na tana lai nu na-panyàku-ya paraïna i Yuhua. Na-pakàku-ha da hanganji la ngabada da ma-palindingu, la karaha - karaha ma-patundungu la pahunga lodu, la ma-pahuru melingu la patama lodu, dàngumbu la maràda - maràda mbara luru. Nda haàtu-ma pamàta-na paluri; na-pameti ndàba-maha. Nuna-duya na hupu liina i MIRI, na Ala Ihirailu. 41Na pakàku-ha paraïna i Yuhua na ngabana la Kandihu-Mbarania la mbara luru lundu la Nggaha la lihi ngabana la hingi tehiku, papohu-nya nggubulu-na na ngabana la Nggohingu, pangalangu lundu tàka hu dia la Nggimbiungu. 42La handàkangu jua-a pa-pakabungu mbàda pakàku ndàba-nahaka yiada da hanganji i Yuhua dàngu da ngaba tana pa-kawaha-da nyuda, nadu ba i MIRI, na Ala Ihirailu, na ma-pakabungu ndumana na Ihirailu. 43Hàlaka nu beli-danyaka i Yuhua dàngu pamba tanatara-na la kalibaru uma tera la Ngginggalu.
@LAI 1995 Indonesian Bible Society (Lembaga Alkitab Indonesia)