YUHUA 1
1
I Ala na-paràha-nya i Yuhua pawàhi-ya na Kanaàngu
1La taliu metina i Muha na atana i MIRI, panii-nanyaka i MIRI la wakilu-na i Muha, nu i Yuhua anana i Nungu. 2Napanii i MIRI, “Mbàda meti-naka na atanggu i Muha. Hawanjiru-wa nàhu nyumu dàngu nggubuluna na banjaru Ihirailu la papala-ya na Luku Yorundangu, dàngu la patama-nya na tana na pawua-nggunja nyuda. 3Mbàda panii-manggu-nyaka i Muha, nimbihu-na na ngaba tana padili-mu, mbàda wua-nggunggau-nyaka nyumu Yuhua, dàngu na banjaru-nggu nggubuluna. 4Napa na-tayilingu na tana ngabami piti welingu la maràda wara mbara luru, lundu la ma-palindingu la Limbanongu la mbara dia; dàngu piti welingu la Luku bokulu Epuràtu la pahunga lodu, na pa-ngalangu pahanggau-nya na tana banjaru Heti, lundu la Tehiku Padua la patama lodu. 5La ngala lurimu nda jia haàtu-a napa ma-duluku pa-pakàku-kau nyumu, Yuhua. Nadu ba kudidi karaha-kau napa, hama tuna na didi karaha-nggunya i Muha. Nda jia dunjaku-anggunggau. 6Màtawa kau tara ura mbeni mangumu, nadu ba nyumu-maka napa ma-kapipi-ya na banjaru yiana ba damandapunya napa yiana na tana na pambàda njanji-nggunja da boku la mangilu-da. 7Na nyuna, utara ura mbeni mangu langatàka-maka bàdi. Namu-maya kau nunju padeni-manja nggubulu-da da uku da pawua-nanggau i Muha na atanggu. Àmbu jia ana talarahu-dumunja hakudu da ukunggu, napa upadàpangu-ma duna. 8Etiwaa hàmu-manya ka diha mànunya na banjaru-nggu nu na mbuku uku. Imanginjiru-yawa nuna na mbuku la lodu la rudungu, kau pahàra ndàbanja da pa-tulihu daa lai nu. Jàkau pahàra ndàbanja yiada, napa na-mbokaru na lurimu dàngu upadàpangu. 9Namuya, ba mbàda wua-nggunggauka pareta ka langatà - tàkama bau tara ura mbeni mangumu! Àmbu mangàdatu-du jàka ndia àmbu na-pawawa-du na ndewamu, nadu ba kudidi karaha-makau Nyungga MIRI Alamu, la nggi biaya na ngia palaku-mu,” wànanya.
I Yuhua nawua-nya pareta dàngu na-paita-nya ngerangu na rayatu Ihirailu
10Ka wua-nanjaka pareta paraïna i Yuhua da liku uru banjaru Ihirailu 11palua la nggubulu kalibaru uma tera banjaru Ihirailu pawua-nya yiana na pareta, “Paloku-wa bàlangu, nadu ba tailu mbua lodu-kika lupanguma ipalaya nyimi na Luku Yorundangu, la pa-mandapu-nya na tana pawua-nanggai nyimi i MIRI Alami,” wàna.
12Napanii i Yuhua la kabihu Rumbingu dàngu Nggàtu, dàngu na beri mandua-na na kabihu Manahi, 13“Namuya! Ba mbàda panii-nanggaika nyimi i Muha na atana i MIRI ba wua-nanggainya nyimi napa na tana la pahunga loduna yiana na Luku Yorundangu paraïna i MIRI Alami ka tana mangu-minya. 14Mbuu ndàbada da ana da papaha-mi dàngu da bandami peku ndàdiku biada yiahu, na nyuna da mini mbeni hanggangu-mi lupangu-ma da hawaritu ka pa-kabungu dàngu la pa-mangilu-nya na banjaru-mi, da tau Ihirailu papala-ya na Luku Yorundangu. 15Lupangu-ma nyimi kai dandula-ha nyuda lundu da-mandapu-nya na tana la ngaba patama loduna yiana na Luku Yorundangu, na pambàda wua-nanja paraïna i MIRI Alami. Jàka na-pamàja-nyaka pa-ndapuru na mandapu-na nggubulu-na na banjaru Ihirailu i MIRI, hina-duka hi peku belimi la tana wikimi la pahunga loduna yiana na Yorundangu, na pawua-nanggai nyimi i Muha na atana i MIRI,” wànanja.
16Ka hema-danyaka da kabihu Rumbingu dàngu Nggàtu dàngu na beri mandua-na na kabihu Manahi, “Nggàra biaya na pa-pahàrangu ba wàmu-nggama, ma-pahàra-manya duma, dàngu la nggi biaya na ngia palua ba wàmu-nggama malua-ma duma. 17Makaradaku-manja duma da hupu liimu, hama tuna ba ma-karadaku-mànunya i Muha. Màla àruki i MIRI na Alamu ka nadidi karaha-kau hama tuna ba nadidi karaha-ya i Muha! 18Nimbihu-na na tau na ma-ndubaku-ya na kawaha-mu, jàka ndia na manda nunjuya na hupu liimu, pahuku pameti-maya napa. Màtawa kau tara ura mbeni mangumu!” wàdanya.
@LAI 1995 Indonesian Bible Society (Lembaga Alkitab Indonesia)