Mt 2
2
Tintlhari ta le Vuxeni tigandrela Kriste
1Yesu apswaliwi a Betlehema, atikweni dra Yudeya, ankameni lowu Heroda afaka ali mufumi wa tiko. Hikolahu kutlhasi tintlhari ta le Vuxeni a Yerusalema leti afaka titinyiketeli tidondrweni ta tinyeleti 2tivutisa tiku: Yikwini a HOSI ya va-Yuda leyi yahakakupswaliwa? Hikusa hivoni a nyeleti ya yone a Vuxeni, kutani hiteli kutatayigandrela.
3A mufumi Heroda atxhuka ngopfu loko ayingela leswo, yene kun'we ni vayaki hinkwavu va Yerusalema. 4Ahangarumela kuvitaniwa hinkwavu a vaprista#2:4 A vaprista kuhlayiwa a Vaprista va tavukhongeli. lava vakulu ni vadondrisi va Nawu, avavutisa lomu afaka atapswaleliwa kone Kriste. 5Vone vaku: Hi le Betlehema wa Yudeya, hikusa swatralisiwi xiswoswo hi muprofeta angaku: 6#Hlayela dra Mik 5:1. Na wene Betlehema, tiko dra Yuda awuntrongo amakari ka mintsindra ya tiko ledro, hikusa kutahuma ku wene a murangeli lweyi atakabyisa a tiko dranga dra Israyele.
7Kutani Heroda avitana a tintlhari axihundleni, ativutisa a nkama lowu nyeleti yingahumelela ha wone. 8Kutani atileleta a kuya a Betlehema, aku ku tone: Fambani n'wiyavutisisa swinene hi tlhelo dra n'wana lweyo, ni loko n'wimukumile, nitivisani, akuva na mine nitayamugandrela.
9Loko a tintlhari tiyingeli mufumi, tifamba. A nyeleti leyi afaka tiyivonile Vuxeni, afa yifamba amahlweni ka tone, yikondra yiyayima a henhla ka mbangu lowu a ntrongwana afaka ali ku wone. 10Loko a tintlhari tivoni a nyeleti, titrhavi ngopfu. 11Kolahu tinhingeni andlwini, kutani tivona ntrongwana na Maria, mamana wakwe, tikhisama, timugandrela. Kutani tipfula vukosi bya tone timuhanana nsuku, muri wa kunun'hwela ni mira. 12Loko Xikwembu Nkulukumba atitivisi anorweni leswaku tingahatlheleli lomu Heroda afaka ali kone, tetlhelela atikweni dra tone hi yin'wana ndlela.
Kutrutrumela a Egipta
13Loko a tintlhari titava tifambile, a ntrumi ya HOSI yivoneka ku Yosefa anorweni, yiku: Pfuka, teka a ntrongwana ni mamana wakwe utrutrumela Egipta. Trhamisa kone kukondra nikutivisa, hikusa Heroda adjula ntrongwana akuva amudlaya. 14Yosefa apfukiki ateka a ntrongwana ni mamana wakwe, afamba navu avusikwini, atrutrumela Egipta, 15#Hlayela dra Hx (Os) 11:1. lomu vatrhamiki kone kukondra Heroda afa. Leswi swihumeleli akuva kuhetiseka leswi swingahlayiwa hi HOSI, hi nomu wa muprofeta angaku: Nivitani a N'wananga a Egipta.
Kudlayiwa ka vatrongwana
16Loko Heroda agungula leswaku a tintlhari letiya timukanganyisile, ahlundruka ngopfu, arumela kuyadlayiwa a vatrongwana hinkwavu va xinuna lava afaka vali Betlehema ni le tikweni hinkwadru dra kone, va malembe mabiri ni kuya hansi, hi kulandra a nkama lowu afaka abyeliwi wone hi tintlhari. 17Xileswi, kavi laha kungahetiseka a matralwa ya muprofeta Yeremiya lweyi angaku:
18 # Hlayela dra Yr 31:15. Kutwala huwa a Rama:
a nkosi ni swidrilo leswi swikulu.
I Rahele lweyi adrilelaka a vana vakwe;
afaka angadjuli ni kumiyetiwa,
hi kuva avehe kone.
Kubuya hi le Egipta
19Ntrhaku ka kufa ka Heroda, a ntrumi ya HOSI yihumelela ku Yosefa anorweni le Egipta, yiku: 20Pfuka, teka a ntrongwana ni mamana wakwe, utlhelela tikweni dra Israyele, hikusa vafile lava afaka vadjula kudlaya a ntrongwana. 21Kutani Yosefa apfuka ateka a ntrongwana ni mamana wakwe atlhelela a tikweni dra Israyele. 22Kambe loko ativi leswaku Arkelawo#2:22 Arkelawo afumi kusukela ku lembe dra vumune kuyatlhasa ku dra vuntlhanu na drin'we, ntrhaku ka Heroda. hi yene afumaka Yudeya, ambangwini wa tatana wakwe Heroda, atxhava kuya kone; ativisiwiki kambe hi Xikwembu Nkulukumba anorweni, akongoma tikweni dra Galileya. 23Loko atlhasile, ayitrhama amutini lowu valiki i Nazarete. Leswi swihumeleli akuva kuhetiseka leswi swingahlayiwa hi vaprofeta vangaku: Yesu atatxhuliwa mu-Nazarete.#2:23 Aswitiviwi leswaku angava ku tralwa drini ku Testamente dra khale kungayentxiwaka xidrimuxo xa ndrimana leyi. A rito mu-Nazarete dridrimuxaka Nazarete, dranyikiwi Yesu (Mt 21:11) ni vakriste va kusungula (Mt 24:5).
Цяпер абрана:
Mt 2: NTX2007
Пазнака
Падзяліцца
Капіяваць
Want to have your highlights saved across all your devices? Sign up or sign in
Xironga New Testament with Psalms © Bible Society in Mozambique, 2007.