2 YAYA 1
1
YAYA NEN LIIRU AMBI MBANGGE NAGAGIRIK, AMBO'ME
MBANEEGERAK WONE
1Ala nen miikkabeegerak niriluk kat kaagalogwe kinom, an Ala apuri inarum logowak nduk, mippaneegerak nogo nen, kit abet aret niniki kunik eekkinake minggirak me, wone ambi yokkira o. An nen mban niniki kunik eekkinake ti lek o. Ata, it aakumi Ala ari menggerak wone waganeegwaarak nogo abok ninom nen niniki kunik eekkinako o. 2Ala ari menggerak wone ninikime wonage nogo ti, mondok-mondok logogin aret me, 3at ninogoba Ala aput Yetut Keritut imbirak iniki kunik nen wo'nirogwe, ninabuwa nen obeelom eeppinanugwi, niniki ugun obeelom logowok nduk, eeppinanugwi, eeko menggaarak ndak-ndak, kit togon Ala ari menggerak wone mugurok nogo logonet, kinoreewi kinom kiniki kunik aret logonip o.
Keritut nen mamunniragagerak nogo mondok-mondok eeko logorak wone
4At ninogoba nen, ”Yogop ee'nip o,” yo'niragagerak nogo kat kaagalogwe kinom ndak-ndak eerit nogwe konengge nagarik, an niniki abu ale'nggen mbakirak o. 5Ndi, niriluk o. Yogondak ambi eeke logonok nduk, yokkiri. ”Niniki-kiniki kunik eeko logonip o,” yinuk, yokkege nogo ti, wone ngget mendek lek o. O maan aa'nduk togon konenggo nogogutak nogo aret yokkigi o. 6Niniki-kiniki kunik eeko logorak nogo ti, ngge eeko logorak mbakop? Lek o. Ti Ala wone yugu ndak-ndak eeko logorak o. Wone ti, maan aa'nduk togon yo'niragagerak koneneegutak nogo aret yokkiragi o.
7It aap ando nen, ”Yetut Keritut ti, aap kwak nggween paga yime nda'narulik o,” yinuk, aakumi inambo'me laganiyak nduk yoranet nogo menggaarak mendek yi o ndi o apit aret wonogwe o. It aap ti, Pilit Keritut negen logonet, pilit-pilit aret aakumi inambo'me laganggo menggaarak me, 8nit nen yokkirogogurak waganeegutak nogo, kobak agago mbo pugwi kiinok, obeelom eekwi paga Ala nen onggo nggwok wokkiroorak mbareegerak nogo, lek eerogo patukwak, kiniki liirogon tum wakkologo logonip o.
9Aap ambi Keritut wone mamunniragagerak nogo mban ari lek at iniki koombunuk, alik inom nabenogo yorage kenok, at Ala imbirak iniki kunik logonet ari lek o. Ndi, Keritut wone mamunniragagerak nogo ndak-ndak eeke kenok perak, ninogoba Ala aput imbirak iniki kunik aret logonet ari mbaruwok o. 10Aap ambi wone yi mendek lek alik mendek wonok kinowagam wage kenok, keyage warogo kiname mambuurak mage o. 11Keyage warogo kiname mambugwi kenok, at omaluk kit kinom ndak-ndak aret nabenggoloorak me, keyage warogo kiname mambugup o.
Irip paga keyage wappiyareegerak wone
12An wone ambik yokkiroorak nduk wonage kwe, mbuku paga liiru mbanggiroorak anggon ee'nake me, kiya wage logominggirik, ninom lambunik logonet, ninale'nggen paga wone li'lak aret mbaniyak uugwe mbake agarik o.
13Koweeluk Ala miireegerak aagalogwe nogo ninom nen keyage wakkinako o. Wa!
Цяпер абрана:
2 YAYA 1: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце