ROMANOS 7
7
Eyacuiñajjija esohui Moisesja tehuecuana jiquio ecua dejjaa papeni ejjahuanaquijjijo acani jama
1Ecue dohuecuana jjo'icuana Jesosajo, miquianajaya ebatii Eyacuiñajjija esohui Moisesja tehuecuana. Dejjacuana eshe nequijo Moisesja tehuecuana o huohuipoquiajjitii poani, jamajje ma esohuijotii oya jjashajja-ajjaquicapoquijji. O mano'yajo ca oja esohui etehue o huohuipoquiajjitii pojjeama po'yani. 2Oja tehue jama poani ba'a: Epona jjahueaquimajje ojahuenijjetii ba'ecapoquijji o eshe nequijo. Ojahue mano'yajo caca oe oya peajo jjashahuabaquica'yojji jama sapomajje ejjahueaqui'yojji. Papeni etehue ojahue ebionei poanajenijje o ba'emeepoquiajjitii pojjeama po'yani ojahue mano'yajo. 3Jamajjeya oya ojahue eshe nequijo pea dejjajo jjahueaqui'yomajje queamimishi poani, peacojjojji poani. Ojahue mano'yajo caca papeni ma o jjahueaquijji epo tehuejo oya ejjashajja-ajjaquijjitii pojjeama poaje. Oya pea dejjajo jjahueaquica'yojji oya jama sapomajjeya. Ma epona peacojjojji pojjeama poaje pea dejjajo jjahueaqui'yomajje.
4Ecue dohuecuana jjo'icuana, miquianaya jiquio ecua epona ojahue mano'yajo peajo jjahueaqui'yani jama pea-aiya po'yani. Quito jayojja pea-ai mano'yome pea-aiya quiana poanaje onijjetii. Jamajjeya Moisesja tehuecuana miquiana huohuipoquiajjitii pojjeama po'yonaje miquianaya emano'yo jayojja poanijojo. Jjeya caca miquianaya Jesosa Quitoja po'yani, ma Eyacuiñajjiya shequimeeca'yapoajaya. Eseya majoya queapame chacochacopoquije ojo. 5Jesosaja epeejji pojjimahua ba'e queamimishitii ba'epoquiapoa. Majoya Eyacuiñajjija esohui Moisesja tehuecuana eseya bajo eseya queamimishihuiso posapojji pomeecapoa. Oja tehue shajja-ajjamajje ba'a: “a'a jama pojji,” eseya jamatii queamimishihuiso posapoanaje. Ma ejjashahuabaquijjicuana queamimishitii epojjiya eseja yamijonei nequiya manomeecaje'yo se. 6Jjeya caca Eyacuiñajjija esohui Moisesja tehuecuana ese huohuipoquiajjitii pojjeama po'yonaje ese emano'yo jayojja poanijojoya. Esejaya Moisesja tehuecuana jayojja eba'eajjatiipoquijji pojjeama poaje'yo. Jjeya ca se ca pea jjashahuabaquime po'yani Eyacuiñajjija esohui eyacua eapoquia'yojji queabihui, ma Edojjoshahuapameja ejjashahuabaquijjiya.
Moisesja etehueya huohuicapoquianitii cuana ojjaña queamimishi poani
7Jamajjeya, ¿yajja acuae se pocajji comajo? ¿A'a Eyacuiñajjija esohui Moisesja tehueya eseya queamimishi pomeecani? Chojja de, jama pojjeama. Eyacuiñajjiya oja esohui tehuemeecapoa esejaya queaja'a ebajji ae shai mimishi. Eyacuiñajjija esohui etehue jaa jama poani ba'a: “Peaja aquianacuana jeabaca-ajja.” Ma esohui etehueya ecuea bajjimatii poajojjemo eya peaja aquiana jeabamajje queamimishi poani pojjeama poso jjabaquiquiae. 8Majoya Eyacuiñajjija esohui Moisesja tehue eya bajo ma esohui etehueya eya queamimishihuiso posapojji pomeecapoa. Oja tehue jama poani, “a'a peaja aquiana jeabajji” shajja-ajjamajje eya jamatii peaja aquianacuana jeabamajamajasaneiapoa. Eyacuiñajjija esohui Moisesja tehuecuana chama' poajojjemo eseya queamimishihuisotii posapojjima' poquiae. 9Yahuajo oja esohui etehue bapojjima'hua nequi eya jamatii ba'epoquiapoa. Ma eya asa-anajecuana eyaya apoquiapoa queamimishi poani jjabaquijjimaa. Majoya quijje Eyacuiñajjija esohui Moisesja tehuecuana eyaya bapoa. Oja esohui etehue jaa eya queamimishica'a poani jjabaquimeecapoa. Eya queamimishi pomajje eya majoya manoje'yo jjabaquiapoa. 10Eyacuiñajjija quia esohui Moisesja tehuecuana ese queapame ba'emeepoquiajji pocajji poa. Jama pojjeama eseya pomeecapoa oja esohui etehueya. Eseya ca jjabameequicapoa oja esohui etehueya eseja mimishijo se manoje'yo. 11Mimishi ecuea eyamijotii nequiya eya siajje acapoa. Eyacuiñajjija esohui Moisesja tehueya eya queapame epomeecaje poso jjabaquiapoa. Majoya eya queamimishihuiso posapojji oja esohui etehueya eya pomeecapoa. Eya jjabameepea-aiquicapoa ecuea mimishijo eya manoje'yo.
12Jamatiiya Eyacuiñajjija esohui Moisesja tehuecuana ojjañatii queapameneetii jaapoquiani, queaja'anee poani pea-ai. 13¿A'a jiquio esohui Moisesja tehuecuana queapameya eya manomeecaje'yo? Chojja de, jama pojjeama. Oja esohui etehueya eya manomee'yojjima acani. Eseja mimishiya eseja yamijotii nequiya eseya caca manomeecaje'yo. Oja esohui etehue jaa jama poani ba'a: “Ojjaña joya queamimishi epocuana manoje'yo.” Eyacuiñajjija esohui etehue queapameneetii poani jamatii queamimishihuiso posapojji pomeecani cuana oja etehueya. Eya majoya manoje'yo. Jamajjeya oja esohui etehue bamajje eseyaya queaja'a baña mimishi queataineenee poani.
Mimishi eseja yamidojjojo nequianitii
14Esejaya eba Moisesja tehuecuana Eyacuiñajjija quia poa. Jamajjeya oja esohui etehue queapameneetii poani. Eseyanei ca queamimishitii epojji ba'yani. Mimishi eseja yamidojjojo nequi, e-esemese poani. 15Ecuea bajjima apiojji shai eya queamimishitii ba'epoquiani. Eya queapame ba'esapoani jamatii eya jama queapame ba'eajja. Cua eya asapo-ajjanei queamimishi epojji eyaya aña. 16Jamajjeya eya bihuiamanei poani cua eya asapo-ajjanei aña jjabaquimajje. Eyacuiñajjija esohui Moisesja tehuecuana jayojja eya jama ba'esaneipoani oja tehue queapamenee poanijo, jamatii oja tehue jama ba'eajja. 17Jamajjeya eya jjabaquiani ecueanei ejjashahuabaquijjijo pojjeama eya queamimishi poani. Mimishiya ecuea eyamidojjojo nequiyatii ca eya queamimishi pomeecani. 18Ecuea ebanei ecueanei eyamidojjojo chama'nei e queapame pomeejji. Jamatii eya queapame posapomajje eyaneitii queapame po-ajja. 19Cua eya queapame asa-aña eya a-ajja. Cua queamimishi eya asapo-ajjanei eyaya aña. 20Bacue, queamimishi cua eya asapo-ajjanei añajo eyanei pojjeama jamaya poani. Mimishiya ecuea eyamidojjojo nequiyatii ca eya jama pomeecani.
21Jamajjeya eya jjabaquiani eya queapame posapoani jamatii eya queapame po-ajja, ecuea mimishi enijjetii nequiani. 22Ecuea equijijjijo oja esohui etehue queajea aña. 23Jamatii eya jjabaquiani ecue yamidojjojo nequianitii mimishi e queapame pomeeajjajji poani. Mimishiya e queaja'a jjashahuabaquijji pomeejjima acani. Jamajjeya mimishi ecuea eyamidojjojo nequi queaca'anee poani, e-emese poani.
24¡De! eya queayenonee ani. ¿Aya shai eya ecuea eyamijo nequi mimishijo nahuecaje? Jiquio eyami manoje'yo. 25Eyacuiñajji oeneiya eya nahuecaje mimishijo Jesosa Quitojo queaca'a jjapomeequiajo. Jamajjeya eyaya oya gracias apoquiaje. Bacue, mahuiso eya jjashahuabaquiani ba'a: Eya Eyacuiñajjija esohui queapame etehue jaa jayojja ba'epoquitiisapoani. Jamatii ecueanei ejjashahuabaquijji queamimishi epojji nequianitiijojoya eya queamimishitii poani majoya.
Цяпер абрана:
ROMANOS 7: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006