YAHAYA 5
5
Na ludu rukuna na ariyaa-nggu dàngu na woka angguru-na
1Rongu-yawa na ludunggu
rukuna na woka angguru-na na ariyaa-nggu.
Na ariyaa-nggu ningu woka angguru-na
la karaha palindi ma-kamboka.
2Na-kangaburu-ya na tanana
hi nawàru-nja da watu - watuna.
Na-pamula-ha da angguru papindi
hi na-pahadangu lewatu ngia padai.
Naàki-ya na hau na lambongu
na ngia papohu-nanja da angguru-na,
hàla na-patia-nja rarada da wuana,
tàka da-pahunggu-na wua angguru ma-mayilu jua-ma-aha.
3Tàka nàhu panii-nanyaka na ariyaa-nggu,
“Nyimi mbuu ndàbami mangia-nya la Yeruhali dàngu Yahunda,
patanda-nggama ngerama nyuma, na woka angguru-nggu dàngu Nyungga.
4Màla ningu nu panda raïnggu,
la woka angguru-nggu?
Tàka nggikina ihu hi da-mayilu hàlaika da wuana,
hi nda mahàmu-hai hama tuna na pamonu-nggu làti?
5Na, tuna nuka napa na pawunda-nggunya na woka angguru-nggu:
da oka da ma-winggiru-nya napa ku-butuhu-ha,
da kangeli da ma-nggàpulu-ya napa ku-nyungguru-ha,
hàla hi kupuli-nja da banda bohu ka danganya
dàngu ka da kali - lijaku-nya.
6Napa kupuli-nya hi natumbu-nya ma-àtalu tumbu.
Da pingi angguru-na nda kuroka-anjapa, dàngu nda kubuta-anya rumbana.
Tàka napa ku-pahia-nya ka na-pandàda-nya rii madàka dàngu rumba,
malai na karumangu nda ku-pahia-anyapa la pa-kawàtiku-nya urangu nyuna,” wàna.
7Nadu na banjaru Ihirailu
làti woka angguru-na i MIRI Mahupu-mbihaya,
tàka na tau Yahunda
pingi angguru pa-pamula-naha.
Welingu lai nyuda na-nedingu mamola,
tàka hi mbana eti biayai.
Na nedingu ka da-pamàndu-nya na pa-deningu,
tàka hi kaladaku makarai mola biayai na maninya.
Na akatu pawunda-na na tau
8Ura pàku-ami-nyaka nyimi makeiha da uma dàngu maramba-nja da woka bai bonja wànja da mangumi! Nda nahili mandai-apa njàpu-danyaka da pangia-na na tau hawiangu tàka hi mbulungu nyimi-makia-ka ma-ndàdiku la tana nuna. 9Kurongu-ya i MIRI Mahupu-mbiha ba na-harangu, “Da uma - uma da ma-bokulu dàngu ma-manandangu yiada mbuu ndàbada napa da malinggitu ba nda ningu mangia-nja. 10Da ihi tana napa da-pandàngangu, na woka angguru ba hakambulu hekutari-na ana hakambulu litaru-ma-ana wai angguru na ihina. Na uhu ba hangahu litaru-na na wini, ana hakambulu litaru-ana na ihina,” wàna.
11Ura-pàku-ami-nyaka! Piti weli mbarungu lundu na-malingu ba wolu araku-maaka paunu-mi hi lupa imaüku dira matiki. 12La remi - remimi ningu lingu jungga, lamba karia jungga, lamba ha-kapapa dàngu taleli tàka hii unungu angguru. Tàka ndai kawela-anya na paràma-na i MIRI dàngu na pawunda-na. 13Jia ba tuna na banjaru-nggu na manda nggàra papina hi dundilu-ya palaku ba tanawangu-ha. Da liku uru dàngu na rayatu da meti ruku rimbangu dàngu kandànga. 14Na ngaruna na meti na-hanganga tabonga la pahoba-ha da liku uru la Yeruhali dàngu na rayatu na mambabu ba daremi.
15Nimbihu-na na tau napa pamakia-ya, tàka na ma-ngànjangu napa pa-pawawa-ya. 16Ba tuna i MIRI Mahupu-mbiha pa-itangu-nanyaka duna bunjuku-na ba nalaku-nya na ma-padeningu. Nyuna napa na-pajiliku-nya na matua-na ba nawàngu pa-patanda-nya ngerana na banjaru-na. 17La kanànda-na na paraingu da ana kamàmbi dàngu mbimbi napa niti-danyaka rumba dàngu nda nanjaka-nja pangangu.#La lawiti Imbarani nda na-lohangu-a jàka nggàra wàna na ndalaru yiana.
18Ura pàku-a-minyaka nyimi mapanu-takungu panjala! 19Na paniimi, “Màta bianya i MIRI Ala matua Ihirailu ka naluma parenggangu pa-kukutungu! Màtawa ka nalu pahàra-nya na pakaka-na ka taita-ya dàngu ka tapinya,” wàmi.
20Ura pàku-a-minyaka nyimi bai panjingu njànganya na mahàmu dàngu na ma-akatu, na ma-kapàtangu dàngu na maharii, na ma-paita dàngu na malàngga!
21Ura pàku-a-minyaka nadu bai kaka wikimi bai manggàna dàngu ba lalu pingumi!
22Ura pàku-a-minyaka nyimi mapeka hau mini la pa-unungu angguru! Nyimi ma-kaborangu manda mangàdatu jiapa ka pakorunja da paunu maüku! 23Tàka màta ka ma-ngalangu wàngu àmahu li kajia ba wàmi, nyimi mi-pahàla-ma-aya na tau njala, tàka hi mihiri-nya na manda njala ka pa-mànanya. 24Nyimi mi-tulaku-yaka na papekangu-na i MIRI Mahupu-mbiha, dàngu bai pakàba-ya na hupu liina i Ala matua Ihirailu. Jiaduya nu, hama tuna na rembi dàngu na rumba meti ba nakehi làpu la epi, tuna numbu napa da amumi ba da-muhungu, da wàlami ba damàdu, hàla molungu-danyaka ba na-jiliru-ha ngilu. 25I MIRI nambeni-nya na banjaru-na. Nyuda mbàda rimangu-manaka la pahuku-nja nyuda. Da palindi napa da-yoyangu; da meti tau da-tapàlangu hama tuna ma-parumba la ànda. Ba tuna i MIRI mbeni-mananya-pa dàngu napa daingu pa-hukungu-manaka.
26I MIRI napa napaau-nya na banjaru marau#Talànga wanguna na-njenjangu ningu-mapa ba tuna yia na ihina: na banjaru marau;Imbarani: da banjaru marau. tàka hi damai pa-renggangu! 27Nyuda rimangu mànu-madanya la pa-pabera dàngu nda dapingu-a panjili. Ndedima duda da-katuda jàka ndia la pa-tàtiku. 28Da ana panana dadàka dàngu na pàndina patiangu-nanya patungu-kiaka. Da wuu njarana hama kalatungu watu epi, dàngu da ndutungu kareta-da dawingu hama mbangatu ngilu làpuru. 29Da ngara panjuri-na da-kangaüku hama tuna hinga mabidi hàla pa-njàkapu pahoba-na, hi napalai ngàndiya ka àmbu ningu ma-pahàla-ya.
30Na lodu nuna na kaladaku pa-kangaburu napa narongu la nggubulu Ihirailu ba hama kanduu libu muruya.
Tàngaru, la nggubulu paraingu nakapà-tanguka dàngu ma-handuka jua-yaka. Na harii na-pambeli-ya kapàta wuru yila-yaka.
@LAI 1995 Indonesian Bible Society (Lembaga Alkitab Indonesia)