NAPPIYAREEGERAK 20
20
Pawulut o Makeroniya inom, Yunani inom nagagerak wone
1Wone naalop-kaalop yogo nogogwaarak nogo lek age mbareegi, at Pawulut nen at Yetut wone waganggwi nogo woraawak nduk, inayonggo piyareegerak wogo mbareegwa, iniki eyak wappiige nagagirik, ”An o Makeroniya na o,” yoraanok, nagagerak. 2Nage nagagirik, o yi awi ndi awi time yanggwagak nage logonet, iniki eyak wappiinet nage nagagirik, o Yunani aret nagagerak. 3Time wonage kagak, tut kenagan penengge mbareegi, ti'nuk, peebi nen, o Tiriya wunda woraakit nduk eeke mbareegi, it Yakuri nen wariyak koonggo mbareegwa, Niyok paga tu o Makeroniya paga naakit, mbareegerak. 4At inom wogogwaarak nogo, at Pirut aput Topatet awi Mbereya mendek inom, ndi, o Tetalonika nen Aritarukut Tekundut imbirak inom, at Nggayut Nderebe mendek inom, Timotiyut inom, it Atiya mendek Tikikut Teropimut imbirak inom, at inom aret wogogwaarak. 5It ti inaa'nduk o Torowat to'niigwi a wogogwaarak. 6Ndi, nit nogo roti mbi piika'lek larak nenok, o Pilipi nen yiiro paga unggunuk wogo logonet, nogo 5 aret yegak, o Torowat unggwi wogogurak. O Torowat unggwi wogo nogogurik, time nogo 7 yereegurak.
At Pawulut o Torowat mendek yoragagerak wone
7Ko'lu hari minggu tamban eekwi paga mbi kareruwok nduk kuwak eereegurak me, at Pawulut ko'lu naakit nduk eeke logonet, oonikiya nen wone yorage kagak, nogo iniki agagerak. 8Ndi, nit kuwak eereegum o nogo amik mban-mban kenagan wurik me nogome, ndi ambik wunumbunuk abinak paga Pawulut yorage kagak, 9wulaga Eyutikut jendela i amik mbanak paga kwi'ndak wonage me, nogo wulamo'ndi ari logonet, uu'ngguluk wambeegerak. 10Uu'ngguluk wangge mbareegi, kanggerak nduk waganeegwaarak mendek, at Pawulut nogo wambi nage nagagirik, amborowak tebe yinuk, piyanogo ogome wagangge nagagirik, ”Kiniki piirik yugup o. Eebe eenik wonage o,” yoragagerak. 11Yoraanuk, lagi nage nagagirik, roti mbi karerogo nenok, at inom wone mbanggwi iigak, o wikit nduk kilim nagake kagak, o ambime naakit nduk, 12nage kagak, at wulaga nogo eenik aret wonok nogo nogogwaarik, iniki ale'nggen ambik ogogwaarak.
O Torowat nen Miletut wogogurak wone
13Ndi, at Pawulut nen, ”Nggween paga tu o Atot naakit,” mba'nuk, ”Kit kinaa'nduk o Atot time o nanip o. An peebi kiya woraagin o,” yo'nirage mbareegi, nit yiiro paga Atot ninaa'nduk wogogurak. 14At o Atot time ninom lambunggo nogogurik, yiiro paga ninom o Metilene wogogurak. 15Time nen wogo nogogurik, ko'lu yi yenggenak kup mbanak o Kiyot ndak-ndak ari wogo nogogurik, ndi, ko'lukwak o Tamot ari wogogurak. Obaganggwe nen o Miletut ari wogogurak. 16Ndi, at Pawulut nen, ”Laago Pendakota o Yerutalem neegak, lariyak,” mbareegerak me, ”O Atiya mban elambirik neegak panggo ari kero, o Epetut unggwaga'lek nok-nok naakit,” kooneegerak.
At Pawulut it Ala apuri o Epetut inarum menggaarak piinok naakit nduk, inaruk wareegerak wone
17O Miletut unggwi wogo nogogurik, time nen at Pawulut nogo it Ala apuri inarum menggaarak woraawak nduk, o Epetut inayonggo nappereegerak 18at owagam wogo mbareegwa, yorage logonet, ”An aa'nduk lombok o Atiya yime kiya wage nagagirik, ninom logonet wonagagirak, kineenu nogo o. 19Nogoba ayeloman a'nuk, niniki tebe yinuk, kinale ari logonet, yeenggwagirage nagagirak kwe, it Yakuri nen an nooruwok nduk koombunuk logonet, aaninggin agago noba pogo nogogwaarak kineenu nogo o. 20An wone obeelom eekkinaburak wone nogo, ando kiraarogo teppake, ando yokkirage, eeke logolik o. Nggwok paga inom, kiname lombok inom, mamunggiranet nege nagagirak kineenu nogo. 21Mamunggirage nagagirak nogo ti, kit Yakuri mendek inom, kit Yunani mendek inom, Ala apuri arubagip nduk, kit maluk eeko monggotak kiniki koombunuk mbo pugwi, kiniki ninogoba Yetut Keritut oba panggombunuk abet mbakwi, eerubagip nduk, liirogon yokkirage nagagirak kwe, 22yogondak perak, Aberiniki nen nimin-namoorak ari kenok, o Yerutalem nen ee'naburak neenggo'lek kagak kwe, aret nagin o. 23Ne ambi paga o ambi me yoragak, ne ambi paga o ambi me yoragak, eerit nege me, Aberiniki nen, Keele maakkakwi, aanigin-paanigin koba pagagwi, eerugun o yinuk, paganogo yo'nege menggerak. 24An neebe neenik logorak iya lek o. Ata, Ala ninabuwa nen we wo'nirage menggerak wone yorage logowak nduk, Yetut nen yabu unde paneegerak nogo mbo pega'lek worok togon eeriyak ti perak, iya o.
25Ndi, yogondak perak, an nogo Ala abu'me pinagarak wone yokkiranet nege yogop yi, peebi ambi yokkiranet wage kinigen neyaamunggup lek ti, an neenu o. 26-27An Ala iniki koonogo pereegerak wone nogo ando teppulik, abok aret yokkirage nagagirak me, kit ambi lek eerogo pinagarak kenok, an nobalombok lek o. Kit kinobalombok eekkolaamonggotak paga aret lek eerogo pinagagin o, yinuk, o yogondak yi paga abet aret yokkirage agarik o. 28At ninogoba Yetut amiya paga at apuri inonggo mbaninabeegerak nogo ti at aanggumi ndomba kwak aret me, inarum logobagip nduk, Aberiniki nen mippinagagerak me, kit kiniki tum wakkologo logonet, it inom inarum liirogon logonip o. 29An lambembinaganuk nage neegak, nggeewo endekem mendek anini warak kinenggela'me unggwi wogo logomenggaarik, teppinagagun lek nibingginaburak ti an neenu aret o. 30Kit mendek kinenggela'me nen aret mi'na'nuk, kit Yetut wone waganggwi kiniki nomongginabuwok nduk, obeelom wone nogo abut laganogo yokkirogo logogun o. 31Togop me, o lagangge-wangge eeke kagak, 3 tahun paga, liingge nen, oonikya nen, puk aga'lek kinale ari logonet, kinalitak lombok kinaruk wake nagagirak nogo, beko logonet kinaket paga logonip o.
32Ndi, yogondak perak, at Ala kinabuwa nen obeelom eeppinagarak wone ti paga, kiniki kole agago at apuri ake leenak kenok, inake punogo piyareegerak nogo kinom unde arubagip nduk, Ala abu'me pinagagi o. 33Kit kinawu inom, kinambogoyum inom, an uugwe mbake logolik o. 34An nake inom, it ninom nege nagagirak inake inom, ti an neenggi omaawi paga nen mban agago kologo nogogurak kineenu nogo o. 35At ninogoba Yetut nen ari logonet, Kologwe ti meek o. Ndi, wogorogwe ti perak, ale'nggen ambik o, yereegerak nogo, abeko logonet, an eeke nagagirak nogo ti, kit nen it aakumi lebenak mendek togop eeginako logobagip nduk, kineenu eeppinagareegirak o,” yoragagerak.
36Wone togop yorage nagagirik, endobanggun yindumbunuk, it abok inom aret tamban eereegwaarak. 37Tamban eeppogo nogogwaarik, at Pawulut eebe panggeppunuk, ale yogwe, keyage wakwi, eereegwaarak. 38At Pawulut nen, ”An peebi neyaamunggup lek o,” yoragagerak ti paga iniki abu maluk ogo nogogwaarik, ale yogwe, keyage wakwi, eeppogo nogogwaarik, wonok yiiro yi aa'nggi paga wonage me ta'nogo pi nogogwaarak.
Цяпер абрана:
NAPPIYAREEGERAK 20: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце