OROMA 4
4
Abarakam abet mbareegerak paga obeelom eeppereegerak wone
1Nit ninombo Abarakam eereegerak wone ti, nonggop yuwok o? 2-3At eereegerak paga Ala nen obeelom eeppenetak nen, ti paga panggombunuk wogoppatiyak kwe, ”At Abarakam nen iniki at Ala oba panggombunuk, abet mba'nuk wonagagerak paga obeelom agago pereegerak o,” yinuk, liiru mbanak wonage ti paga, Ala nen eeppereegerak me, at enggaanom paga wogoppatiyak ti meek o. 4Aap ambi yabu eeketak paga onggo wogoge logonet, ”Yi we wokkigi o” yogeelik. Ata, ”Yi yabu eekendak onggo aret wokkigi o,” yinuk, yoge menggerak. 5Kit nen, ”Ala nen obeelom agago panuwak nduk, nonggop eeri?” mbaka'lek logonet, it maluk eekwi obeelom agago piige menggerak Ala nogo, kiniki oba panggombunuk abet mbakwi kiinok kit abet mbakwi ti paga, Ala nen, ”Kit obeelom aret kiigi o,” yinuk, kinombarigin o. 6Ndi, kit ambi nen, ”An obeelom eekkola,” yinuk, eekkolaga'lek kiigak, ”Ala nen mban obeelom agago pinagage kenok, ale'nggen aret mbako logomunggup o,” yinuk, at Ndawut nogo nen yereegerak nogo ndak-ndak aret yokkirage agarik o.
7At Ndawut nen ari logonet,
”It Ala oone taganggo menggaarak nogo,
Ala nen kobak eerogo piige,
ndi, it maluk eeko menggaarak inomaluk lek eerogo piige,
eeke kenok ti, iniki ale'nggen mbako logogun o.
8Maluk eekaatak inogoba Ala nen eenggi lingginogo yoraga'lek kenok ti,
iniki ale'nggen aret mbako logogun o,”
yinuk, yereegerak.
9Niniki ale'nggen mbako logorak wone yereegerak ti, inagabolo mbanak ti mban inake yereegerak ilik, mbanak lek inom abok aret inake yereegerak a? Lek o. ”At Abarakam nen iniki Ala oba panggombunuk abet mba'nuk wonagagerak ti paga, at Ala nen obeelom eeppereegerak o,” yinuk, Ala wone liiru mbanak aginggwe yokkiragarak nogo aret me, 10Abarakam nonggop kagak Ala nen obeelom eeppereegerak mbakop? At agabolo mbangga'lek kagak obeelom eeppereegerak ilik, mbanak kagak obeelom eeppereegerak a? Mbanak kagak lek o. Ata, mbangga'lek kagak aa'nduk aret obeelom eeppereegerak o. 11Ti'nuk, peebi at agabolo mbaneegerak ti, at Ala nen abet aret at agabolo mbangga'lek kagak, ”Kat obeelom aret keegi o,” yinuk, yoreegerak nogo aakumi ineenu aruwak nduk, peebi at agabolo, ”Mbanogo nappu o,” yinuk, yoreegerak. Ndi, yogondak it inagabolo mbangga'lek kwe, Ala abet mbakwi paga, at Ala nen, ”Kit obeelom aret kiigi o,” yinuk, yorage nogo ti, inombo Abarakam aret o. 12Ndi, inagabolo mbanak ti kunduk inombo Abarakam aret. We inagabolo mbanak ti paga inombo lek o. Ata, at Abarakam nen agabolo mbangga'lek kagak iniki Ala oba panggombunuk abet mba'nuk logonet, eeke nagagerak nogo kwak, nit togon abet mbakwi niinok ti, ninombo Abarakam aret o.
Niniki abet mbarumonggoorak paga at Ala nen abok yoreegerak nogo koloorak wone
13At Ala nen, ”Kat Abarakam kombowologwe kinom yi awi ndi awi nggween unde arumunggup o,” yinuk, abok yoreegerak nogo ti, Ala nen Muta wone yoreegerak nogo wagangge nagagerak paga yoreegerak ti lek o. Ata, at Abarakam iniki Ala abet mbareegerak paga, ”Kat obeelom o,” yinuk, abok yoreegerak. 14Ala nen Abarakam abok yoreegerak wone nogo ti, it aakumi Muta wone lengganak nogo eeko logorak unde eeppiyanetak nen, it abet mbakwi paga unde aruwok mbakwi nogo ti, we aanom warogo aret mbako logonetak. Ndi, Ala nen abok yoreegerak nogo kunduk we aanom warogo aret yoreegerak mba'netak. 15Wone lengganak wonage ti paga nen, Ala anini ninoba pinanege kogo monggoorak kwe, wone lengganak ambi lek nen, ti we ugun aret logonetak o.
16It aakumi Muta yoreegerak wone waganggo menggaarak inom, ndi, at Abarakam iniki abet mbareegerak kokwak, it abet mbakwi inom, nit abok aret ninombo Abarakam aret me, Ala nen abok yoreegerak woorak ti, nit eekwi paga lek o. Ata, ”Abet mbakwi paga Ala iniki kunik logonet onggo lek we aret unde eeppinanege kagi,” mbaruwak nduk, yoreegerak. 17Ti yoreegerak nogo, ”Yi aakumi ndi aakumi abok inombo kat aret agago pagagi o,” yinuk, yoreegerak liiru mbanak wonage nogo kokwak, abok ninombo agagerak. Ndi, aakumi kanggaatak ineenik agago mippiige, yi mendek ndi mendek lek me warak agago pege, eeke menggerak at Abarakam abet mbareegerak Ala nogo nen yoreegerak kenok, abet aret yereegerak mbako ogoorik o. 18”Kat kombowologwe apit wigak yugun o,” yoreegerak nogo eeriyak meek tit kagak kwe, wone ti paga abet mba'nuk iniki mondok panggombereegerak me, yoreegerak liiru mbanak nogo ndak-ndak, aakumi apit aret inogoba agagerak. 19At Abarakam nen at eebe pekkolage logonet, ”An nda'nagagirak neegak, 100 tahun aret ariyak age me, abu kambuurak negen ee'nake, ndi, nakweeluk Tara nogo kunduk ndariyak meek aret age, eeke kagi,” yinuk, iniki yungguppegak eerulik abet aret mbareegerak me, 20abok wone yoreegerak nogo, ”Arigin ilik, lek kwa?” mbake logolik. Ata, iniki nen, ”Mondok abet aret eerigin kagi,” mbake logonet, Ala wogoppege nagagerak. 21”At Ala omaawi ambik me yo'negerak nogo ti, abet aret eerigin o,” mba'nuk, iniki mondok wone ti paga panggombunuk wonagagerak ti paga, 22at Ala nen, ”Kat obeelom aret keegi o,” yinuk, yoreegerak. 23”Kat obeelom aret keegi o,” yinuk, yoreegerak liiru mbanak wonage nogo ti, at alik obeelom eeppereegerak kenok mban yuulik o. 24Ata, nit abok ninake aret yereegerak o. Nit obeelom agago pinanuwak nduk, ninowe Yetut kanggo menggam nen eenik eerogo mippereegerak abet mba'nuk niniki at oba panggombugwi nogo abok ninake aret yereegerak. 25At Yetut kambeegerak nogo ti, nit Ala oone taganogo punuk, yiluk-maluk eekwi niinok, waruwak nduk punogo pege, ndi, nit obeelom eerogo pinanuwak nduk eenik eerogo mippege, eereegerak o.
Цяпер абрана:
OROMA 4: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце