WAYU 19
19
1Ti konengge nagarik, o mbogut paga time aakumi ambik alik negen komaarak inoone nggwok yogo logonet, ”Kat kalik komaawi ambik ninagap ndakak kendage mondok tiyanak, ninogoba Ala wa. 2Kwe yawukak nogo nen, Wu'nabi woraanip o, ari kenok, yi aap ndi aap nggween paga menggaarak abok aret wukkola unggwogo logonet, maluk eeko nogogwaarak onggo kwe nogo oba kwippege, ndi, kwe nogo nen kat kayeloman inooreegerak inane'me wake, ee'kendak me, kat kalik mondok obeelom irip-kunduk eeke logonet, liirogon owak loonogo maluk onggo wogogendak me, wa,” yinuk, 3yogo nagaarik, ambi yogo logonet, ”O koota nggwok kwe yawukak pogom nogo kani nengge logonet, ka'luk mondok-mondok lagangge logogin o,” yinuk, ne ambi, ”Wa,” yinuk, yogo mbaka, 4it mbogut paga wonogwe inoweewi ineebe 24 inom, aakumi nen iigulik mendek ineebe 4 nogo inom, at wone lengganogo yorage minggim Ala time kwi'ndak wonage kagak abu'me tebe yinuk, alut eeko logonet, ”Ninogoba wa, wa,” yinuk, ”Amin,” yogwi naruk konenggirak.
Ala andomba akwe lambumbogo logonet, abugo larak nonggo logorak wone
5Yogwi naruk konengge nagarik, wone lengganogo yorage minggim nen oone ambi ari logonet, ”Kit aap kinendage warak inom, kinendage lek inom, kit Ala ayeloman nen ayuk wuko monggotak nogo mendek abok aret ninogoba Ala mban alut eeko logonip o,” yinuk, ari mbaki, 6niyoraakut nggwok oone wo-wo ari, o ngguurubu alik negen ari, eeke minggi kwak, it yi aakumi ndi aakumi abok kuwak eerak inoone nggwok yogo logonet, ”At omaawi ambik ninogoba Ala nogo, yi o ndi o unde logowak nduk, mi'nagagerak wonage me, alut eeruwok o. 7At Ala andomba nogo akwe lambumbuurak nduk, akwe nogo amindik-amendek li'luk eekko'nok wage me, ale'nggen nen ndawi nggwok wako logonet, endage tiyappogo ogoorik o,” yinuk, 8inoone yogwe nogo naruk konembunuk wonage me, akwe nogo wage mbaki, ayum ambi kikak naka'lek abe laambu yanggwi negen lan aago yikkolaawak nduk, wogoge kagarak. Ndi, ayum abe yanggwi negen nogo ti, it abet mbakwi Ala apuri nen maluk eeka'lek obeelom mban eerit nugwi nogo kokwak aret kagarak.
9Kage nagarik, melaikat nogo nen ambinom an yo'nege logonet, ”Ala andomba akwe lambumbogo logonet, abugo larak kinom nabagip nduk, yonggo pinagareegerak nogo, kiniki ale'nggen mbako logonip o,” yinuk, ”Wone ti Ala nen abet aret yegerak me, liiru mbanu o,” yinuk, 10yo'nege mbaki, abu'me tebe yinuk, alut eerikit nduk eeke mbaki, ”Togop eeriyak mage o. At Yetut wage nagagirik, Ala ndogop menggerak o, yinuk, paganogo yoragagerak wone koreewi waganggo nogogwaarik, porogo wonogwe nogo inom, kat inom, an kit pogom Ala ayeloman aret me, Ala abu'me tebe yinuk, at mban alut eeke logot o. At Yetut nen paganogo yorage nagagerak wone nogo ti, nit abok Aberiniki nen yo'nirage kagak yorogo monggoorak me nduk, yokkigi o,” yinuk, yo'nege kagarak.
Aap ambi kunda yanggwi negen amborowak paga kwi'ndak wage kagagerak wone
11Ti'nuk, mbogut paga tuungga paa'nage mbaki, kunda yanggwi negen aap ambi endage Abet Mban Ari Logonet, Liirogon Eeke Menggerak nogo, amborowak paga kwi'ndak logonet, liirogon inowak loonogo onggo ndak-ndak wogorage, wim liirogon nambuke, eerit nage kagarak. 12At enegen ti, kani omoonuk wunuk ari pogom. Ndi, anobak paga nggare-nggare mendaarak makoota apit yirik, ndi, at endage toonak eebe paga liiru mbanak wonage nogo aakumi nen maleniyak meek at mban eenu wonagaarak kwe, 13”At endage ti, Ala Wone aret o,” yinuk, yo'nege kagarak. Ndi, ambogoyum nggorek paga aakumi inamiya labunik yikko'nok nage kagak, 14it yigin unde mbogut paga wonogwe nogo abok aret inayum kikak naka'lek abe yanggwi negen yirik logonet, inalitik-inalitak kunda ineeruwak yanggwi negen inamborowak paga kwi'na'nuk, inom nogwe iigirak.
15Inom nogo logonet, at yi aakumi ndi aakumi inanebunu lombok abok aret tebenogo piyoorak nduk, paloowi ambeme nggelenak wonok nage logonet, tebenogo piinok, oone omaawi paga ndegeninake kagarak. Ndegeninake logonet, anggur amburu aambiranggo menggaarak nogo pogom at mondok omaawi ambik menggerak Ala nogo anini nen aakumi togop aret aambiranogo piinet nage kagarak. 16Ndi, at endage ambi, Aakumi Inoweewi Inarum Menggerak Inogoba inom, Yi Aap Ndi Aap Inendage Warak Inowe Endagembogut inom, nogo yi aret o, yinuk ambogoyum paga inom, ambulok paga inom, liiru mbanak wonage kagarak.
17-18Yo'nege kage nagarik, at melaikat ambi oonegen paga mi'ndak logonet, yi towe ndi towe o oolo yime wuga agan nugu menggaarak nogo yorage logonet, ”It aap inendagembogut inom, wim wone mbangga inom, aap waka'ngget inom, wam kunda inom, it kunda amborowak paga kwi'na'nuk wim namburi nogo menggaarak inom, aap inendage warak inendage lek inom, aakumi inayeloman inom, aakumi wee'lek mendek inom, yi aakumi ndi aakumi abok aret Ala nen kinake inoorogo pereegerak me, Inenggaanggum na woraanip o,” yinuk, yorage kagarak o.
19Yorage kage nagarik, nggeewo anini warak nogo inom, yi aap ndi aap inendagembogut inawuri inom, nen at kunda amborowak paga kwi'ndak wonage nogo awuri inom wim namburuwok nduk, kuwak eeppunuk, inom perenggolaawak nduk eekwi iigak, 20at nggeewo anini warak aa'nduk lagi wagaarak nogo inom, ndi, it aakumi inenggaawak paga nggeewo aa'nduk lagi wagaarak nogo endage liiru mbanak wonok nugwi, at ogut eerak nogo alut eekwi, eeruwak nduk, awone kilirik paga inagabiti warak mendek eerit nage logonet, inambokan lagangge logonet, pilit pugunogo yorage menggerak nggeewo peebi lagi wagaarak eebe nogo inom, imbirak ineenik ngge-ngge pigogo kani omoonuk wunuk mban ari minggim nogome nappiige kagarak. 21Ndi, nappiige kage nagarik, inawuri ando nogo at kunda amborowak paga kwi'ndak paloowi ambeme nggelenak nogo paga nen inoorogo piinet nage mbaki, yi towe ndi towe abok wogo nagaarik, aakumi inoorak nogo inenggaanggum inaanoma'le nggaruk yogorak nonggo nagarik, kumunuk ndan agan nogwe iigirak.
Цяпер абрана:
WAYU 19: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце