OROMA 7
7
Kumi wogonakwi paga in wakkagak yoragagerak wone
1Ala nen Muta wone lengganogo yoreegerak nogo kineenu me, an wone yokkiraakit mbakirak nogo kineenu aret mbaki o, noreewi. It aakumi ineenik wonogwe logonet, Ala nen Muta wone yoreegerak nogo eeko logorak kwe, kanggo nagaatik perak, eekulik o. 2Kwe ambi onggo pugu kenok, ogonggelo eenik kagak, oone konengge logomenggerak kwe, kangge kenok perak, wone yoge logomenggerak nogo lek aret arumenggerak me, wondet aret logogin o. 3Togop kenok, at kwe nogo ogonggelo eenik kagak, aap alik wagangge kenok perak ti, mbabi aret eeke mbarugun kwe, ogonggelo nogo kangge kenok perak, aap wone yoge logomenggerak nogo lek age me, aap alik wagangge kenok, mbabi eeke mbarugun lek o. 4Nogo ndak-ndak kit kunduk Keritut kinom kunik logonet, kambeegutak nogo paga Muta wone konenggo nogogutak nogo lek aret agagerak me, Ala ake eeko logobagip nduk, at kanggo menggam nen eenik agagerak nogo kinogonggelo negen aret aga o. 5Nit ninobaabut maan mendek paga logonet, Ala nen Muta wone yoreegerak nogo konenggo logonet kwe, ”Niniki nen nengge nogo eeruwam mage yo'nirage yi nineebi o,” yinuk, ninanini ninikime mi'nage nagaatik, maluk ugun eerit nogo logonet aret kambit nogo nogogurak. 6Ala nen Muta wone yoreegerak nogo paga logonet, keele maarak negen wonogogurak kwe, Keritut ninom kambeegurak nogo paga nen piinogo pinaneegerak. Piinogo pinaneegerak me, nit yogondak Ala ake eekwi nogo, ninobaabut maan mendek Muta wone yoreegerak liiru mbanak kenok mban eeko nogogurak nogo ti, yogondak eekulik o. Ata, ninobaabut ngget mendek paga Aberiniki nen yo'nirage kagak Ala ake eeko ogoorik o.
Muta wone lengganak nogo paga nen maluk eekwi tena'me agagerak wone
7Togop kenok, nit wone nonggop yuwok mbakop? Ala nen wone Muta lengganereegerak nogo ti, maluk yugu mbakop? Ti mondok lek o. Muta wone lengganak ti paga nen, ”An maluk eeke minggirak kagi,” yinuk, neenu agagirak. Wone ti paga nen, ”Uugwe-ugwe eerugup o,” yenetak lek nen, an uugwe-ugwe eeriyak mage yereegerak nogo neenu a'netak lek o. 8Wone togop lengganinetak lek nen, maluk eeriyak ee'ninake nogo ti, ”Maluk aret kagi o,” yinuk, mbako logonetak lek o. Muta wone lengganak paga nen, ”Uugwe-ugwe eeriyak mage o,” yereegerak yi neenu logonet kwe, ”Uugwe-ugwe eeruwam mage yo'nege yi, neebi o,” yinuk, ninikime mi'nage logonet, wone mage yugu nogo taganogo punuk, uugwe-ugwe mban mbarit nege nagagirak. 9Aa'nduk nen ti, Ala nen wone Muta yoreegerak nogo an neenggo'lek logonet, ninikiigun teeluk nege nagagirak kwe, wone nogo kin age mbareegi perak, maluk eeriyak ee'nake alom nogo ninikime pilak ari nagagirik, nenggali wappanege logonet, noorogo negen paneegerak o. 10At Muta wone yoreegerak nogo nineenik logorak nduk, yoreegerak kwe, an perak, wone ti paga nen, ”An maluk eekirak me, kambigin kagi,” yinuk, neenu age neegak, mondok nooke negen aret eereegerak. 11Niniki maan mendek maluk eeke menggerak nogo nen, wone yugu taganogo pikit mbake yelok neege nagagirik, ”Nanonggwaan aga o,” yinuk, nambokan lagangge logonet, ”Wone yugu nogo taganogo punuk maluk eeru o,” yinuk, yo'nege kenok eeke minggirak me, wone yugu nogo nen noorogo negen paneegerak agarik o.
