2 HAMUILU 1
1
Na ronguna lii metina i Haulu i Ndautu
1Ba nameti-ka i Haulu, i Ndautu nabeli-ka welingu la pa-kangaburu, ba natalu-ya na tau Amaliku, na-ndàdiku-pa dàmbu lodu la Hikulàku. 2Hadangu-ka harii tàka-nanyaka na haàtu na bidi mini welingu la ngia pa-pamaüngu-na i Haulu. Ba tanda hawina-nanya nahira walaha da pakina dàngu hi natunya tana na pinu katiku-na. Na-hurungu lai Ndautu hi na-maràbaku la hanggana. 3Na-paàrangu i Ndautu, “Nggi welimu nyumu?” wànanya.
Nahema, “Nyungga palai-nggunya welingu la ngia pa-pamaüngu tau Ihirailu,” wàna.
4Na-paàrangu i Ndautu, “Màla paniiya jàka nggàraya na matumbu!” wànanya.
Nahema na bidi mini, “Da tanatara-ma dapalai-ma welingu la ngia pa-kangaburungu, hi nadangu na mameti, jiambu-duhaka i Haulu dàngu i Yunatàngu,” wàna.
5“Nggikina hi mupinja?” hi wàna i Ndautu ba na-paàra-nya.
6Nahema, “Talànga ni pàkunggai duku la Palindi Nggilimbua, hàla kuita-ya i Haulu ba na-haria-ya na nimbuna, tàka da kareta dàngu da tanatara muhu la njara, mareni-mada-nyaka la pa-nggupulu-ya. 7Tunaka nu nggilaku-nanyaka la kajia, hi naita-ka nyungga, ka paau-nanggaka, hi kuhema-ya, ‘Ou Tamu umbu,’ hi wànggu. 8Na-paàra-ngga jàka nggamuka, tàka hi kupanii-nya, nyungga yia ba tau Amaliku-ka. 9Hàla panii dàna-nggaka, ‘Nàmu-kikau, kau pameti-ka! Lalu mandàkangu-na na manua-nggu, dàngu meti-ama-ngguka,’ wànangga. 10Ka ndàharungu-dunggu-nyaka lai nyuna, hi ku-pameti-ya, nadu ba pi-manggu-nyaka jàka nanjoru ba nda namàka-apa pa-ndolaku ba jiangu-ma nameti. Hàla piti-nggunyaka na tubuku àmahu rara la katiku-na dàngu na kara àmahu la punguna, hi kumai ngàndiya nàmu lai nyumu Tamu umbu,” wàna.
11Narongu-yaka nuna i Ndautu bàriku-madua-nanjaka da pakina paraï pa-hawina, hamanai mbuu ndàbada da tau la wawana wàngu tuda numai duda. 12Dapadudurungu, da-mahàna dàngu darotu wikida lundu malingu-na lumuda i Haulu dàngu i Yunatàngu, dàngu lumuna na rayatu Ihirailu, na banjaru-na i MIRI, nadu ba nadangu langatàka ma-yàmihu nu la pa-kangaburungu.
13Tunaka nu i Ndautu hi na-paàra-nya nuna na bidi mini na mangàndi lii, “Nggiya na ngia paweli-mu nyumu?” wànanya.
Nahema, “Nyungga yia tau Amaliku-ka, tàka haàtu tau tama-aka duku la tanamu nyumu Tamu umbu,” wàna.
14Napaya i Ndautu, “Mutoru mbeni pàku nyumu pa-pameti biaya na hanganji papindi-na i MIRI!” hi wànanya. 15Hàla paau-nanyaka na haàtu na tau la wawana hi nawua-nya pareta, “Pameti-ya nana!” hi wànanya. Nuna na tau hi nahunju-ya na bidi mini Amaliku lundu nameti. 16Na paniina i Ndautu la bidi mini Amaliku, “Nyumu wikima dumu marata-ya na hukungu meti nduma wikimu rukuna na papeka-mu ba mbàda pameti-munyaka na hanganji papindi-na i MIRI!” wànanya.
Nahii paduduru-nanja i Haulu dàngu i Yunatàngu paraïna i Ndautu
17Hàlaka nu i Ndautu wunda-nanyaka ludu hali ba na-paduduru-nja i Haulu dàngu i Yunatàngu, 18tàka hi na-wuangu pareta la pa-papeka-nya na ludu yiana#Na hau pa-haleli ndai: na ludu yiana; Imbarani: na tandai pana yiana. la kabihu Yahunda. (Na ludu yiana pa-tulihu-ya daa la Mbukuna i Yaharu.)
19“Ha Ihirailu, la tandula - tandula-mu nu lai nu
damunju-ka da ma-kaborangu, ba hapajia-ha da ana tana nanggara,
damunju-ka ba hama tuna wàlana na banjaru-ha.
20Mili àru da tau la Nggàta ka àmbu darongu-ya na lii nuna.
Mili àru la kanjilitu Àhakelungu àmbu natàka-nja lii nuna.
Ka àmbu jia kakàlaku wànguda da kawini Pilitingu
ka àmbu jia pahangu wànguda da bidi kawini hangàdangu.
21Ha dimi tandula la Nggilimbua patingi-nya na waranggu:
Àmbu jia pambaha-duna-nggaipa mburungu dàngu urangu!
Màtawa ka da-marokutu dàngu ka dambila da woka dàngu da maràda-mu.
Nadu ba lai nudu da-yàmihu ningu da temingu mini mbeni.
Tàka napatai rara-mbuka na temingu-na i Haulu,
ba nda pa-pamina-anyapa.
22Na panana i Yunatàngu jia hàmuya hi pameti wànguya.
Na hapanda-na i Haulu nda nahili paaï
na-pameti-ya na muhu na-pamolu-nya na papana.
23I Haulu dàngu i Yunatàngu, kanjupu kayàwaku-ha ba tau panamu-maha pa-mbuhangu-ha;
da-palaku kariangu mànu la lurida la metida;
darihi hawàritu-pa welingu la tariku,
darihi kapàru-pa welingu la kamboka hinga.
24Ha kawini Ihirailu, paduduru-nyawa i Haulu, na hanganji!
Na ma-pamananda wànggai hundarangga rara mambotu wilina,
na mawotu-nggai ngaü àmahu rara dàngu watu manandangu.
25Damunju-ka da ngara ma-kaborangu ba hapajia-ha,
danjoru la ngia pa-kangaburungu
dita la pinuda da tandula malinggitu
i Yunatàngu na-tanggilungu nda na-nggàduku.
26Ou Yunatàngu, na angu dedinggu duku, namila mumuhu na etinggu,
nadu ba kanjupu pawilingu-kau lai nyungga.
Na mbuha-mungga nyungga kanjupu mangarangu-ya,
naliru lànganya na mbuhangu-na na kawini.
27Da-yàmihu-ka da mini mbeni Ihirailu ba hapajia-ha.
Kahewa pàku-adaka da temi timbi da nimbu tarada!” wàna.
@LAI 1995 Indonesian Bible Society (Lembaga Alkitab Indonesia)