1 PETERUT 1
1
PETERUT NEN LIIRU AA'NDUK
MBANEEGERAK WONE
1Kit Ala iniki mba'nuk miikkinabeegerak, o Pondut inom, Nggalatiya inom, Kaparokiya inom, Atiya inom, Mbitiniya inom, yi awi ndi awi mbaganit nogogutak aap nggiru negen wonogwe nogo, at Yetut Keritut nen nappiigak mendek logowak nduk, eerogo paneegerak an Peterut nogo nen wone ambi yokkira o. 2At Yetut Keritut yereegerak wone nogo wappunuk, ndak-ndak eekwi kiinok, at amiya paga kookkinake logowak nduk, at ninogoba Ala peebi eeriyak abok aret koonogo pege menggerak me, maan kooneegerak nogo ndak-ndak, Aberiniki nen eeppinagage kagak kit at apuri kikak naka'lek at ake leenak logobagip nduk, miikkinabeegerak me, at Ala iniki kunik nen wokkirage, kiniki ugun obeelom logobagip nduk eeppinagage, eeke logogin o.
Niniki Yetut oba aberak logorak wone
3-4At ninowe Yetut Keritut ogoba Ala ninabuwa nggwok lombok mbake nagagirik, obeelom eeppinanege logonet, at Yetut Keritut kambunuk nogo menggam nen eenik agago mippereegerak nogo paga, ninake kunik nineyate kokwak pili age, yi'mbaani kungge, lek age, eekeelik mondok mbogut paga pinanogo wonage niniki luunik wonogwe nogo, kola nawak nduk, niniki ngget mendek agago nda'ninabeegerak me, ”Ninogba Ala wa,” yinuk, keyage wako ogoorik o. 5Ninake pinanogo wonage kola noorak nogo ti, at Ala nen nit abet mbakwi niinok, o age yobok paga ninagap ndariyak kooneegerak nogo, peebi togop ndak-ndak ee'ninaburak nduk, yogondak Ala omaawi paga nggelorogon pinanogo wonage nogo ninake aret pipuk eerogo pinaneegerak mbogut paga wonage o.
6Togop me, nowe-nawot o. Aaninggin-paaninggin kinoba wonage nogo ti paga kiniki ale'nggen lek aaninggin ndugu agan nogo logorak ti mage o. Ata, ”Nogoba nen nabut mbanikit nduk eeke logonet, we luulu eeppanege me op aret o,” yinuk, kiniki ale'nggen nggwok aret mbako logonip o. 7Mbuti emas nogo ti, we luulu lek ariyak mendek kagak, ”Abe mendek ilik, alik mendek a?” yinuk, kani paga abut mbanggo menggaarak nogo ndak-ndak, kit abet mbakwi nogo ti, mbuti emas ndak-ndak lek o. Kit abet mbakwi nogo ti mondok iya lombok me, at Ala nen, ”Nu'lek wonogwe iyaamun ilik, lek a?” yinuk, kinabut mbangge logonet, aaninggin-paaninggin kinoba pinagage me, kiniki ale'nggen mbakwi kiinok, peebi ninowe Yetut Keritut eebe tena'me wage logonet, ale'nggen kinoba pinagage, keyage wakkinake, wogoppinagage, eeri woraagin o. 8-9Kit yogondak Yetut eebe kinigen kaga'lek kwe, kagak, kiniki kunik eekwi, abet mbakwi, eeko logonet, ”Nit niniki abet mbakwi nogo, anggen yugu paga nineebe ninagap ndarigin,” mba'nuk, kiniki ale'nggen mbakwi nogo ti mondok nggwok alik negen agaarak me, nonggop togon mbininogo yoroorak? Mondok meek o.
10-11It aap Ala wone yokkirogo nogogwaarak nabi-nabi nogo nen, ”Ala nen mandenom obeelom eeppinanigin? Ao,” yinuk, mbakwi wonogwe me, at Keritut nen nappi wagagerak Aberiniki nogo inikime logonet, ”At Keritut nogo peebi andi-pandi eerogo oba pemenggerak ti paga Ala nen tiyappigin o,” yinuk, yorage mbareegi, ”Ta nen ninagap ndari woraagin? Ndi, mandenom kin arigin?” yinuk, Ala wone pekkagak, at ambi nen at ambi kin wakkagak, eeko nogogwaarak. 12Mbogut paga nen Aberiniki nappi wagagerak it aap inikime unggwage nagagirik, yorage kagak, obeelom wone yokkirogogwaarak konenggo nogogutak wone nogo, maan it aap Ala wone yorogo nogogwaarak nogo nen, wone ti yorogwe iigak, at Ala nen, ”Wone yi ti, kit kinake nduk yokkirage lek o. Ti, it peebi nda'narumenggaarak inake nduk aret yokkiragi o,” yinuk, kin paga yoragagerak me, it melaikat kunduk wone ti, koneniyak uugwe mbakwi kwe, nit ninake nduk aret yorogo nogogwaarak kogo o.
Maluk eeka'lek obeelom mban eeko logowak nduk yonggo pinaneegerak wone
13Togop me, nowe-nawot o, ”Peebi at Yetut Keritut wage eyom paga Ala ninabuwa nen obeelom eeppinani woraagin o,” yinuk, kiniki ti paga mondok luunik logonet, mondok li'luk agago punuk, kinaket paga logonip o. 14Kit aa'nduk Ala kineenggo'lek logonet, kiniki nen nengge kenok ugun-ugun eerit nogo nogogutak nogo, mbo punuk, Ala nen ari kenok mban eerit nogo logonip o. 15-16At ala nen ari logonet, ”An maluk eekeelik obeelom mban minggirak ndak-ndak, kit togon maluk eeka'lek obeelom togop aret logonip o,” yinuk, yereegerak wone liiru mbanak wonage me, at Ala maluk eekeelik obeelom mban menggerak nogo nen kinayonggo pereegerak me, kit togon maluk eeka'lek kinobaabut obeelom at menggerak ndak-ndak aret logonip o.
17”Ala nit ninogoba o,” yinuk, tamban eeko monggoorak me, at Ala nogo nen nit yi aakumi ndi aakumi ninalitak lombok eeko logomonggoorak nogo abok ninawone ndak-ndak abet aret mbanigin me, yogondak mbogut paga unggwi naga'lek nggween paga yime luulu logonet, Ala mban ninagabiti eeppunuk, eerit nogo logowok o. 18-19Kit kinombomini maan mbogut paga unggwi noorak lek kagak we aanom warogo eeko nogogwaarak nogo ndak-ndak kit togop eekwi kiyo, wu mbuti emas inom, perak inom, yi mendek ndi mendek lek ariyak mendek ti paga kinonggo mbanulik o. Ata, ndomba amuni mbanak mondok abe mendek, Yetut Keritut aret wako mbareegwa, yagan wake logonet amiya wundeegerak nogo paga kinonggo mbaneegerak nogo kineenu aret o. 20-21O maan mbogut-nggween wakkaga'lek kagak, at Ala nen, ”An ogobakkigirogo piyaminggirak peebi maluk eerugun neenu aret me, inake Keritut aret leenogo piyaakit o,” yinuk, leenogo pereegerak nogo kote kumaarak wonagagerak kwe, yogondak irip paga yi aret at Keritut eereegerak nogo paga nit niniki Ala oba panggombunuk abet mbakwi nogo, ninake aret kin eeppereegerak me, nit niniki panggombugwi inom, niniki luunik wonogwe nogo inom, ti at Keritut kambunuk nogo menggam nen eenik agago mippege nagagirik, tiyappereegerak Ala eebe nogo aret o.
22-25”Iri'ngga-kale'ngga ero kwit agan lagangge nagaatik,
ti'nuk mbuk age,
ndi, iri'ngga anggen laambu yege kenok,
aakumi nen wiigaatak kwe,
ne ambit liingge mono-mono wangge,
eeke menggerak nogo pogom ti,
nit aakumi nineebe aret kwe,
Ala wone ti perak,
mondok itok aret menggerak o,”
yinuk, yereegerak liiru mbanak nogo ndak-ndak, Ala wone lek ageelik mondok itok menggerak nogo aakumi waganggwi iinok, iniki ngget ndaganake obeelom wone nogo aret yokkirogogwaarak waganggo mbareegup, mondok kineenik logobagip nduk, kit kiniki ngget ndakkinabeegerak nogo ti, aakumi inapuri ndaganakaatak kambit nogwe nogo pogom lek o. Ata, Ala nen aret ndakkinabeegerak me, kit Ala ari menggerak wone konembunuk, ”Ndak-ndak eeko logowok o,” yinuk, eerit nogo logonet, maluk kinikime wonage nogo mbo pereegutak me, yogondak kiniki laakot paga kinoreewi Ala apuri kinom kunik eerugup o. Ata, kiniki obeelom paga aret kinoreewi kinom niniki-kiniki kunik eeko logonip o.
Цяпер абрана:
1 PETERUT 1: WNO
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце