2 HAMUILU 4
4
I Ihimbohitu ba ningu ma-pameti-ya
1-4Da wàla wuana i Haulu hawiangu, jiaya i Mepimbohitu, anana i Yunatàngu. Nyuna na-kanjiku welingu ba lima mbua ndau-anapa ba jiaya nameti-da i Haulu dàngu i Yunatàngu. Nadu ba darongu-yaka na lii metida welingu la paraingu Yihireyilu na matanggu lungguya i Mepimbohitu na lunggu palai ngàndiya; tàka ba lalu karinggatu-na nuna na kawini, ka yàmihu-nanyaka na anakeda, hi lupa na-kanjiku wànya.
Ba narongu-ka i Ihimbohitu, anana i Haulu, ba na-pameti-yaka tau i Àpuneru, tamaï-nanyaka na ringgitu-na, hamanai na tau Ihirailu nggubulu-na daridu wànyaka da etida. Lai Ihimbohitu ninja da parawira-na da madua, da kapala pamba matungu mangilu, na haàtu Mbaana-ya na tamuna tàka na haàtui Rekàpu-ya. Nyuda anana i Rimungu-ha, welingu la Mbaerutu la kabihu Mbanyamingu. (Na Mbaerutu na tama la ngaba Mbanyamingu. Da tau mangia memanya dapalai-ka la Nggitaïmu hi da-paengangu lai nu piti welingu la rehi nu.)
5Nuda da parawira madua, i Rekàpu i Mbaana hadangu-danyaka hi dalaku la umana i Ihimbohitu dàngu ba datàka lai nu tidu lodu-mayaka, nyuna i Ihimbohitu talànga katuda loduna. 6Na kawini na madai uma tàtiku-nanya ba talànga kahiri-na uhu nggàndumu, ka katuda-nanyaka. Jia-duyaka i Rekàpu dàngu i Mbaana hi peku biana ba datama kawiningu.#Na ndalaru yiana na pa-namatungu la hau pa-haleli ndai. Imbarani: Datama la uma nuna dangàndi uhu nggàndumu hi datanju weli kambuya. Hàlaka nu hi dawala wikida i Rekàpu dàngu i Mbaana. 7Ka tama pangalangu-danyaka la kuru ngia pa-katuda-na i Ihimbohitu ba talànga katuda minjalu-na, hàla hi dahunju-maaya hi lupa nameti. Da-katiku-ya na katiku-na hi dalaku ngàndiya. Rudungu memana nunama ba lundu harii-na ba dalaku li ningu la Lolangu Yorundangu. 8Tunaka nu tàka wotu-danyaka na katiku-na i Ihimbohitu lai Ndautu la Hemburungu, hi dapanii, “Yiana-yaka na katiku-na i Ihimbohitu, anana i Haulu muhumu Tamu umbu, na ma-patikingu pa-pameti-kau làti Tamu umbu. La lodu nàhu i MIRI tungu-nanyaka hilu la paruku-na i Haulu dàngu wàla wuana,” wàdanya.
9Tàka nahema i Ndautu, “I MIRI na maluri, na mambàda pamara-ka welingu la pa-manjurangu wànguka, napi-manya napa yiana na papanii-nggu ba ma-tubangu-ya. 10Ba ningga la Hikulàku ningu tau mamai papanii-ngga ruku metina i Haulu, ba nareki-ya ngàndi-nanya lii mahàmu. Tàka nyungga hi kuyàpa-ya hi ku-pameti-ya. Nuna-yaka na wundana na pawua-nggunya himbalu-na na lii na patàka ngàndi-nangga. 11Ka narihi-aipa duna pambotu na hukungu na pa-panabu-nggunya na tau akatu na mambàda pameti-ya na tau na manda ningu njalangu ba talànga katuda-na la uma wikina! Nàhu karuhi-nggunyaka na himbalu-na lai nyimi na ruku pameti-mi tau, dàngu ka pamolu hàlanggai nyimi welingu la pinu tana yiana!” wàna. 12Hàlaka nu i Ndautu hi nawua-nja pareta da tau la wawana, la pa-pameti-ha i Rekàpu dàngu i Mbaana. Ba hàlaka pa-pameti-ha, hi kadipu-ha da limada da wihida dàngu hi tiwalu-nja la lihi tàma la Hemburungu. Tàka na katiku-na i Ihimbohitu napiti-ya dàngu hi taninya lai nu la paraingu la retina i Àpuneru.
@LAI 1995 Indonesian Bible Society (Lembaga Alkitab Indonesia)