2 HAMUILU 18
18
Ba pakàku-ya i Àpuhalomu dàngu ba nameti
1I Hanganji Ndautu na-pauhi hàlanja da tau la wawana, hàla hi nakawàri - kawàri-ha ba hau pauli - hau pauli-da ningu matau harata-na, dàngu ningu matau hangahu-na. Tunaka nu hi nawotu parawira ma-kapala-nja da hau pauli - hau pauli-da. 2Hàlaka nu hi napuli-nja pa-ndàharungu la pa-pabera, ba da-katailu pambangu, nimbihu-da da kapipi-ha paraïda i Yuàpu, i Ambihai erina i Yuàpu dàngu i Itaï welingu la Nggàta. Napanii na hanganji la tau la wawana, “Nyungga wiki ku-karia manggai duku,” wàna.
3Tàka dahema nyuda, “Màtangu, Tamu umbu. Nadu jàka mapalai lerangu, jàka ndia napa hi beri mandua-maka mameti lai nyuma, na muhu nda naànga karia-anya, nadu ba nyumua Tamu umbu pa-patuki-da. Na bilamu nyumu Tamu umbu tau 10.000 bàdi welingu lai nyuma. Hinggilu-nai rihi hàmu Tamu umbu nyumu kau tanggu pangàndi-nggama pa-ndulangu-a welingu la paraingu,” wàdanya.
4Hàla hi napanii na hanganji, “Hamukai duna, na pambuha-mi nyimi-kaka,” hi wàna. Tunaka nu hi na-ndolaku la karaha pindu bokulu paraingu, ba talànga pa-jurungu hàlada da pamba ba daluhu hau pauli - hau pauli ninja da ma-harata-da, ninja da ma-hangahu-da. 5Hàla na hanganji hi nawua-nja pareta i Yuàpu, i Ambihai dàngu i Itaï, “Àmbi jia pa-manua-minyaka na bidi mini i Àpuhalomu, lumunggu nyungga,” wàna. Mbuu ndàbada da pamba rongu hàla-madanya na pareta-na i Ndautu.
6Ka hadangu-danyaka da pambana i Ndautu pabera-ya na pamba Ihirailu, tàka hi da-pakangaburu la omangu Epuraïmu. 7Da pamba Ihirailu na-pakàku-ha paraï da tau la wawana i Ndautu; kàku halawàla-madanya, tau 20.000-ya na ma-yàmihu la lodu nuna. 8Na pa-kangaburu na-làmbatu la nggubulu ngabana lai nu, dàngu nadangu ningupa na mameti handànga la omangu welingu la ma-yàmihu ruku pa-kangaburu.
9I Àpuhalomu, ba dàngu kaliti-nanya na mbanggaàlu-na, hi jia tàbuku bia-nanya na tau la wawana i Ndautu. Na mbanggaàlu-na narunu la lumbu ai bokulu ma-kendaru, ka hanggetu-nanyaka na katiku-na i Àpuhalomu la kahanga ai. Na mbanggaàlu-na palai pangalangu-mananya ba na-kawihiku lai nu. 10Na haàtu na tau la wawana i Ndautu naita-ya hi nalua pa-wàlahu-nya i Yuàpu, “Umbu, kawai kuita-ya i Àpuhalomu ba na-kawihuku la lumbu ai bokulu!” wànanya.
11Nahema i Yuàpu, “Nggàraya? Uitaya? Nggikina hi ndau luma pameti-ya? Làti kuwua-manggau hakambulu àmahu bara dàngu hawalangu borungu,” wànanya. 12Tàka nahema na tau nuna, “Jiapa ka ndau wuangga harata àmahu bara, nda jia bihu-anggu duku la pa-pajàra-ya na ana hanganji. Ba rongu hàla-mamanya na pareta-na na hanganji lai nyumu dàngu i Ambihai hamanai i Itaï, àmbi pa-manua-duya i Àpuhalomu, na bidi mini, lumunggu nyungga, ba wàna. 13Dàngu jàka jia pameti-nggunya làti kawai i Àpuhalomu, jiangu-maka duna na hanganji ba napinya, nadu na hanganji ba narongu hàla biaya duna jàka nggàraya – tàka nyumu nda jia kahiri-amungga,” hi wàna.
14“Jiaka-wa! Nanjàpu-ka na rehi ba pahema ngaru dànggau nyumu,” hi wàna i Yuàpu. Ka piti-madua-nanyaka nimbu tailu mbungu hi nalua pakoja weli kurunya i Àpuhalomu, làti luri bia-nanyapa ba na-kawihiku la ai. 15Tunaka nu tau hakambulu-ha la wawana i Yuàpu da malua pa-karunggi-ya tàka hi da pameti-ya.
16I Yuàpu na-palingu taropitu, ka pànjangu-danyaka da tau la wawana payaulu-ha da pamba tau Ihirailu. 17Tunaka nu na metina i Àpuhalomu dendi-danyaka hi da-panàngga-nya la humuru manjolungu la omangu. Na humuru nuna da-pabundu-nya watu hi lupa najangga. Nggubulu ndàbana na pamba Ihirailu palai beli-danyaka duda nimbihu-da la umada.
18Ba naluri-pa i Àpuhalomu mbàda pahadangu-naka nduma wikina hau andungu la Lolangu Maràmba, nadu nyuna ba nda ningu anana mini na ma-panua-nya na wàla wuana. Na andungu nuna natunya tamuna tundunya na tamu wikina, dàngu lundu nàhu na andungu nuna napi-manya tau na Andu Àpuhalomu wàdanya.
Ba paihi-nya i Ndautu na metina i Àpuhalomu
19Tunaka nu panii-nanyaka i Ahimaàhu anana i Handuku lai Yuàpu, “Pahia-ngga ka kupalai la hanganji dàngu ka kungàndi-nya na lii hawola, nu i MIRI ba pamara-nanyaka na hanganji welingu la muhuna,” wàna.
20“Màtangu,” wàna i Yuàpu, “napa handàka duna. La lodu nàhu àmbu ngàndidu lii, nadu na ana maràmba ba yàmihu-nanyaka,” wàna. 21Tunaka nu i Yuàpu hi napanii-nya na atana, na haàtu tau Hundangu, “Luawa kau paihi-nya na hanganji nggàraya na pambàda ngitamu,” wànanya. Na ata nuna na-patika hi nalaku ba nawàngu papalai.
22Tàka i Ahimaàhu na-dàhiku-ya i Yuàpu, “Jiapa nda nggàraya na madedi, puli-mangga bàdi ka kungàndi lii,” wàna.
“Nggikina hiu pa-mbanangu palaku, ananggu?” wàna i Yuàpu. “Nda jia ngalangu-amu wundamu rukuna nuna,” wànanya.
23“Nda nggàra ehi-ana,” wàna i Ahimàahu, “laku-manggunya duku,” wàna.
“Jàka tuna nu, kau luawa,” wàna i Yuàpu. Ka palai madua-nanyaka i Ahimaàhu ba na-pipitu-ya na ànda na mali la Lolangu Yorundangu, dàngu ndedi nggi mandai hipu-madua-nanyaka na ata Hundangu kawai.
24I Ndautu mandapu-na padua la njonga pindu bokulu mbara dalu dàngu pindu bokulu mbara lua. Na madai nahei la pinu kangeli dàngu hi na-ndolaku la toku ndidu pindu bokulu. Ba na-pawilikungu-ka matana, ita-nanyaka na haàtu na tau na mapalai hanggangu nàmu. 25Na madai na-warangu hu wawa, ba napanii-nya na hanganji na rukuna nuna, napanii na hanganji, “Jàka didi-aya nyuna, ngàndi-nanya lii hàmu-duka,” hi wàna.
Ba mareni tàka-naka nuna na tau, 26na madai hilu ita-nanyai na haàtu na tau, jia-mayai ba napalai hanàmu-na. Jia-duyaka hi na-warangu, “Tàngaru! Hilu nàmu-manyaipa na mapalai meha,” wàna.
Nahema na hanganji, “Jiangu-ma ba ngàndi-nanya lii hàmumbu,” wàna.
27Na madai napanii, “Na tau ma-mangilu jiaya i Ahimaàhu. Kupinya ba kutanda-ya na huri palaina,” wàna.
“Nyuna tau hàmuya,” hi wàna na hanganji, “lii mahàmu-mayaka duna na patàka ngàndina,” hi wàna.
28I Ahimaàhu nawara ba napulu danya na hanganji, hàla patika-nanyaka hi napanii, “Pa-wotungu-ya i MIRI Alamu Tamu umbu, na mambàda puli-nggaunja Tamu umbu da tau da ma-katadaku lai nyumu Tamu umbu!” wàna.
29Na-paàrangu na hanganji, “Ka i Àpuhalomu, na bidi mini, ndiadu nggàra ehina?” wàna.
Nahema i Ahimaàhu, “Tamu umbu, kawai ba na-palewa-ka i Yuàpu, ku-itangu ma-pa-riwatungu halawàla, tàka nyungga nda kupi-anya jàka nggàraya na madedi,” wàna.
30“Ndolaku-wa lai nu,” hi wàna na hanganji; ka lua-nanyaka i Ahimaàhu la halinggi hi na-ndolaku lai nu.
31Tunaka nu tàka-nanyaka na atana i Yuàpu, hi napanii la hanganji, “Nyungga ngàndi-nggunya lii hàmu lai nyumu Tamu umbu! La lodu nàhu i MIRI nawua-nggauka patalu wàngu la tauka na ma-katadaku,” wàna.
32Na-paàrangu na hanganji lai nyuna, “Màla i Àpuhalomu, na bidi mini, ndiadu nggàra ehina?” wànanya.
Hàla nuna na tau ata nahema, “Mili àru mbuu ndàbada da muhumu Tamu umbu, mbuu ndàbada da tau da ma-katadaku lai nyumu, Tamu umbu, ka dahunggu urada hama tuna nuna na bidi mini,” wàna.
33Narongu-yaka nuna na hanganji, hawina-nanyaka, hi nahei la kurungu la pinu pindu bokulu dàngu hiina ba na-padudurungu, “Doi na ananggu duku! Na ananggu i Àpuhalomu! Àpuhalomu na ananggu duku! Nahàmu-pa ka kumeti ningu nyungga làti hilukau nyumu dou na ananggu! Àpuhalomu dou na ananggu!” wàna.
@LAI 1995 Indonesian Bible Society (Lembaga Alkitab Indonesia)