ROMANOS 5
5
Eyacuiñajjiya eseya bacani eseja mimishima'yo
1E'e, jjeya Eyacuiñajjiya eseya bacani eseja mimishima'yo poani ese Jesosajo jjashahuabaqui'yonajejojoya. Jamajjeya jjeya Eyacuiñajji esenijje jjabeiqui'yonaje Emeshimesenei Jesosa Quitojo. 2Eseya Jesosa Quitojo jjashahuabaqui'yajo Eyacuiñajjiya eseya queapamenee acapoquianitii jjabaquiani. Eseya queaca'a ba'epoquije ojonei. Jamajjeya eseya jjeya queabihuinee jjaishoaquipoquiani quijje Eyacuiñajji queaca'aneetii queasajajanee nequipoquianinijje eseya ba'etiitiipoquije'yo. 3Majoneitii pojjeama se queabihui popoquiani. Jiquio meshijo nequicaa eseya queacamaja pomeecajje eseya jamatii queabihui poaje esejaya ebajojoya ohua jama acajo se queaca'a ba'emeecapoquije Eyacuiñajjiya. 4Majoya eseya jama queaca'a ba'epoquiani bamajje Eyacuiñajji queabihui poani esejo. Eyacuiñajjiya eseya bacani queabihuiya jjabaquimajje eseya quijje yenoama ba'epoquije oja ejjashahuabaquijji eapoquiajji. 5Jamajjeya eseya jamatii pojjeama queaca'a ba'epoquiani. Eyacuiñajjija quiaa Edojjoshahuapameya ca eseya queaja'a jjashahuabaquimeecani Eyacuiñajji quea-esejeanee poanijo.
6¡Bacue! Eseyanei ca'a-amaneitii ejjanahuemeequi'yojji ba'ejo, queamimishitii poanijo pea-ai Quito mano'yapoa ojjaña ese mimishijo. Eyacuiñajjiya o mano'yojji epojja apoa amajje oya Quito manomeeca'yapoa. 7Bacue, dejja pea onijje dejjaja ejjocojo nequisapo-ajja o mano'yojjima epojjijo. E'e pojja'a oe dejja mano'yosapoaje pea dejja mano'yojjima epojjijo ma o queapamenee ajji poanaje nahuejjijo. 8Jesosa ca jamatii ese queamimishihuisotii ba'ejo mano'yapoa esejo. Jamajojoya aje eseyaya baña Eyacuiñajjiya eseya queajeanee acani. 9Eyacuiñajjiya eseya bacani eseja mimishima'yo Jesosaja ena' o mano'yajo cuayaqui'yapoajojoya. Jamajjeya e'ejojonei Quitohua eseya nahuecaje'yo Eyacuiñajjija queaneeneetii epomee'yojjijo ma quijjenei ohua acaje'yojo. 10Yahuajo eseya Eyacuiñajji sapo-ajjanei ba'epoquinaje. Jamatii ese ba'ejo Eyacuiñajji jjabeiqui'yapoa esenijje oja Bacuaejja mano'yonaje eseja mimishi sosequiajeyojji bamajje. Jamajjeya e'ejojonei jjeya Eyacuiñajjiya oja epeejji poani eseya nahuecapoquije'yo oya Jesosa eshequi'yo nequijojoya ese ba'emeesahuapoquiajji. 11Mahuisoneijotii pojjeama eseya queabihui poani. Eseya queabihuinee jjabaquiani Eyacuiñajjijo. Ohuaya jjeya eseya bacani ojaya epeejji. Emeshimesenei Jesosa Quitojo oya jjabeiqui'yonaje esenijje, jamatii pojjeama.
