WAYU 16
16
Ala anini togolowa'na toolak wonage kagagerak wone
1Ti eeke kage nagarik, Ala awi wurik me nen oone nggwok ambi it melaikat ineebe 7 nogo yorage logonet, ”Ala anini togolowak 7 paga toolak ti, wonok, aakumi nggween paga wonogwe ti, inoba kilirogo piya nanip o,” yinuk, yorage kagarak.
2Yorage kage nagarik, at melaikat ambi nen, Ala anini toolak ambi wonok nggween paga kilirogo wuppege mbaki, it aakumi nggeewo endage inenggaawak paga liiru mbanak wonogwe nogo inom, at ogut wakkagak ogobakkigirik alut eeko menggaarak nogo inom, abok aret inawin maaluget inoba nik ari mbaki, aakumi nen ogole ambik yogwe iigirak.
3Ti eekwi iige nagarik, melaikat ore ambi nen, Ala anini toolak nogo niyo nggwok yenggenak nogo paga kilirogo wuppegerak. Kilirogo wuppege mbaki, niyo nogo aakumi inookaatak inamiya negen age logonet, niyo inikime nugu menggaarak nogo mendek abok aret kambit nogwe iigirak.
4Melaikat mbere nogo nen toolak nogo abu kilirogo wuppogo mbaka, ambi nen Ala anini toolak nogo wonok niyo iyo'nggok nage paga inom, mbuulogwe eneerime inom, kilirogo wuppege mbaki, niyo ti abok aret aakumi inamiya pogom age mbaki, 5at melaikat niyo eneeri unde menggerak nogo nen ari logonet, ”Yogondak inom, maan inom, kat nogoba Ala maluk eekeelik mondok kitok obeelom mban logonet, a'me nggelok eeke menggendak me, it maluk eekaarak onggo kanini inoba piige yi op aret eeke keegi o. 6It abet kombareegwaarak kapuri inom, kat koone yoranet nugu menggaarak nabi-nabi mendek inom, inamiya wunogo inooreegwaarak nogo, onggo aakumi inamiya yi niyo negen nonggo logowak nduk, eeppiigendak me, op aret eeken o,” yinuk, yoge mbaki, 7Ala aanggo warogo kani kunggo menggam nogome nen oone ari logonet, ”Abet aret yigi o. Kat ninogoba Ala komaawi ambik logonet, aakumi eekwi onggo mondok obeelom a'me nggelok mban eeke menggendak me, abet aret yigi o,” yinuk, ari naruk konenggirak.
8Melaikat ineebe 3 nogo nen Ala anini toolak nogo kilirogo wuppogo mbaka, ambi nen Ala anini toolak ambi oonegen paga kilirogo nappegerak. Nappege mbaki, oonegen nogo aganggen ambik age logonet, mo andi nen aakumi yaganinabit nage kenok, 9”Ala nen unde logonet andi-pandi yogobi eeppinanege me, ninomaluk mbo punuk, endage tiyappogo logowok o,” yinuk, yuurak op aret kwe, kagak, inomaluk iniki kundugu patogo logonet, Ala endage miyuk-meya eerogo pit nogwe iigirak.
10-11Ndi, it melaikat ineebe 4 nogo nen Ala anini toolak nogo aakumi inoba kilirogo wuppogo mbaka, ambi nen Ala anini toolak ambi nggeewo wone lengganogo yorage minggim nogome kilirogo wuppege kagarak. Wuppege kage nagarik, nggeewo nogo wone lengganogo yorage minggim time o apit age mbaki, at abu'me logonet, oone waganggo menggaarak nogo, kugi andi aganake, inawin maaluget inoba nik ari, eeginakerak nogo, andi nen ineyak nggilik maako logonet, ”Ninomaluk mbo puwi o,” yinuk, mbo puurak op aret kwe, kagak, inomaluk iniki kundugu patogo logonet, Ala endage miyuk-meya eerogo pugwi iigirak.
12It melaikat ineebe 5 nogo nen togolowak inalitak lombok kilirogo wuppogo mbaka, ambi nen Ala anini toolak ambi niyo nggwok endage Eparat nogo paga kilirogo wuppegerak. Wuppege mbaki, niyo nogo porok yegerak. Niyo porok yegerak nogo ti, it aap inendage-mbogut oonegen wundi wage minggim nen woraawak nduk, inaru koonogo piige kagarak. 13Kage nagarik, waalo nggwok tinambe pogom nogo ambeme inom, nggeewo anini warak niyome nen wundi wagaarak nogo ambeme inom, ndi, aap pilit wone pugunogo yorage menggerak nogo ambeme inom, time nen yubut ogolem pogom kugi maluk lombok ineebe kenagan wundi wogwe iigirak. 14It inambeme nen wundi wagaarak nogo ti, kugi Tile apuri aret me, Ala nen yi aakumi ndi aakumi inenggali wariyak eyom nogo paga it yi aap ndi aap inendagembogut o nggween paga menggaarak abok aret at omaawi ambik menggerak Ala nogo inom wim namburiyak kuwak eeruwak nduk, it ogolem pogom nogo nen yonggo nogo logonet, aakumi abet mbaruwak nduk, eerubok mendek eerit nogwe iigirak.
15Ti'nuk, at oone yo'nege menggerak nogo nen, ambinom yo'nege logonet, ”An aap yogoot wagangga pogom abera'lek me woraagin me, aakumi inenggaanom nggwok paga kinagap mbelenak nogwe kiinok, kinenggali ogwe kiyo, liippogo logonip o. An wage neenok, kiniki ale'nggen mbarubagip nduk, kinayum abu ndigik-ndegek eerogo patinuk, kinaket paga logonet, tum wakkologo logonip o,” yinuk, yo'nege kagarak.
16Ndi, it kugi yubut ogolem pogom nogo nen aap nggween paga inendagembogut abok aret o endage Iberani inoone paga Aramageron nogome kuwak eeppiigwi iigirak.
17Melaikat ineebe 6 nogo nen Ala anini toolak nogo abu kilirogo wuppogo mbaka, ambi nen Ala anini toolak ambi o oolo ya'i kilirogo wuppege mbaki, Ala wone lengganogo yorage minggim Ala awi wurik me nen oone nggwok ambi ari logonet, ”Abu age yobok togon aret eeki o,” yinuk, ari mbaki, 18o yabok mondok kunik-kunik eeke, o ngguurubu ari, ndi, maan aakumi wakkagagerak kuli nen, nok, yogondak kuli paga togop eekeelik kwe, o mi mondok alik negen nuk eerit wage logonet, nggween mondok abut laganak-mbaganak eeke, eeke kagarak. 19Ti eeke logonet, o koota nggwok nogo nggween mondok nggoguk ari logonet, kenaga'ndak mogonnage, ndi, yi awi ndi awi nggween paga koota-koota nogo abok aret yigirit-noonom arit nage, eeke kagak, at Ala nen, ”O koota nggwok Mbaben nogo perak, it maluk eekwi onggo an nanini lombok inombake minggirak toolak nogo, yogondak aret inoba kilirogo wuppiigi o,” yinuk, kilirogo wuppiige kagarak. 20Wuppiige kagak, niyo nggwok yenggenak nggween oolo kup mbanak inom, puut-puut inom, abok aret eenggi-iyok lek, lek age kagak, 21o mayu kumuli'nggen iyo'nggok lombok aaninggin wakkage logonet, 50 kilogram negen mbogut paga nen aakumi inoba wuppit wage mbaki, mondok iya tit kambit nogo logonet, ”Ala anini nen mayu kumuli'nggen paga ninooke yi, eebe waruwok lak ao,” yinuk, inanini agaket yogo logonet, ya-mba yogwi iigirak o.
Цяпер абрана:
WAYU 16: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце