2 HAMUILU 20
20
Na katadaku-na i Hemba
1La paraingu Ngginggalu ninya na haàtu na tau pa-riwatungu, na tamuna Hembaya. Nyuna anana i Mbikiri, welingu la kabihu Mbanyamingu. Ba jia-yaka na tàkana na pajurungu-na i Ndautu, i Hemba nahapii taropitu hi na-warangu, “Nyuta nda ta-panua dà-anya i Ndautu. Nggàra lingu-naka ba takiku-nya nyuna? Ha tau Ihirailu, màlawa ka tabeli!” wàna. 2Ka laku-danyaka da tau Ihirailu, ba da-dunjaku-nya i Ndautu, dàngu hi dakiku-nya i Hemba. Tàka da tau Yahunda jiapa-maha duda na tuturu-da, ba dakiku-nya i Ndautu welingu la Luku Yorundangu lupa tàka la Yeruhali.
3Ba natàka-ka i Ndautu la uma hanganji la Yeruhali, da kala wihina ba tau hakambulu-ha da-pabànjalu-na la padaiya na uma hanganji, na-bànjalu-ha la hau uma na padaida da tau manggangu. Na-pamàtu-manja ngara pa-kalana-da, ba tuna i Ndautu nda nahilu katuda angu-anjapa. Jia ba tuna pa-kàpitu-ha nyuda hi daluri hama tuna na kawini meti lei lundu metida.
4Na hanganji napanii-nya i Amaha, “Pauhi-nya na tau Yahunda dàngu kai mai kariangu lai yiahu la dalu tailu mbua lodu,” wànanya. 5Ka laku-nanyaka i Amaha la pa-pauhi-nja nyuda, tàka nyuna nda nabeli-a la rehi pa-kawuku-na na hanganji. 6Tunaka nu panii-nanyaka na hanganji lai Ambihai, “I Hemba narihi pa-handuka-tapa welingu lai Àpuhalomu. Jia-duya karia-nja da tau la wawanggu, kai yauluya, napa ka àmbu na-mandapu-nja da paraingu da maningu tindingu, ka pahili-nanyaka welingu lai nyuta,” wàna. 7Ka iru ngàndi-nahaka paraïna i Ambihai, da pambana i Yuàpu dàngu da pamba manggangu wikina na hanganji lupa mbuu ndàbada da tanatara hawiangu, hadangu-danyaka welingu la Yeruhali, palua payaulu-ya i Hemba. 8Ba datàka-ka la watu bokulu la Nggimbiungu, tàka-nanyaka i Amaha ba namai tomaha nyuda. I Yuàpu wotu-manaha da paki pabera-na, na hapanda-na jiapa-maya ba naboru-nya la bànggina. Ba nalaku ndàharungu-ka nu pahàlangu-nanyaka na tiku hapanda-na hi na-tanggihiru na hapanda-na la lima kalaina. 9I Yuàpu napanii dànya i Amaha, “Màla hiana, anda?” wàna ba dàngu yàpa-nanya na njerina i Amaha wàngu lima kawana-na hama tuna patikingu-nanya pa-puduku-ya. 10I Amaha nda naita-aya na hapanda la lima kalaina i Yuàpu. Hi jia tanju biana-nya na hapanda i Yuàpu la kambuna i Amaha, hi lupa na-hamburatu na ihi kambuna la tana. Nameti memangu-ma la rehi nuna, hi nda nggàra naihi wàngu-apa i Yuàpu la pahili tanjunya.
Hàla i Yuàpu ada i Ambihai, na erina, hi da-yaulu pangala-nya i Hemba. 11Na haàtu na tanatara-na i Yuàpu, na-ndolaku lihinya na metina i Amaha hi na-warangu, “Nggamu na ma-hapeparu lai Yuàpu dàngu i Ndautu, tundunya i Yuàpu!” wàna. 12Na metina i Amaha, na maihu wàngu wai ria, tawàlahu bia-nanyapa la mata ànda. Na panjuri-na i Yuàpu nu kawai naita-ya na tau mbuu ndàbana na mali lai nu, na-pànjangu-mapa lai nu. Jia-duyaka hi na-ruruhu-ya nuna na tau meti la woka tàka hi na-palumburu-nya hinggi. 13Ba paleli-nyaka nuna na mameti welingu la ànda, mbuu ndàbana na tau laku pangalangu-nanyaka, ba datundu-nya i Yuàpu la payaulu-ya i Hemba.
14I Hemba mbàda njada hàla-mana-nyaka na ngaba tanada da kabihu Ihirailu, nu ka tàka-nanyaka la paraingu Ambilu-Mbetu-Maaka, tundu-madanya paraï mbuu ndàbada da angu biliku Mbikiri.#Talànga wanguna na ihina na-njenjangu ningu-mapa: Mbikiri; Imbarani: Mberi. 15Da tau la wawana i Yuàpu darongu ba ninya i Hemba lai nu, ka nggupulu-madua-danyaka nuna na paraingu. Da-pabundu weli winggiru-nya tana la hambeli kangeli tàka hi da-pakiringu paàki lumbuya na kangeli ka nyungguru-ya ba wàda. 16La paraingu lai nu ninya na haàtu na kawini manggàna, na-ndolaku dita la pinu kangeli hi na-warangu, “Patingingu! Patingingu! Karaiya i Yuàpu ka namai yiahu, ka kupanii dànya wànggu,” wàna. 17Ka mai-nanyaka i Yuàpu, hi na-paàrangu nuna na tau kawini, “Jia-kauka Yuàpu, umbu?” wàna.
“Wua,” hi wàna i Yuàpu.
Napaya nuna na tau kawini, “Patingi-nya na paniinggu, umbu,” wàna.
“Hàmudu, ku-patingi-manya,” hi wàna i Yuàpu.
18Napaya na tau kawini, “Àmangu na tau nakàli panii tuna yia, ‘Jàka umbuhangu parongu panaungu, lua bia la paraingu Ambilu,’ wàna – tàka nuna-duyaka na pawàda. 19Na paraingu Ambilu-ma nyuma yiana paraingu bokulu-ya, hau paraingu ma-kanjupu mambiru dàngu ma-tuturu-ya la tana Ihirailu. Nggikina nyumu umbu hiu patikingu la pa-nyungguru-ya? Umbuhangu nyumu pa-paruha-ya na tana manguna i MIRI?” wàna.
20“Nda hidama!” wàna i Yuàpu, “nda ana patikingu-manggu duku la pa-paruha-ya jàka ndia la pa-nyungguru-ya yiana na paraingu-mi! 21Nuna nu nda ana wuku-mamanya duma. Tàka na haàtu na tau, na ma-tamungu Hemba, na anana i Mbikiri, na ma-pawelingu la ngaba tana ma-palindingu la Epuraïmu, na-katadaku-ka lai Hanganji Ndautu. Puli nggamanya nyuna, hàla napa kandulingu-manggunya duku welingu la paraingu yiana,” wàna.
Napaya na kawini nuna, “Na katiku-na na tau nuna napa mandauha-nggaunya nyumu, welingu la kangeli yiana,” wàna. 22Ka lua-nanyaka ba wàngu màhina la pa-patàka-nya nuna na pawuku-na la tau mangia-nya na paraingu nuna. Hàlaka nu katiku-danyaka na katiku-na i Hemba hi dandauha-ya lai Yuàpu. Tunaka nu i Yuàpu hi nahapii-ya na taropitu-na, tàka da tau la wawana dunjaku-danyaka nuna na paraingu hi dabeli la umada haàtu - haàtu. I Yuàpu duna beli-nanyaka la Yeruhali pa-hurungu la hanganji.
Da panggawi-na i Ndautu
23Yiada-haka da ma-katangu mambotu da-pawotu-na i Ndautu:
Na mini la ngorana mbuu ndàbana na tanatara Ihirailu: i Yuàpu.
Na kapala pamba manggangu wikina i Ndautu: i Mbanaya anana i Yuyanda.
24Na kapala la paràma mambotu: i Anduràmu.
Na ma-katangu banda nanggara: i Yuhapàtu anana i Ahilutu.
25Na hakaratarihu nanggara: i Heya.
Da ratu: i Handuku dàngu i Àpuyataru.
26Na ratu la uma hanganji: i Ira welingu la paraingu Yairu.
@LAI 1995 Indonesian Bible Society (Lembaga Alkitab Indonesia)