Adán, Jesosa Quito pea-ai
12Bacue, oeneinei dejjaja mimishijo ojjaña meshijo ba'ecacuana queamimishi pojeyocapoa. Ma dejjaya queamimishi pocoomajje manocoo'yapoa. Jamajojoya aje se ojjaña manopoqui'yani ojjañatii queamimishi epojeyojjejojoya. 13Yahuajoneinei Eyacuiñajjija esohui ma ohua Moisés tehuemeecapoa esohuiya quiajjimahuajo jamatii queamimishitii ba'ecapoquiapoa cuana. Oja esohui etehue chamahuajo ojjañacuanaja mimishijo Eyacuiñajji jjashahuabaquijjima poa so'o oja esohui etehue cajaa acani cuaa. 14Jiquio meshijo yahuajonei ba'ecapoacuana Adán eshe nequiahuajo, Moisés pea-ai eshe nequiahuajo ojjañacuana jamatii manocapoqui'yapoa oja esohui etehue bapojjima'tii ba'eca. Jamajjeya macuaa pea mimishicuana acapoquiapoa ma ecua Adanya Eyacuiñajjija esohuinei ajjima' acapoa, jama pojjeama acapoa cuaa queamimishi epojji. Jamaya ba'ecapoquiapoa cuana. Quijjenei pea dejja poeje, acapoa cuaa, ma ecua Adán poa jama pea-aiya epojji.
15¿A'a Jesosa Quitohua ma ecua Adanya acapoa jama pea-aiya acapoa? ¡Chojja! Eyacuiñajjiya eseya queapamenee pomeeca'yonaje Jesosajo. E'ejojonei ma dejja oeneija Adanja mimishijotiiya ojjaña meshijo ba'ecacuana manocapoqui'yani. Eyacuiñajjiya ca ojjañacuana jamatii queamimishitii ba'e queapamenee acapoquiani ma pea dejjajo Jesosa Quitojoya, oyanei queapame poanijo pojjeama. 16Eyacuiñajjiya ojjañacuana queapamenee acapoquiani Jesosajo. Adanja mimishi ca jama pojjeama poani jiquio ecua Eyacuiñajjiya eseya queapamenee acapoquiani Jesosajo, jama pea-ai pojjeama poa. Oenei dejjaja mimishijo Eyacuiñajjiya ojjaña meshijo ba'ecacuana mimishijjijeyo bacani queaneenee epomee'yojji. Oenei pea-aijo Eyacuiñajjiya queapamenee pomeeca'yonaje cuana ojjaña joya oja Bacuaejjajo jjashahuabaquica'yani huisotiicuana jamatii queamimishihuiso epo. 17Bacue, e'ejojonei oenei dejjaja mimishijo ojjaña meshijo ba'ecacuana manocapoqui'yani. Oenei pea-ai Jesosa Quitojoya Eyacuiñajjiya queapamenee acapoquiani cuana ma ecua ebionei oenei dejjaja mimishijo acapoa cuana jama pojjeama. Jamajjeya e'ejojonei ojjaña joya Eyacuiñajjiya queapamenee acapoquiani cuana jamatii queamimishi epo oja mimishima'yo bacaje oya Jesosajo jjashahuabaqui'yajo. Jesosa Quitohua queapame quijje ba'etiitiimeecaje'yo macuanaya onijjetiiya.
18E'ejojonei jamaya oenei dejjaja mimishijo Eyacuiñajjiya ojjaña meshijo ba'ecacuana bacapoa mimishijji queaneenee epomee'yojji quijje. Jama pea-aiya aje Jesosa Quito oenei mano'yome poajo Eyacuiñajjiya queahuisoneecuana oja mimishima'yo epojji bacaje eba'etiitiipoqui'yojji onijje. 19Jama poanijje pea-ai ba'a: Oenei dejja shajjama' jayojja pocooapoajo ojjañacuana queamimishi epojji o jayojja pea-ai epojji pojeyocapoa. Oya jayojjaya oenei dejja Jesosa Quito Eyacuiñajjija esohuijo jjashajja-ajjaquiapoajo queahuisocuana oja mimishima'yo bacaje Eyacuiñajjiya.
20Eyacuiñajjiya oja esohui etehue huohuicoocapoa Moisés. Ojjañacuana queamimishihuiso poani jjabaquijji majoya tehuemeecapoa oja esohui Eyacuiñajjiya. Jamatii ojjañacuana queamimishihuisonee poanitii Eyacuiñajjiya queapamenee acapoquiani ojjañacuana. 21Mimishiya ojjañacuana manomeecapoqui'yani mimishicuana queaca'anee poaniyajjejojo. Jjeya caca Eyacuiñajjiya eseya queapamenee acapoquiani Jesosa Quitojo, esejaya Emeshimeseneijo. Ohuaya eseya mimishima'yo bacani eba'etiitiipoqui'yojji onijje Eyahuasijje.
Цяпер абрана:
ROMANOS 5: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006