1 PETERUT 3
3
It aap inakuwi inom logonet, eeko logorak wone
1-2”Kit aakumi inayeloman nen kinogobamini inoone liirogon konenggo logonip o,” yinuk, yokkiragarak nogo ndak-ndak, kit kumi kunduk kinogonggelomini inabu'me logonet, inoone liirogon konenggo logonip o. Kit kinogonggelomini ando iniki awo abet mbaka'lek wonogwe, Ala kinagabiti eeppunuk, kinobaabut obeelom eerit nogo logonet, kinogonggelomini inabuwa nen, kinigen tebenak nugwi kiigo logomenggaarik, ”An ninom Yetut mugurok naakit,” mbaruwak nduk, inoone yokkirogwe iinok, kit nen wone onggo ambi yaga'lek, ”E o,” yinuk, liirogon eeko logonip. 3It aakumi nen, ”Kwe yi kigirikwe togon o,” yuwak nduk, kinagabolo paga mban ogobakkigikkologo logonet, kineeruwak abe mbininggologwe, kinarenggen-kinagiinggen laambu yikkologwe, kinagali-kinayum abe kigirikwe yirikkologwe, ti mban eeko logogup o. 4Ata, at Ala nen kumi inobaabut mondok yanggonak kwi'ndak abe wonogwe iinok, ”Inobaabut abe koonogo pakaarak me, inobaabut ti mondok obeelom aret logogin o,” yinuk, iniki kundugu mbake menggerak me, kit kinobaabut togop aret logobagip nduk, koonggologo logonip o. 5It kumi aa'nduk iniki Ala oba panggombunuk at oone liirogon mugurok nogo nogogwaarak nogo ti, aakumi nen, ”Kumi yi kigirikwe togon o,” yuwak nduk, inagabolo mban ogobakkigikkologo logolik. Ata, it togon togop aret inogonggelomini inabu'me logonet, inoone liirogon aret konenggo nogogwaarak me, 6kit kumi yogondak wonogwe yi, kwe Tara nogo nen Abarakam oone ari kenok, ”E o, nogoba”, yinuk, yanggonak mban eeke nagagerak nogo ndak-ndak, kit kinagabiti lek obeelom mban eerit nogwe kiinok, at Tara owogologwe kit aret logomunggup o.
7Togop me, yogondak kit aap nen eeriyak ambi yokkira o. It kumi ineebe ndeyak negen wonogwe me, kinakuwi kinom logonet, inabuwa mba'nuk yeenggwaarogwe, ndi, kiniki ogoorak logonet, kinom tamban eeriyak meek eekkinake kero, ”Ala ninabuwa nen nineenik mondok logorak mendek ninakuwi ninom ndak-ndak unde eeppinanigin o,” yinuk, obeelom eeppiigwi, eeko logonip o.
Obeelom wone yorogwe niigak, andi-pandi eeppinanigin wone
8-12At Ala nen ari logonet,
”It obeelom eekwi nogo at Ala enggaawak paga wonogwe,
ndi, it nen nggino yogwi iinok, aruk konengge,
eeke menggerak kwe,
it maluk eekwi iinok perak,
eebi inombake logonet, ambo'me piige menggerak me,
kit nggween paga yime obeelom mban logonet,
ale'nggen paga eerit nogo logowok mbakwi kiinok,
wone maluk mendek kinambe paga nen yuurak eekkinake
kero, kinambe arum liirogon wakwi,
pilit wone yuurak eekkinake nogo tebenogo pugwi,
maluk eeriyak eekkinake nogo tebenogo punuk,
obeelom mban eerit nugwi,
ndi, aakumi kinom kiniki ambit lambunik logowok nduk eekwi,
eeko logonip o,”
yinuk, yereegerak liiru mbanak ndak-ndak, kit togon Ala ale'nggen kinoba pinagawak nduk, kinayonggo pinagareegerak me, ”Kit nen maluk onggo-nggo eekwi, ambi nen ambi meek eeppegak eekwi, eeko logogup o. Ata, it maluk eeppinagagwi nogo obeelom eeppiigo logonet, kinom kiniki ambit eeppunuk wone mbanggwi, kiniki eyak wat-wat eekkologwe, nore-kore yogwe, nabuwa-kabuwa mbakwi, kiniki tebenak nugwi, eeko logonip o,” yinuk, eeko logorak irip paga ambi yokkiraakit mbakirak nogo ti aret yokkiragi o.
13Kit kiniki aganggen kerek togon obeelom eerit nugwi kiinok, maluk eeppinagarak mbakop? 14Togop eekulik kwe, kit obeelom wone yoranet nugwi kiigak andi-pandi kinoba eeppinagagwi iinok, ”Nonggop nduk eeppinanugwi?” yinuk, kinagabiti nen kiniki piirik eerugup o. Ata, ”Ala ale'nggen ninoba pinanigin o,” yinuk, kiniki ale'nggen paga waganggo logonip o. 15Keritut ninowe endagembogut aret logowok o,” yinuk, kiniki inom, kineebe inom apit at mban unde logowak nduk wogo'nip o. Ndi, kit kiniki luunik wonogwe nogo, it aakumi nen, ”Yo'niraanip o,” yinuk, kin wakkiigwi iinok, wone maluk perak togon yoroorak ti mage o. Ata, inayuk wuppunuk, kiniki abe paga kinoone yanggorogon onggo yoroorak nduk, wone koonogo punuk logonip o. 16Kit Yetut mugurok nogo logonet, obeelom eekwi kiigak, miyuk-meya eerogo pinagagwi, kinabok mbanggwi, eekwi nogo nen, kit obeelom mban eerit nogwe nogo paga, ”Iya,” yinuk, inagabiti mbarugun me, kiniki obeelom paga kinoone yanggorogon yorogo logonip 17Kit maluk eerit nogwe paga andi-pandi kinoba pinagagwi iinok ti, alom kit kinobalombok eerumonggotak paga eeppinagagun kwe, Ala iniki mbareegerak paga eerit nogwe kiigak, andi-pandi kinoba pinagagwi iinok ti perak, ti op aret o. 18Nit maluk eekwi lek aruwak nduk, at Keritut ne ambit paga aret kambeegerak. At maluk eekeelik obeelom mban eeke menggerak nogo nen, nit maluk eekwi nogo Ala abu'me pinanikit nduk at eebe aap pogom age mbareegi, warogo pereegwaarak nit ninake at kambeegerak kwe, Aberiniki nen eenik agago mippereegerak. 19At Aberiniki mippereegerak nogo nen aret maan it aakumi kambeegwaarak inogoma keele maarak negen o apit me wonogwe me, wone obeelom wone yora nagagerak. 20Obeelom wone yora nagagerak nogo ti, aap Nu nen maan aa'nduk it aakumi Ala wone yorage kagak, taganogo mbo pogo mbareegwa, Ala nen, ”Mbet-mbet inoorikit,” mbareegerak kwe, aap Nu nogo o awo wuke kenok, iniki yanggo yinuk, tokkage kagak, o nogo wuke mbareegi, aap Nu apuri inom ineebe 8 inagap ndake logonet, it ando apit niyo ndonggoninabeegerak inogoma keele maarak o apit me wonogwe me, wone obeelom wone yora nagagerak nogo it aret o. 21Ndi, it ineebe 8 niyo ndonggoninake kero, inagap ndareegerak nogo ndak-ndak nit yogondak niyoome wuppinanugwi paga ninagap ndake ti, we ninagabolo mili kenok, koo'ninabuwak nduk, eekwi lek o. Ata, nit nen Ala yogo logonet, ”An pilit lek, abet aret yiluk-maluk mbo pigirak me, kat kabu'me logokit o,” yinuk, Ala enggaanom paganggwi niinok, niyoome aret wuppinanugwi, ndi, at Yetut Keritut eenik eerogo mippereegerak paga ninagap ndake menggerak ndak-ndak, niyoome nen pilanogo mippinanugwi, eeko menggaarak o. 22At Keritut nogo ogoba Ala nen eenik eerogo mippege mbareegi, it mbogut paga yonggo nugu menggaarak melaikat inom, Tile inom, yi kugi ndi kugi inom, abok aret at abu'me logowak nduk, tebenogo piige nagagirik, yogondak mbogut paga ogoba Ala eenggi abe'nggan kwi'nari laganeegerak wonage o.
Цяпер абрана:
1 PETERUT 3: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце