YAKOBUT 2
2
Kit aap inetenggen paga mban liippiyaagup o, yoragagerak wone
1Nowe-nawot o. Kit kiniki ninowe endagembogut Yetut Keritut abu tiyanak menggerak nogo oba panggombunuk abet mba'nuk eerit nogo logonet, aakumi inetenggen liippiinok, ambi obeelom eeppiigwi, ndi, ambi maluk eeppiigwi, eeko logogup o. 2Aap ambi mbuti emas mberaarenggen inom, yum abu kigirikwe inom, yippunuk, kit tamban eeko monggo'nom unggwi wage, ndi, aap ambi eenggi lek yum maluk yirik unggwi wage, eekwi iinok, 3aap yum abe kigirikwe yirik nogo ayuk wuppunuk, yogo logonet, ”Nogoba o. Kwi'nogo menggam abe paga ya'i kwi'nari mok o,” yogwi, ndi, aap eenggi lek nogo ayuk wuka'lek logonet, ”We taati mi'ndak logot a, ilin me nggween paga time kwi'naru a,” yogwi, eekwi kiinok, 4kit kiniki nen aap ambi maluk, ambi abe, mba'nuk, yorogo monggotak nogo lek a? Ndi, inetenggen liippiinok, eeppiigwi me, aap wone owak loongga nen eeko mengga kwak eeko logonet, maluk aret koonggo monggotak nogo lek a?
5Nowe-nawot o. Kit an niniki kunik me, wone yi liirogon konenggo logonip o. It aap ineenggi lek mbakwi iigak Ala nen miirinabeegerak nogo ti, ineenggi warak kwak, iniki mondok abet aret mbakwi, ndi, aap abok aret, ”Nogoba ao,” yinuk, ”Iniki kunik ee'nakwi iinok, nabu'me piyaagin o,” yinuk, abok yoragagerak nogo, Ala abu'me piige minggim ineyate kokwak unde eeppiige, eeruwak nduk, miirinabeegerak nogo lek a? 6Ala nen it aret miirinabeegerak kagak, kit nen aap ineenggi lek kenok, meek eerogo piigo monggotak. Piyak-payak eekkinako logonet, niikkiren wone owak loonggo menggam pinagi nogwe nogo ti, aap ineenggi warak nen eekkinakwi nogo lek a? 7Ndi, kit at anebunu mendek ogogutak endage tiyanak menggerak nogo miyuk-meya eerogo pugwi ti, it aap ineenggi warak nen eekwi nogo lek a?
8Ala wone mbanak ndak-ndak eeko logonet, ”Kit kineebe kiniki kunik eekkologo monggotak pogom, kinom monggotak togop aret kiniki kunik aganako logonip o,” yinuk, ninogoba endagembogut nen wone lengganogo yo'niragagerak nogo eekwi kiinok ti, op aret eekwi kwe, 9aakumi inetenggen paga liippiinok eeppiigwi kenok perak, maluk eekwi aret o. Ti eekwi paga wone lengganak taganogo pugwi me, Ala nen, ”Kit maluk eekwi o,” yinuk, yokkiraagin o. 10Kit Ala nen wone lengganogo yo'niragagerak nogo abok aret eeko logonet kwe, ambit iluk ambi eeka'lek kiinok perak, wone ti abok aret eeka'lek me, maluk aret eekwi o. 11At Ala nen, ”Kwe kundugume wuriyak mage o,” ari logonet, ”Aap wariyak mage o,” inom yereegerak me, kit ambi kwe wuka'lek logonet, aap wakwi kiinok perak, Ala wone yugu taganogo pugwi me, maluk eekwi aret o. 12It aakumi nen, ”Ala nen wone lengganogo yo'niragagerak paga pilanogo wondet agago pinanege menggerak wone nogo ti paga ninowak loonigin o,” yinuk, abeko logonet, inoone yogwe, eerit nugwi, eeko mengga kwak, eeko logonip o. 13Kit kinoreewi inabuwa nen obeelom eeppiiga'lek kiinok, Ala nen kinowak loongge logonet, kinabuwa nen obeelom eeppinagagin lek o. Ndi, kinoreewi inabuwa nen obeelom eeppiigwi kiinok perak, kinowak looniyak nogo kinagabiti lek aret logomunggup o.
Abet mbakwi kwe, eebe inom eeka'lek kenok yoragagerak wone
14Nowe-nawot o. Kit nen, ”An niniki abet mbake o,” yogwe kwe, eebe eeka'lek kiinok, nano eekkoloorak nduk yogwe mbakop? Ala wone eebe eeka'lek logonet, we abet mbakwi paga mban Ala nen kinagap ndarigin mbakop? 15Kiniriluk ambi ilik, kinoreeluk ambi a, ayum inom, ko'lu-kii'me nunggwi mendek inom, wonage lek kagak, 16kit ambi nen, eebe op logorak nduk wogoga'lek logonet, ”Kambi ndonggorogon nengge, kayum kigirikwe yikkolage, ee'nuk, kiniki ale'nggen paga nage logot o,” yinuk, yogwi kiinok, ti paga ambi op eekkoloorak nduk yogotak mbakop? 17Nit niniki abet mbakwi nogo ndak-ndak eebe inom eeka'lek logonet, abet mban mbakwi kenok, nit ambi eeppinaniyak lek me, we aanom warogo abet mbakwi kogo o.
18Togop aret kwe, kit ambi nen, ”Kat abet mban mbake kwe, an perak, eebe inom aret eeke o,” yinuk, yogwe kiigirak me, wologo wae. Kit abet mbakwi nogo, eebe inom eeka'lek kiinok, ”Yi aap abet mbaka'lek aret,” kinombakwi kwe, an perak, abet mba'nuk eebe inom aret eeke me, ”Yi aap abet mbake aret,” nombakwi, yi kogo ogotik? 19Kit nen, ”Ala ti, alik aret menggerak abet mbakwi,” yinuk, mbakwi ti op aret kwe, it kugi kunduk wone ti togop aret abet mba'nuk, inagabiti nen inaganak nuguranet nugu menggerak kwe, kit perak abet mba'nuk puk mban wonogwe kiigi. 20Nowe-nawot o. Kit wi negen agan nugwi kiigi o. Eebe eeka'lek kagak abet mban mba'nuk, puk wonogwe kiinok ti, ”Yi aanom warogo aret abet mbakwi o,” yinuk, mbaka'lek ogotik ya? 21Nit ninogoba Abarakam nogo nen Ala aanggo warogo kani kunggo menggam ogobakkigirogo punuk, at aput Itak Ala ake pereegerak nogo paga at Ala nen, ”Yi aap abe o,” yinuk, obeelom agago pereegerak nogo lek a? 22Ala abet mbake logonet, eebe inom eeke mbareegi, obeelom agago pereegerak kogo o. Ndi, eebe aret eereegerak paga at iniki abet mbareegerak nogo yobok yulik, mondok endak aret agagerak o. 23Ti eereegerak paga, ”Aap Abarakam nen Ala abet mba'nuk iniki at oba panggombereegerak paga, Ala nen obeelom agago pereegerak o,” yinuk, Ala wone liiru mbanak nogo a'me lik ari mbareegi, at Ala nen, ”Aap Abarakam nogo ti, an nore aret o,” yinuk, yereegerak. 24Ti kenok, niniki abet mba'nuk eekwi kwe, eebe inom eeka'lek kagak, Ala nen obeelom agago pinanigin lek o. Ata, abet mba'nuk, eebe inom eekwi paga eeppinanege menggerak kogo o.
25Ti eereegerak ndak-ndak kwe terak wuka Arakap nogo nen, it aap Yakuri mendek o pekkoorak nduk wogogwaarak nogo, inookwi iyo kumaappiinok, tu alik paga nomonogo nappiyareegerak nogo paga, Ala nen, ”Kwe yi abe o,” yinuk, obeelom agago pereegerak nogo lek a? 26Ninagabolo wonage kagak, niniki nggigik togon nage kenok, ”Aap ti kanggerak o,” yogo monggoorak nogo ndak-ndak, niniki abet mbakwi kwe, wone ti eebe inom eeka'lek kenok ti, aanom warogo abet mbareegurak aret mbaruwok o.
Цяпер абрана:
YAKOBUT 2: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце