MA-PABOBARUNGU 3
3
Mbuu ndàbana ningu rehina
1Mbuu ndàba da manjadi la pinu tana yiana
danjadi la rehi pa-kawuku-na i Ala.
2I Ala na-kawuku-ya na rehi habola dàngu na rehi meti,
na rehi tondungu dàngu na rehi buta,
3na rehi pameti dàngu na rehi pahàmu,
na rehi nyànggaru dàngu na rehi pahadangu.
4I Ala na-kawuku-ya na rehi handuka dàngu na rehi hawola,
na rehi hawina dàngu na rehi renja,
5na rehi pa-angungu dàngu na rehi nda uku pa-paangungu,
na rehi parohu dàngu na rehi roputu wiki.
6I Ala na-kawuku-ya na rehi hunggu dàngu na rehi mbulangu,
na rehi kangutungu dàngu na rehi borakungu,
7na rehi hira dàngu na rehi utu,
na rehi kandii dàngu na rehi kareuku.
8I Ala na-kawuku-ya na rehi panamu dàngu na rehi paumbingu,
na rehi pabera dàngu na rehi papeku.
9Nggàra-yaka na wunda njilinda? 10Kupinya ba nawua-nda buku mbotu i Ala. 11Na-kawuku-ya na rehi ma-jàngapu ndumana mbuu ndàbana. Nawua-nda rinju eti la papinya na rehi na manàmu-nya, tàka nda jia jàngapu-andanya mbuu ndàba da pawunda-na i Ala welingu la pakiri-na lundu la hupu njàpuna. 12Kupinya ndumanda nyuta, ba nda ningua marihi pahàmu welingu la pa-hawola dàngu la papàda hàmunya na luri la ngala lurinda. 13Nahàmu-pa nyuta mbuu ndàbanda ka tangangu ka ta-ngunungu dàngu la papàda hàmunya na ihi paràma-nda. Nuda nu pawua-na i Alaha.
14Kupi-manya mbuu ndàba da pawunda-na i Ala ba da-padaingu lundu nu - nu. Nda peku bonja-ananya jàka ndia nda peku pa-kawawaku-ananya paraï tau. Hi tuna nu na pawunda-na i Ala ka peku mangàdatu-ndanya Nyuna. 15Na manjadi la rehi nàhu mbàda njadi-naka la mangilu. Na maninya la rehi na manàmu-nya, mbàda ni weli ndai-manyaka. Mbàda kawuku-nanyaka paraïna i Ala, ka nahili njadi na mambàda njadi.
Na nda molana la pinu tana
16Hili ninyapa na paita-nggu la pinu tana yiana: la ngia paninya na mola dàngu na hàmu làti, lai nu ninya na akatu. 17I Ala na-patanda-nya na tau hàmu hamangui na tau akatu-mbu, wànggu la kanandingu-nggu, nadu na manjadi-ka dàngu na pawunda - pawunda-ka napa da njadi la rehi pa-kawuku-na i Ala. 18Ku-jàngapu-ya la kanandingu-nggu: ba manginjiru-nanda i Ala la pa-paloha-ndanya ba nda ningua hekangu-nda welingu la ngera banda. 19Jiapa ka nggi - nggikina kadu, na ngera tau dàngu na ngera banda hama-ma-ada. Na tau nameti, tuna numbu na banda. Hama-ma-ada ba pa-padikangu-ha. Ba tuna, na tau nda narihi-a pautu welingu la banda, nadu na lurida ba kahewa-ma-ana. 20Hama-ma-ana na ngia pa-hanggangu-da. Ba welida la kumburu tana jiangu-ma dabeli la kumburu tana. 21Nda tapi-anya nyuta jàka naheiya hu dita na ngahu tau dàngu jàka na puruya hu daa la tana na ngahu banda. 22Jia ba tuna, kupinya ba nda ningua marihi pahàmu ndumana na tau welingu la papàda hàmunya na ihi paràma-na. Hinggilu-na nuna nda hili nggàra-a pawunda-na. Nda jia pi-ananya jàka nggàraya na manjadi la taliu metina.
@LAI 1995 Indonesian Bible Society (Lembaga Alkitab Indonesia)