NA MBUKUNA I AYUPU 2
2
I Pakamangu nahili kamanya i Ayupu
1Da tau awangu dahili hurungu lai MIRI, dàngu nimbunya i Pakamangu la hongada. 2Ka paàra-nanyaka paraïna i Ala, “Nggi welimu?” wànanya. Nanapa-ya i Pa-kamangu, “Welinggu pa-wenangu la nggi - nggini dàngu la panjada-nya na pinu tana,” wàna.
3Na-paàra-nya paraïna i MIRI, “Màla uhamata-duya nu na atanggu i Ayupu? La pa-nggubulu awangu nda ningua tau mahama-nya pa-tuturu dàngu pahàmu eti nyuna. Na-maraku-ngga dàngu nda ana wunda-mana ma-akatu. Daingu-mana pa-tuturu-ngga jiapa-kai bau pamanda-ngga la pa-hanggàmaru-ya nyuna la manda pa-latangu,” wànanya.
4Tàka na-kataku-ya i Pakamangu, “Na luri dàngu na hayandalu narihi pa-wilingu-pa welingu la banda. Na-mbuhangu na tau pawua hàlaha da manguna mili naluri pa-ngalangu nyuna. 5Jàka era pa-katiu-munya na toluna, lupangu-ma naràtu-nggau la hanggamu!” wànanya.
6Nanapa-ya i MIRI ba nahema-ya i Pa-kamangu, “Nahàmu-kai duna, palaku biaya nggàraya na pambuha-mu lai nyuna, mili àmbu pameti-ya nyuna,” wànanya.
7Ka laku-nanyaka i Pa-kamangu welingu la hanggana i MIRI, hi na-patumbu-nya manggàri mbana na ihina i Ayupu, welingu pàku la tàbalu wihi lupa la pinu katiku-na. 8Ka uhuku-nanyaka i Ayupu la lihi pabundu kangudu, hi napiti mbera loja la pa-kauru wànya na ihina. 9Tàka na papaha-na, “Ka ni, hi daingu tuturu biamu-nya i Ala? Màla, ràtu-nyawa kau mangu pameti!” wànanya.
10Na-kataku-ya i Ayupu, “Ukareuku hama tuna tau ndubakau! Nggiki hama peku biana nyuta la pa-mbuhangu pa-kataku mahàmu bia welingu lai Ala, tàka na manda hàmu hi jukaru-ndanyai?” wànanya. Jia ba tuna, jiapa-kai ba napàda hàlanya nuna na harui mayila paraïna i Ayupu, nda ana tiki-mana kareuku ma-ndubaku-ya i Ala.
Na maida da anguna i Ayupu
11Na handuka na manggàna-ya i Ayupu mbàda rongu-danyaka paraïda matailu da anguna, i Elipàhu welingu la parai Temàngu, i Mbilundàtu na tau Huwàhu, dàngu i Hopàru na tau Naama. Da-pahamangu nyuda la palua pa-tadalu-ya dàngu la paomba-ya na etina. 12Tàka ba daita marau biaya-pa, datika panda tandaya. Da-kaladaku hi dahira-ha da pakida dàngu hi da-hàbarungu kumburu tana la awangu dàngu la katiku-da. 13Pihu mbua lodu pihu mbua rududa pa-uhuku la tana, la lihina i Ayupu, nda ana nggàrama patiki-da, maa ba daita-duya ba dira mbotuya na harui mayila-na.
@LAI 1995 Indonesian Bible Society (Lembaga Alkitab Indonesia)