1 PETERUT 5
5
Ala andomba inarum logorak wone
1Ti kenok, nowe-nawot o. An kinowe Ala apuri inarum minggirak nogo kokwak, kit togon Ala apuri inenggela'me logonet inarum monggotak me, wone ambi yokkira o. At Keritut aaninggin-paaninggin eerogo oba pogo nogogwaarak nogo, an nenegen kagagirak me, peebi at pi wakwi iigak, woroorak eyom paga, ”An togon tiyappani woraagin,” mbake logonet, ”Wone eebe yokkiraakit,” mbakirak nogo liirogon konenggo logobagip nduk, yokkira o. 2Kit Ala apuri inarum logobagip nduk, mippinagareegerak nogo, ”Nineebi,” mbako logonet, inarum logorak ti mage o. Ata, Ala iniki mbake ndak-ndak, ”Eeke logokit,” mbako logonet, inarum logonip o. Ndi, onggo koloorak paga mban kiniki luunik logonet, yoroorak ti mage mban. Ata, we kiniki ale'nggen paga aret inarum liirogon logonip o. 3Ti inarum logonet, kit nen, ”An noone mban konenggo logonip o,” yinuk, kinoone omaawi paga yorogwe ti mage o. Ata, it Ala andomba nogo nen kit kinobaabut obeelom mban eerit nogwe nogo liippinaga'nuk, ”At eeke ndak-ndak an eeke logokit,” mbaruwak nduk eeko logonip. 4Togop eekwi kiinok, kit ndomba unde monggotak kinowe nagawan nogo peebi wage logonet, ”Kit abu obeelom eeko nogotak o,” yinuk, kinenggare-nggare mendaarak kiik ariyak lek mondok laambu logorak mendek yirippinagi woraagin o.
5Kit aap tawe nogo nen eeriyak wone ambi yokkira o. Kinogobamini nen inoone yokkirogwe iinok, kinaruk liirogon konembunuk aret eeko logonip. At Ala nen ari logonet,
”It aakumi iniki wogoppako menggaarak kenok,
An nen tebenogo piige minggirak kwe, ndi,
iniki tebenak kenok perak,
niniki kunik nen eeppiige minggirak o,”
yinuk, yereegerak Ala wone liiru mbanak wonage me, kit abok aret kiniki tebenak logonet, yeenggwa-yeenggwa eeko logonip o. 6At Ala nen, ”Ne tiyom paga tiyappiyaakit o,” yiinuk, kooneegerak nogo a'me lik ari wage kenok, tiyappinagawak nduk, Ala omaawi ambik menggerak nogo abu'me tebe yinuk logonip o. 7At Ala nen kinabuwa mbake menggerak me, kiniki piirik-paarik eekwi nogo abok aret paganogo at oba mban pogo logonip o.
8Kit kinom ogoorak Ibilit nogo nen maluk eekkinaburak nduk nggeewo anini warak pogom nibingginabikit nduk, eyak nde agan kwaakkinabit nege me, kit mondok kiniki warak a'nuk, kinaket paga logonet, pipak tum wakkologo logonip o. 9Ndi, it kinoreewi yi awi ndi awi menggaarak kinom kiniki abet mbakwi nogo aaninggin-paaninggin kit eeppinagagwi ndak-ndak, it togon togop aret eeppiigwi nogo kineenu aret me, kit kiniki abet mba'nuk, kinogogumbuk mondok nu'lek logonet, Ibilit nen kiniki nggaganit wage kero, mugogo nappogo logonip o. 10At iniki kunik nen wo'nirage menggerak alom unde ninogoba Ala nogo nen, Keritut ninom kunik wonogwe paga at tiyanak minggim nogome ninom ndak-ndak mondok-mondok tiyanak logorak nduk ninayonggo pereegerak me, ne ambi aaninggin-paaninggin kinoba pinagagwi iinok, ninogoba Ala nen kinobaabut koonogo pinagage, kiniki nu'lek eerogo pinagage, kinomaawi agago pinagage, eeke logogin me, kiniki kwi'ndak logonet, waganggo logonip o. 11”Ninogoba Ala omaawi ambik me, itok mondok-mondok menggerak o,” yinuk, amin!
Irip paga keyage wappiyareegerak wone
12Wone yokkirage ti abok aret at Ala iniki kunik nen obeelom eeppinanege menggerak nogo, an ndak-ndak eeppanege kagak paganogo yokkirage me, ”Yi abet eeppinagage menggerak o,” yinuk, kiniki eyak wappinagawak nduk, ninore Tilat iniki mondok koonak li'lak mban eeke menggerak nogo nen yeenggwanege kagak, liiru yi we nggaruk togon mbanggirage kwe, wone yi ti mondok iya me, porogo logonip o.
13It kinoreewi Ala apuri o Mbabilon mendek Ala nen leenogo piyareegerak nogo nen keyage wappinagagwi, ndi, an naput Marakut nogo kunduk keyage wappinagage, eeka o.
14Kit-kit aret kiniki kunik paga keyage wat-wat yogo logonet, linggik-kambuk yogo logonip o. Ndi, kit Keritut kinom kunik wonogwe nogo abok aret kiniki ugun obeelom logobagip nduk, eeppinagage logogin. An kinowe Peterut nen abu aret yokkiragi o, nowe-nawot wa!
Цяпер абрана:
1 PETERUT 5: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце