ROMANOS 14
14
A'a miquiananijje ba'eca Jesosaja epeejjicuana niñebajji
1Beca miquiananijje ba'e Jesosaja epeejjicuana queajjashahuabaquija'a pojjeama nequiani Eyacuiñajjija esohuijo. Ojaya Eyacuiñajjija esohui bajeyojjima so'o. Oya queapame pea-ai poani bacue. A'a onijje mimipanajajijji cua miya queapame baña ohua mi-acajo. 2Bacue, beca Jesosaja epeejjicuaa ojjaña noecuana bacani queapame eijjiajji. Peacuana joya Eyacuiñajjija esohuijo queajjashahuabaquija'a pojjima' ba'e ca noe ijjia-ajjanei poani. Oya noe ijjiamajje queamimishi epoaje poso jjabaquiani. 3Jamajjeya joya ojjaña noecuana ijjiajji poanija ma noe ijjia-ajjanei poanicuana peajja jayojja baca-ajja ojaya. Oya jayojja joya noe ijjia-ajjanei poanija ma noe ijjiajji poani niñebaca-ajja pea-ai ohua noecuana ijjiacanijo. Bacue, Eyacuiñajjiya ojjañatii oja epeejjicuana oya jayojja pea-ai bacani queapame. 4Miquianajaya joya peajo chacochacoanicuana niñebaca-ajja. Ojaya echacojji a'a queapame, a'a queapame pojjeama miquianaja oya aca-ajja. O chacomeejji poaniya caca oe ojaya echacojji bacaje a'a oya queapame, a'a oya queapame pojjeama ehuohuijji. Oya jayojja joya Eyacuiñajjijo chacochacoanicuana a'a queapame, a'a queapame pojjeama poani miquianaja oya aca-ajja. Ojjañacuana chacochacoani Emeshimeseneijo. Jamajjeya oya queaca'aneetii nequiani o queapame chacomeejji epojji.
5Bacue, beca Jesosaja epeejjicuaa ojjaña epojja oya jayojja pojjeama bacani. Oe epojja queanahue, queapamenee pea-ai bacani. Jama epojji queamimishi pojjeama. Peacuaa ca jama pojjeama epojja bacani. Ojjaña epojjacuana oya jayojja pea-ai ohuaya bacani. Jama epojjiya pea-ai queamimishi pojjeama. Jamajjeya ojjañacuana cua oja esohuijo jjashahuabaquipoqui jayojjanei ba'ecapoquijji, peaja ejjashahuabaquijjijo pojjeama. 6Jamajjeya joya oe epojja queanahue bajji poanicuaa jamaya acani Emeshimeseneijo o bihuiajji. Oya jayojja pea-ai joya noe ijjiajji poanicuaa acani. Ohuaya noe ijjiacani Emeshimesenei bihuiamajje. Joya noe ijjia-ajja poanicuaa jamaya apea-aicani Emeshimeseneija oya queapame poani ebajji, jamatii pojjeama. Ohuaya pea-ai Eyacuiñajji bihuiacani bobijo.
7Eseyatii che oema'nei eshe ba'epoquiani esejayanei ejjashahuabaquijji eajji. Eseya ca eshe ba'yani Emeshimeseneiya huoojeacapoquianitii. Ojayanei eba acheshono se manoje'yo. Esejaya ca bajjimanei. 8Jamajjeya ese eshe ba'e Emeshimesenei queabihui pomeejji ba'epoquije. Majoya eseya manoje'yo Emeshimeseneija ejjashahuabaquijjijo. Jamajjeya eseya eshe ba'e, mano'yomajje pea-ai Emeshimeseneijatii poaje. 9Quito majoya mano'yapoa esejo eseya ojaya epo'yojjijo. Quito emano'yo jaa shequi'yapoa ojjaña eseja Emeshimeseneitii epojji joya emano'yo jaacuanaja, eshe ba'ecacuanaja pea-ai epojji.
10Jamajjeya, ¿apiojji acuae quiaa miquiananijje Jesosaja epeejjicuana niñebaña? ¿Apiojji acuae oya peajja jayojja baña? Bacue, ojjañatii eseya Eyacuiñajji ani cojjaneijo nequije. Achajja eseya oja epeejji epo ba'epoquianinaje eshe nequiahua ohuaya huohuicaje'yo. A'a queapame, a'a queapame pojjeama ba'epoquinaje jamaya se huohuicaje'yo Eyacuiñajjiya. 11Eyacuiñajjija esohui yahuajonei etehue jaa jama poani ba'a:
“Eyaya Emeshimeseneiya e'ejojonei esohui aña.
Ojjañajaajjicuana e cojjaneijo oja ecuioshajjajo nequicaje e bihuiajji.
Jama acaje ojjañacuaa ba'a:
‘Jiquio eseja ecojjaneijo nequi e'ejojonei Eyacuiñajji poani,’
jamaya acaje cuaa.”
Jama tehuemeya acapoa yahuajonei esohuihuohuijji poaa. 12Jamajjeya, ojjaña eseyaya oja epeejji poaniya Eyacuiñajji huohuije ma eseya eshe nequiahua ba'epoquinaje ojaya quijje ehuohui'yojji a'a queapame, a'a queapame pojjeama ba'epoquinaje.
A'a miquiananijje ba'eca Jesosaja epeejjicuana queamimishi pomeejji pojji
13Jamajjeya seya oe pea esenijje ba'eca Jesosaja epeejjicuana niñebapajea'yocue. Jama poca-ajja onijje. Miquiananijje Jesosaja epeejjicuana ca oe queajea apoquiacue. A'a oya queajjashahuabaquiquehua pomeejji quijje queamimishi epo-o'oyajjijo. A'a oya queamimishi pomeeo'oyajji. 14Eya queashequiajahuiso Emeshimesenei Jesosaja epeejji nequipoquiani, jamajjeya aje ecuea ebanei ojjaña bobicuana queapame eijjiajji. Chama'nei bobi miquiana queamimishi pomeejji poani. Jamatii beca Jesosaja epeejjicuaa bobicuana ojjañatii pojjeama queapame eijjiajji bacani. Jamajjeya ma bobicuana ijjiamajje queamimishi poani jjabaquije, ma bobicuana ijjiaca-ajja ohua bacanijjejojo. 15Miquiaaya bobicuana ma pea Jesosaja epeejjicuaa ijjiajjima acani ijjiañajo oya queayeno poaje miquianajo. Majoya miquiaaya jama pomajje pea miquiananijje ba'eca Jesosaja epeejjicuana queajea ajjima' aña. Jamajjeya a'a maya bobicuana ijjiajji. Miquiaaya ma bobi ijjiaña bamajje ohuaya joya bobi ijjiasa-apea-aicaje. Majoya oya queamimishi poani jjabaquije ijjiamajje. A'a oya jamaya queamimishi pomeejji. Quito mano'yapoa macuanajo pea-ai. 16E'ejojonei bobicuana ojjaña queapamenee eseja eijjiapoquiajji. Jamatii pea Jesosaja epeejji poanicuaa ojjaña bobicuana jama pojjeama bacani. Jamajjeya miquianaya jjabaneiquicue. Ma bobicuana ijjiaña bamajje queahuisocuana jjaniñebaquicaje miquianajo. 17Bacue, Eyacuiñajjiya ojjañatiicuana huoojeacapoquianitii Emeshimesenei poaniya. Ae yami shai ijjiacani cuaa ojaya ehuohuiajjajji pojjeama. Jamajjeya eseya bobijonei pojjeama jjashahuabaquipoquiani Eyacuiñajjija eseya queapame mimishima'yo poani ebajji. Ohuaya se queaquijijjijajinee pomeecani. Eseya onijje queabihui jjapeequimeesa-acani pea-ai. Jamaya Edojjoshahuapameya eseya ba'emeesahuacapoquije. 18Jamajjeya oja epeejjicuana queapamenee chacochacoani Quitojo bamajje Eyacuiñajji queabihui poaje. Onijjejaajjicuaa oja epeejjicuana queapame ba'yani bacaje pea-ai.
19Jamajjeya oe pea miquiananijje ba'eca Jesosaja epeejjicuana queapame apoquiacue onijje queabei eba'epoquijji. Majoya Jesosaja epeejji oja esohuijo tiimeesahuapoquiacue ojee queaca'a eba'epoquijji. 20A'a Jesosaja epeejjicuana queayeno pomeejji bobicuana oja ijjiaca-ajja miquiaaya ijjiañajo. Ohuaya bobijo queayenonee pomajje Eyacuiñajjija echacojji chacopajeacaje. E'ejojonei ojjaña bobicuana queapame. A'a Jesosaja epeejji queamimishi pomeejji oja ijjiaca-ajja bobi oya ijjiameemajje. Jamaya becaa quiaa queaquehua jjashahuabameequiaña cuana. 21Jamajjeya miquiananijje ba'eca Jesosaja epeejjicuana jama jjashahuabaquime poani oya bobijo queamimishi poaje bamajje, a'a noe ijjiajji, a'a jjonojjajjana' queasese ishijji pea-ai. Cua o queamimishi pomeejji poaje, a'a jama ajji. A'a oya queajjashahuabaquiquehua pomeejji. 22Miquianaya jjashahuabaquiani ojjaña bobicuana queapame poani eijjiajji. Majoya Eyacuiñajjijo jjashahuabaquimajje ijjiaña. Jamajojoya aje dejjacuaa cua ohua asa-acani queamimishi poaje jjabaquijjimaa queabihuiya acaje cua ohua asa-acaje cuana. 23Jamajjeya ojjaña joya noe ijjia-ajja poanicuana jamatii noe ijjiamajje queamimishi poani jjabaquije. Oya jama poaje Eyacuiñajjiya bacaje. Oya oja sapadojjojje jjashahuabaquinaje queamimishi poaje noe ijjiamajje. Majoya ohuaya noe jamatiiya ijjiacanaje. Jamajjeya jama pomajjeya oya queamimishi poani.
Цяпер абрана:
ROMANOS 14: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006