12Ti kenok, Muta wone lengganak ti maluk lek obeelom aret o. Ndi, Ala nen, ”Yogop ee'nu, ndogop ee'nu,” yinuk, yereegerak wone nogo ti kunduk Ala nen aret yereegerak me, mondok mot-mot obeelom wone aret kwe, 13”An kambigin kagi,” yinuk, noorogo paneegerak nogo ti, Ala nen Muta yoreegerak nogo obeelom aret me, ti paga an noorogo negen paneegerak mbakop? Abu lek o, noreewi. An maluk eeriyak ee'nake nogo mugurok nage logonet, wone obeelom yugu nogo nen, ”Kit maluk eekwi kiinok kambumunggup o,” yinuk, yereegerak nogo paga kambigin neenu agagirak me, wone yugu ti paga noorogo panulik o. Ata, an maluk eeriyak ee'nake nogo nen aret noorogo paneegerak me, wone yugu nogo ti, we nit maluk eekwi niinok mondok kambuurak kin kaawak nduk, yo'nirage menggerak kogo o.
Niniki maan mendek nen ngget mendek imbirak ogoorak menggaarak wone
14Ala nen wone Muta yoreegerak ti, Ala nen aret yoreegerak nineenu kwe, an neebe perak, kangge minggirak mendek aret o. Aap ambi ayeloman onggo mbanggetak me, at oone konembunuk mban eeke minggi kwak, an togop aret maluk eeriyak ee'nake kenok mban eeke minggirak kagi. 15An eerikit mbake nogo, eeka'lek logonet, eeriyak neebi mbake nogo aret eeke minggirak me, nonggop ee'nake kenok, eeke minggirak o obak! 16An eeke minggirak ti, neebi mbake logonet kwe, eeke minggirak nogo paga, Ala nen Muta yoreegerak nogo ti, ”Abet aret yoreegerak kagi,” mba'nuk eeke minggirak. 17Togop eeke minggirak nogo ti, ”An nen eeri,” yinuk, eekeelik o. Ata, maluk an ninikime wonage nogo nen aret eeriyak ee'nake kenok, eeke minggirak o. 18An obeelom eerikit mbakitak kwe, nobaabut togon abu maluk me, eeriyak meek aret age menggerak me, obeelom eeriyak an ninikime abu lek aret kagi o. 19An obeelom eerikit mbake nogo eeka'lek neegak, maluk eeriyak neebi mbake nogo aret eeke minggirak. 20Togop me, an eeriyak neebi mbake nogo aret eeke kenok, an nen aret eekeelik o. Maluk ninikime wonage nogo nen eeriyak ee'nake kenok eeke minggirak o, noreewi.
21Togop me, obeelom eeriyak mbakwi niigak kwe, maluk ninoba lengganak mban wonage me, eeko monggoorak tit kagi o. 22An ninikime nen ti, at Ala nen, ”Yogop ee'nu, ndogop ee'nu,” yereegerak wone ti, ninikilom aret kwe, 23yilinogo panege menggerak ambi ninikime wonage o. Obeelom eeriyak inom, maluk eeriyak inom, imbirak ninikime logonet, obeelom eeriyak mbakitak nogo kwe, maluk pilak ari logonet obeelom nogo tebenogo pegetak me, an keele maarak negen logonet, maluk mban eeke minggirak o obak! 24Maluk eeriyak ee'nake nogo mban eerit nage logonet, irip paga yobok togon kambuurak aret ari nage me, ”Ta nen nagap ndarigin o?” yinuk, niniki abu maluk tit aga o. 25Nagap ndaruwak nduk, ninowe endagembogut Yetut Keritut wo'niragagerak me, ”Ninogoba Ala wa,” yinuk, yoge agarik o.
Ti kenok, niniki peenok paga nen Ala yo'nege nogo eeke neegak, niniki maan mendek peenok nogo nen maluk eeriyak ee'nake nogo aret eeke minggirak tit kagi o obak!
Цяпер абрана:
OROMA 7: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце